АР-м иконцертнэ зэхахьэ и Камернэ музыкальнэ те­ат­рэу Хьанэхъу Адам ыцIэ зыхьырэр зызэхащагъэр илъэс 30 зэрэхъугъэр игъэ­кIотыгъэу хигъэунэфыкIыгъ.

Ащ фэгъэхьыгъэ мэфэкI зэхахьэ АР-м и Къэралыгъо филармоние щыкIуагъ. Iофтхьабзэр «Миром правит любовь» зыфиIорэ театральнэ къэгъэлъэгъон шъуашэм илъэу кIуагъэ. Жанрэ зэфэшъхьафхэр щызэхэгъэщагъэхэу ар гъэ­псыгъагъ. Оперэмрэ опереттэмрэ къащегъэжьагъэу, классикэр, джырэ мэ­къамэхэр ыкIи нэмыкIхэр ащ щыIугъэх. Театрэмрэ икъэгъэлъэгъонхэмрэ шIу зылъэгъухэрэр зэкIэ ащ еплъын­хэу амал яIагъ.
Камернэ музыкальнэ театрэр 1993-рэ илъэсым республикэм иIэ хъугъэ. Ащ дэжьым, макъэ зиIэу орэд къэзыIошъурэ, къэшъошъурэ ыкIи сценическэ зыкъэшIынымкIэ сэнаущыгъэ зыхэлъхэу, а пстэури зэдагъэфедэзэ зыкъэзышIышъурэ артистхэр ащ зэфищэгъагъэх. 2004-рэ илъэсым къыщегъэжагъэу те­атрэм изэхэщэн зигукъэкIэу, АР-м культурэмкIэ иапэрэ министрэу Хьанэхъу Адам ыцIэ ехьы. Непэ илъэс 30 зытешIэжьыгъэ уж, анахь цIыфыбэ зыу­гъоирэ театрэу республикэм иIэмэ ар ащыщ. Опереттэхэм, мюзиклхэм, на­хьыжъхэм ыкIи кIэлэцIыкIухэм апае къэгъэлъэгъон зэфэшъхьафхэм ар адэлажьэ. Еплъыхэрэм шIу алъэгъугъэ спектаклыбэу илъэс пчъагъэ хъугъэу исценэ къыщигъэлъагъохэрэр ирепертуар жъугъэу хэтых. ГущыIэм пае, ахэм ащыщ Шекспир иIофшIагъэ техыгъэ спектаклэу «Много шума из ничего» зыфиIорэр. Театрэм ар зигъэуцугъэр илъэсипшI фэдиз хъугъэ нахь мышIэми, икъэтыгъо пэпчъ цIыфыбэ къеугъои. Адыгеим имызакъоу Урысыем икъэлэ зэфэшъхьаф­хэми ар къащагъэлъэ­гъуагъ. Джащ фэдэу театрэм инэпэеплъ хъугъэх къэгъэлъэгъонхэу «Летучая мышь» (И. Штраус), «Сильва» (И. Кальман), «Старомодные амуры» (А. Се­менов), мэкъэмэ спектаклэу «Табунщик и гордая девушка», «Щелкунчик» (П. Чайковскэр) ыкIи нэмыкIхэр.

— Тыздэлажьэрэр цIыфхэм агу рехьы. Артистхэм язакъоп ныIа, оркестрэ псау тигъус. Къытэплъыхэрэм агу ащ лъэшэу ещэфы. Тикъэгъэлъэгъонхэр зыщыкIорэ чIыпIэхэм тIысыпIэ нэкI къафанэ­рэп, ар шIу тызэра­лъэ­гъурэм ишыхьат. ЦIыфхэр къа­кIохэмэ, ащы­гъум агу тырехьы. Ары зы­хъукIэ тырящыкIагъ, арышъ, нахь дэгъоу Iоф тшIэн, тызэдэлэжьэн фае, — зэдэгущыIэгъум къызетэгъэблагъэм къыддэгощэгъагъ АР-м иконцертнэ зэхахьэ и Камернэ музыкальнэ театрэу Хьанэхъу Адам ыцIэ зыхьырэм ихудожественнэ пащэу, УФ-м искусствэхэмкIэ изаслуженнэ Iофы­шIэу Юныс Сулеймановыр.
Камернэ музыкальнэ театрэм игъогу зэрэщытэу къыдикIугъ ихудожественнэ пащэу Юныс Сулеймановым. Театрэм иIофшIэн зэрэзэтыригъэуцорэм дакIоу къэгъэлъэгъонхэми ар ярежиссер. ­
Илъэс 30 ихэгъэунэфыкIын фэгъэхьыгъэ те­атрализованнэ къэгъэлъэгъонри ащ ыгъэуцугъ. IофшIэным зэрэхигъэ­хъощтымрэ къяплъыхэрэм нахь ашIо­гъэшIэгъон зэришIыщтымрэ ренэу дэлажьэ. Артист ныбжьыкIэхэр труппэм къыхещэх. Мы IофшIэгъу илъэсэу кIорэм нэбгыриплI кIэу ыштагъ. Ахэр непэрэ къэгъэлъэ­гъонхэм ахэщагъэх. Агъэуцугъахэхэм адакIоу кIэхэри репертуарым къыхэхьэх.
Евгений Шварц итхыгъэу «Обыкновенное чудо» зыфиIорэм игъэуцун театрэм непэ Iоф дешIэ. Ащ нэмыкIэу адыгэ лъэпкъым итарихъ нэкIубгъохэм ащыщ фэгъэхьыгъэ IофшIэгъакIэу «Тыр­гъэтау» зыфиIорэми дэлажьэх. Апэрэм — жъоныгъуакIэм, ятIонэрэм Iоныгъо мазэм лъэтегъэуцо афашIынэу рахъухьэ. Ахэр гухэлъ пэIудзыгъэхэр ары. Благъэ­хэм ярепертуар икъэгъэлъэгъон лъагъэ­кIотэщт. Гъэтхапэм и 20 пчыхьэм сы­хьатыр 18:30-м АР-м Къэралыгъо филармоние гъэтхэ концертэу «От сердца к сердцу» зыфиIорэр къыщатыщт.