Адыгабзэмрэ тхыбзэмрэ ямазэ къыдыхэлъыта­гъэу Адыгэ Републикэ гимназием илъэIукIэ КъЩР-м щытырахыгъэ фильмэу «Испытание аулом» зыфиIорэр кIэлэ­еджакIохэм Мыекъуапэ къащыфагъэлъэгъуагъ.

Непэрэ кIэлэцIыкIухэу телефонымрэ хъытыумрэ нэмыкI зышIомыгъэшIэгъонхэм, ащ нэмыкI щыIэныгъэ щыIэми зымышIэхэрэм ар афэгъэхьыгъ. Фильмыр нэгъой чылэм щытырахыгъ. Кавказым ишэн-хабзэ­хэр, нахьыжъ-нахьыкIэ зэфыщытыкIэхэр, ныдэлъфыбзэм, ар пшIэным ямэхьанэ къыщигъэлъэгъукIыгъэх.
— СиIофшIэгъоу, сишъэогъоу Артур Неймановым фильмым Iоф дишIагъ. Дэхьащхын шIыкIэм илъэу гъэпсыгъэ. Шъэожъыеу хэлэжьагъэхэм дэгъоу зыкъа­шIыгъ. Сэ зэрэслъытэрэмкIэ, филь­мыр дэгъу дэдэу тырахыгъ. Ащ Iофыгъоу къыщыIэтыгъэхэм ягугъу шIыгъэн фаеу сэлъытэ. ПIуныгъэ гъэсэныгъэм ылъэныкъокIэ, бзэм икъэухъумэнкIэ мэхьанэшхо, кIуачIэ иI, — къыд­дэгощагъ Урысыем икинематографистхэм я Союз хэтэу, ащ и Адыгэ шъолъыр къутамэ ипа­щэу Нэгъэплъэ Аскэрбый.
Фильмым герой шъхьаIэу хэтыр илъэс 11 зыныбжь Тимур цIыкIур ары. Ятэ къыфэбзаджэу ащ елъытэ ыкIи игъэсэпэтхыдэхэр зэхимыхынхэм фэшI тыжъым дэжь мазэрэ щыIэнэу къуаджэм макIо, ау шъэожъыер зэрэмыгугъагъэу, чылэр ащ ушэ­тыпIэ фэхъугъ. НыбжьыкIэ­хэр ашIогъэшIэгъонэу IофшIа­гъэм еплъыгъэх. ИлъэсипшI зы­ныбжь Бгъуашэ Дамир ар лъэшэу ыгу рихьыгъ.
— Фильмыр лъэшэу сшIогъэ­шIэгъоныгъ. Анахьэу герой шъхьаIэр чылэм зэрэкIуагъэр. Тыжъым кIэлэцIыкIур къалэм тэрэзэу щамыпIоу зэрилъытэрэми десэгъаштэ. ЫкIи лъэпкъ шэн-хабзэхэм афигъэсэнэу ыуж зэрихьэрэр тэрэзэу сэлъытэ. Къуаджэмрэ къалэмрэ зэращапIухэрэр зэтекIэу сшIошIы, — еIо Дамир.
«Испытание аулом» зыфиIорэ фильмыр блэкIыгъэ илъэсым къыдэкIыгъ. УнагъомкIэ узэхэсэу узэплъымэ хъущт IофшIагъ. Дэхьащхын шъуашэм илъ нахь мышIэми, непэ обществэм ыпа­шъхьэ ит зигъо Iофыгъохэр ащ къыщыIэтыгъэх. Фильмым ия 2-рэ Iахь игъэхьазырынкIэ Iоф­шIэнхэр джырэкIэ макIох.
НэкIубгъор зыгъэхьазырыгъэр
Анцокъо Ирин.