Урысые Федерацием и Президент ихэ­дзынхэм яапэрэ мафэ къызэтынэкIыгъ. Адыгеим щыпсэурэ нэбгырэ 121764-мэ амакъэ атыгъ. Ар хэдзакIоу атхыгъэхэм япроцент 35,65-рэ мэхъу.

Пчэдыжьым сыхьатыр 8-м хэдзыпIэ 268-мэ IофшIэныр аублагъ. Зэпыугъо имыIэу ахэм сыхьат 12-рэ Iоф ашIагъ. Адыге­имкIэ апэрэхэм ащыщэу АР-м и ЛIышъхьэу КъумпIыл Мурат хэ­дзынхэм ахэлэжьагъ.
Республикэм ипащэ Мые­къуапэ икIэлэцIыкIу IэзапIэ щы­зэхэщэгъэ хэдзыпIэу N 142-м кIуи, ымакъэ щитыгъ. Джащ фэдэу федеральнэ инспектор шъхьаIэу Сергей Дрокинымрэ АР-м и Апшъэрэ хьыкум итхьаматэу Шумэн Байзэтрэ мы хэ­дзыпIэм щыхэдагъэх.

АР-м хэдзынхэмкIэ и Гупчэ комиссие къызэритыгъэмкIэ, хэбзэукъоныгъэхэр амышIэу Адыгеим мэкъэтыныр щыра­гъэжьагъ. Ар зэрэкIорэм ренэу гъунэ лъафыщт. Кандидатхэм, УФ-мрэ АР-мрэ я Общественнэ палатэхэм ацIэкIэ хэдзынхэм ахэлэжьэнхэу лъыплъэкIо миным ехъу атхыгъ.
АР-м и Общественнэ палатэ общественнэ лъыплъэнымкIэ Гупчэ (ЦОН) щызэхащагъ. Мэкъэтыныр зэрэкIорэм гъунэ зэрэлъафыщт мониторхэр ащ чIагъэуцуагъэх. Игъом видеотехыныр рагъэжьагъ.
Адыгеим и ЛIышъхьэ къэбарлъыгъэIэс амалхэм яIофышIэхэм зэдэгущыIэгъу задешIым, УФ-м и Президент ихэдзын политическэ хъугъэ-шIэгъэшхоу зэрэщытыр къыхигъэщыгъ ыкIи рес­публикэм исхэм чаныгъэ къызхагъэфэнэу, хэдзыпIэ чIыпIэхэм якIолIэнхэшъ, амакъэ атынэу къяджагъ. КъумпIыл Мурат зэрэхигъэунэфыкIыгъэмкIэ, хэдзынхэр зырагъэжьэгъэ апэрэ мафэм ипчэдыжь Адыге­им ихэдзакIохэр чанэу хэдзыпIэхэм якIуалIэхэу рагъэ­жьагъ, чIыпIэ заулэмэ чэзыухэр ащыплъэгъущтыгъэх. Агу Iэтыгъэу, кIэлэцIыкIухэр ягъу­сэхэу, ащыщхэм лъэпкъ шъуа­шэхэр ащыгъхэу, анэгу зэIу­хыгъэу хэдзыпIэхэм цIыфхэр къя­кIуалIэх.
«ЦIыфхэм шъхьафитэу амакъэ атынымкIэ республикэм ищыкIэгъэ амалхэр щызэхащагъэх. Хэдзынхэр щынэгъончъэу, шъхьэихыгъэу кIонхэмкIэ пэшIорыгъэшъ Iофтхьэбзабэ зетхьагъ. Тиреспубликэ щыпсэурэ нэ­бгырабэмэ Президентым ихэ­дзынхэм уахэлэжьэным мэхьанэшхо зэриIэр къагурыIоу сэгугъэ. Тащыщ пэпчъ ымакъэ зыфитырэм елъытыгъэщт хэ­гъэгуми, республикэ гупсэми янеущрэ мафэ зыфэдэщтыр. Тикъэралыгъо тапэкIэ хэхъоныгъэ зэришIыщт лъэныкъор тэры къыхэзыхыщтыр. Сэ сымакъэ стыгъахэ, республикэм ис пстэуми сыкъяджэ мэкъэтыным хэлэжьэнхэмкIэ фитыныгъэу яIэр къызфагъэфедэнэу», — къы­Iуагъ КъумпIыл Мурат.

Чанэу
къекIолIагъэх
ЧIыпIэхэм Iоф ащызышIэ­щтыгъэ хэдзыпIэхэм ащыщыбэм чэзыухэр зэраIутыгъэхэм цIыф­хэр къэралыгъом къырыкIощтым хэлэжьэнхэу зэрэфаблэхэрэр къызэригъэлъагъорэр общест­веннэ лъыплъакIохэм къаIуагъ. ПсэупIэу Тульскэм ия 77-рэ хэдзыпIэ илъыплъакIохэм къызэрэхагъэщыгъэмкIэ, пчэды­жьым сыхьатыр 6-м къекIолIагъэхэри къахэкIыгъэх.
— ЦIыфхэр бэдэдэ мэхъух. ХэдзыпIэхэм ренэу зыгорэ ачIэтыгъ, хэдзакIохэр зэпымыоу къекIуалIэщтыгъэх. НэшIу-гушIухэу, ягуапэу амакъэ аты. Хъугъэ-шIэгъэ дэй зи дгъэу­нэфыгъэп, апэрэ мафэр тынчэу, дахэу рекIокIыгъ, — къытфиIотагъ я 77-рэ чIыпIэ хэ­дзыпIэм иобщественнэ лъыплъакIоу Елена Шабалинам.
УФ-м и Президент IэнатIэ техьанхэмкIэ кандидатиплIыми ялъыплъакIохэр хэдзыпIэхэм ачIэсых, ахэм яIофшIэн хэдзынхэм яятIонэрэ ыкIи ящэнэрэ мафэхэми паублэжьыщт.

Яунэхэм арысхэу
ХэдзыпIэхэу къызэIуахыгъэ­хэм ямыкIолIэшъущтхэм амал аратыгъ яунэхэм зэрарысхэу амакъэ атынэу. Мыхэм къахеу­бытэх сымаджэхэр, сэкъатныгъэ зиIэхэр, сымэджэ хьылъэ­хэм апэсхэр ыкIи нэмыкI ушъхьа­гъухэр зиIэхэр. Яунэхэм арысхэу зымакъэ зытыщтхэу лъэIу зиIэхэм ядэжь мэфэ реным афэкIуагъэх чIыпIэ хэдзыпIэ комиссиехэм ахэтхэр. Ахэм хэушъхьафыкIыгъэ къэмланхэу мыхъур зытедзагъэхэу зэдэ­гъэпкIагъэхэр аIыгъыгъэх.

Шъуиунэхэм шъуарысэу шъу­макъэ шъутын фаеу хъугъэмэ, шъузэпхыгъэ хэдзыпIэм шъутеу ыкIи Iофым изытет яшъуIу. ШъуиIахьылхэри, социальнэ Iо­фышIэу къышъопхыгъэхэри шъо шъуцIэкIэ афытеошъущтых.
Адыгеим
ынаIэ атетэу
УФ-м и Президент ихэдзынхэм яапэрэ мафэ зымакъэ зытыгъэхэм ащыщых респуб­ликэм ынаIэ зытет Геническэ районым щыпсэухэрэри. КъумпIыл Мурат и Телеграм-канал къызэрэщитхыгъэмкIэ, мы районым щыщ къошхэми мэфэкI шIыкIэм тетэу хэдзынхэр афызэхащагъэх.
— Президентым ихэдзынхэр къэралыгъом къыхэхьажьыгъэ шъолъырыкIэхэми ащэкIох. Геническэ районым щыпсэу­хэрэм Адыгеим икIыгъэ ар­тистхэм орэдхэр къафаIуагъ — нэбгырищ хъурэ купэу «Вечный огонь» зыфиIорэр ащ щыI. Хэдзынхэм къякIолIэгъэ пстэуми щэе стырыр, адыгэ къуаер, адыгэ шхыныгъохэу хьалыжъор, пэлкъаор апагъохы, — къыIотагъ ЛIышъхьэм.

МэфэкI шъыпкъэ афэхъугъ
Мыекъуапи хэдзынхэм яапэрэ мафэ мэфэкI шIыкIэкIэ щырекIокIыгъ. ГущыIэм пае, я 116-рэ мыекъопэ чIыпIэ хэдзын комиссием Масленицэм ишхыныгъо шъхьаIэу тхъужъэу­тэхэр щагощыгъэх. ХэдзыпIэхэм ащыщхэм Мыекъуапэ итворческэ купхэм къэгъэлъэгъонхэр къащатыгъэх.
Шъугу къэдгъэ­кIыжьын, гъэтхапэм и 16-м ыкIи и 17-м пчэдыжьым сыхьатыр 8-м къыщегъэжьагъэу пчыхьэм сыхьатыр 8-м нэс хэдзыпIэхэм Iоф ашIэщт.
Къэбарыр хэутыным
фэзыгъэхьазырыгъэр
Александра Балабась.