Анахь мэхьанэшхо зиIэ общественнэ-политическэ хъугъэ-шIэгъэшхохэм зыкIэ ащыщ непэ тихэгъэгу щыкIорэр. Ипшъэрылъ зэригъэцэкIэн фаемкIэ ар тащыщ пэпчъкIэ ушэтыпIэ ин хъущт. Урысые Федерацием и Президент ихэдзынхэм зэрахэлажьэхэрэм къыушыхьатыщт я Хэгъэгу къырыкIощтым зэригъэгумэкIыхэрэр, щыIакIэр нахьышIу ашIымэ зэрашIоигъор. Хэдзынхэм тызахэлажьэрэм ти Президентэу хъущтым Хэгъэгум инеущырэ мафэ зыфэдэщтыр къыгъэнэфэнымкIэ цыхьэ зэрэфэтшIырэр къэдгъэшъыпкъэжьыным.
Анахьэу къыдгурыIон фаер Урысыем и Президент ихэдзынхэр IэкIыб къэрал политикэмкIи, экономикэмкIи джэгъо­гъуныгъэ къызыщытфыряIэ лъэхъаным зэрэтефагъэр ары.
Хэгъэгум, шъуигупсэхэм, шъушъхьэ къарыкIощтым тэрэзэу шъуягупшыс! Нэбгырэ пэпчъ фитыныгъэ иI зыфаер къыхихынэу. Арышъ, ар къызфэжъугъэфед, тизыкIыныгъэрэ тизэгурыIоныгъэрэ къэжъугъэшъыпкъэжь.
ТичIыпIэгъу лъапIэхэр, Адыгэ Республикэм щыпсэурэ лъэпкъ зэфэшъхьафхэр зы унэгъо зэгурыIожьэу зэрэзэдэпсэу­хэрэм зэкIэми тырэгушхо.
Зэдытиунэ Урысыем мамырныгъэрэ щыIэкIэшIурэ илъынхэр тэркIэ пстэуми анахь лъапI.
ЛIымыщэкъо Рэмэзан.
Урысые общественнэ-къэралыгъо организа­циеу «Урысыем щыпсэурэ лъэпкъхэм я Ассамблее» и Адыгэ шъолъыр къутамэ итхьамат.