Хабзэ зэрэхъугъэу, АР-м шIэныгъэмрэ гъэсэныгъэмрэкIэ и Министерствэ Iофтхьэбзэ зэфэшъхьафхэр адыгабзэмрэ адыгэ тхыбзэмрэ я Мафэ ехъулIэу зэхещэх. Гъэтхапэм и 1-м къыщегъэжьагъэу и 31-м нэс кIэлэцIыкIу IыгъыпIэхэм къащегъэжьагъэу гурыт ыкIи апшъэрэ еджапIэхэм анэсыжьэу Iофтхьэбзэ зэфэшъхьафхэр ащыкIощтых: адыгабзэмкIэ ыкIи литературэмкIэ олимпиадэхэр, сочинениехэм ятхын, зэнэкъокъухэр, семинархэр, нэмыкIхэри.

Сэнэхьат IэпэIэсэныгъэм хэгъэхъогъэ­нымкIэ Адыгэ республикэ институтми Iофтхьэбзэ зэфэшъхьафхэр щызэхащэх. Ахэм ащыщ гъэтхапэм и 12-м къалэу Мыекъуапэ икIэлэцIыкIу IыгъыпIэу зи N 28-у «Нэбзый» зыфиIорэм зэIухыгъэ мастер-класс сыхьатхэу къыщатыгъэхэр. Ахэр янэрылъэгъугъэх шIэныгъэмрэ гъэсэныгъэмрэкIэ Министерствэм иIофышIэу Мамый Мариет, институтым ипащэу Тхьагъо Фатим, ащ игуадзэу Шорэ Жаннэ, кIэлэцIыкIу IыгъыпIэхэм адэлэжьэрэ методистэу Iэпэзэо Марин, Адыгэ Хасэм итхьаматэу ЛIымыщэкъо Рэмэзан, нэмыкIхэри. КIэлэцIыкIу Iыгъы­пIэу «Нэбзыим» икIэлэпIухэм апае мастер-класс къагъэлъэгъонэу къырагъэб­лэгъагъэх 2023-рэ илъэсым ныдэлъфыбзэмкIэ езыгъэджэрэ кIэлэегъаджэхэм ыкIи кIэлэпIухэм язэнэкъокъу хэлэжьагъэхэу ыкIи текIоныгъэ къыдэзыхыгъэ кIэлэпIоу ШъэоцIыкIу Фатимэрэ (Кощ­хьэблэ район, кIэлэцIыкIу IыгъыпIэу «Налмэсыр») ыкIи призер хъугъэ Гъонэ­жьыкъо Саидэрэ (Адыгэкъал, кIэлэцIыкIу IыгъыпIэу «Чебурашкэр»). Ахэр яIоф­шIакIэ къытегущыIэгъэ къодыехэп, нэрылъэгъоу къагъэлъэгъуагъ яIофшIэн зэрэкIорэм щыщ пычыгъохэр.

Непэ кIэлэцIыкIу IыгъыпIэм кIорэ сабыйхэм адыгэ гущыIэу агъэфедэрэр зэрэмакIэр хэткIи шъэфэп. НахьыбэрэмкIэ урысыбзэкIэ мэгущыIэх, мэгупшысэх. Джы ахэм Iоф адэпшIэныр IэшIэхэп, ау ежь кIэлэпIухэм яамали, якъулайи ра­хьылIагъэу кIэлэцIыкIухэм яжабзэ хахъо фашIыным дэлажьэх. Ар нэрылъэгъу къытфашIыгъ Саидэрэ Фатимэрэ.
Гъонэжьыкъо Саидэ исыхьат зыфэгъэхьыгъагъэр адыгэ Iанэр, адыгэ шхыныгъохэр, адыгэ Iэмэ-псымэхэр ары. Урыс пшысэу «Унэ цIыкIу» зыфиIорэр, джэгукIэу «Шыухэр» къаригъэшIыгъэх. ГущыIэжъхэмкIэ, хырыхыхьэхэмкIэ сыхьатыр баигъэ. Нарт эпосым игероеу «Пэтэрэз» ироль Хьахъукъо Тэйбатэ, Адыгэкъалэ икIэлэцIыкIу IыгъыпIэу N 4-у «Чебурашка» зыфиIорэм икIэлэпIу къа­ригъэшIыгъэм кIэлэцIыкIухэр лъэшэу ыгъэчэфыгъэх. Ахэм къафихьыгъэ джэголъэ зэфэшъхьафхэр къаригъэлъэгъугъэх, ацIэхэр къаригъэIожьыгъ.
ШъэоцIыкIу Фатимэ методикэ гъэнэфагъэ IэкIэлъэу кIэлэцIыкIухэр джэгуным хэтхэзэ цыхьэ къызфаригъэшIын ылъэ­кIыгъ. Ежь иусэ цIыкIоу зэхилъхьагъэм къешIэкIыгъэу, къулайныгъэ-IэпэIэсэныгъэу хэлъым къыпкъырыкIызэ, кIэлэцIыкIухэм къямыхьылъэкIэу усэр аригъэшIагъ. КIэлэцIыкIухэм «Кушъэхапхэр» къаригъэлъэгъугъ. Кушъэм Iэмэ-псымэу рахьылIэхэрэм нэIуасэ афишIыгъэх, IэпэIэсэныгъэ хэлъэу проекторыр ыгъэ­федагъ.
Мы кIэлэцIыкIу IыгъыпIэу мыщ фэдэ къэлъэгъон зыщырекIокIыгъэм ипащэр Гъыщ Сусан. Ащ илъэс пчъагъэ хъугъэу методикэ гъэнэфагъэ IэкIэлъэу кIэлэцIыкIу IыгъыпIэм Iоф щешIэ. «Нэбзыир» къалэм дэт кIэлэцIыкIу IыгъыпIэхэм ялъытыгъэмэ, анахь адыгэ купыбэ зиIэхэм ащыщ. КIэлэпIоу мыщ щылажьэхэрэм яIофшIагъэ къегъэлъагъо кIэлэцIыкIухэм жабзэу аIулъым. Мастер-класс къэзытыгъэ кIэлэпIухэу Саидэрэ Фатимэрэ яIэпэIэсэныгъи къэлъа­гъо ямынэIосэ кIэлэцIыкIухэм яжабзэ тIупщыгъэу къызэрагъэгущыIэшъугъэмкIэ.
КIэлэцIыкIухэм яжабзэ хэгъэхъогъэ­нымкIэ шIуагъэ къэзытыгъэ сыхьатых ыкIи щысэтехыпIэх ахэр. Мыщ фэдэ мастер-классхэр район зэфэшъхьафхэм якIэлэцIыкIу IыгъыпIэхэм нахьыбэрэ къащатымэ, шIогъэшхо къыхьынэу щыт.
Iофтхьабзэм икIэухым Адыгэ Хасэм и Щытхъу тхылъхэр аратыгъэх Гъонэжьыкъо Саидэ, ШъэоцIыкIу Фатимэ, Хьа­хъукъо Тэйбатэ.
КIэсэбэжъ Нэфсэт.
Сэнэхьат IэпэIэсэныгъэм хэгъэхъо­гъэнымкIэ институтым инаучнэ IофышI.