Дэеу зылъэгъурэ ыкIи хьафизэ бзылъфыгъэхэм язэнэкъокъоу «Незримая красота» зыфиIорэр бзылъфыгъэхэм я Дунэе мафэ ипэгъокIэу Волгоград щыкIуагъ.

Волгоград иныбжьыкIэ организациеу «Пламя» зыцIэр зикIэщэкIо зэнэкъо­къум Адыгеим икIыгъэ пшъэшъищ хэлэжьагъ. Ахэм анэмыкIэу илъэс 18-м къыщегъэ­жьагъэу 40-м нэс зыныбжь нэбгырэ 15 къекIолIагъ. Ахэр Астрахань, Волгоград, Ростов хэкухэм, Краснодар краим къа­рыкIыгъэх. Мы проектыр зыфэIоры­шIэрэр зипсауныгъэ амалхэр зэщыкъогъэ бзылъфыгъэхэр щыIэныгъэм хэгъэгъозэгъэнхэр, обществэм чIыпIэ гъэнэфагъэ ща­убытыныр ары.
Шъолъыр зэнэкъокъум къащыхэщыгъэ­хэ Юлия Цымбаловам, Алина Пристанскаям ыкIи Диана Зайцевам Адыгеир дахэу Волгоград къыщагъэлъэгъуагъ. Зэнэкъокъум ыпэкIэ пшъашъэхэм орэдкъэIоным, сценэм дахэу щызекIонхэм ыкIи къыщыгущыIэнхэм дэгъоу зафагъэ­хьазырыгъ.
Iофтхьабзэр мэфэкI шIыкIэм тетэу рекIокIыгъ. Волгоград техникумым щеджэрэ кIалэхэм Урысыем ошIэ-дэмышIэ IофхэмкIэ Министерствэм ишъуа­шэхэр ащыгъхэу гъэкIэрэкIэгъэ пшъашъэ­хэр сценэм къыдащэягъэх. Нэбгырэ пэпчъ къэзэрэугъоигъэхэм нэIуасэ зафашIыгъ. Такъикъ заулэм зэнэкъокъум хэлэжьэрэ пшъашъэхэм афэгъэхьыгъэ къэбар гъэшIэгъоныбэ жюрим рагъэшIэн алъэкIыгъ: сэнэхьатэу агъэцакIэрэр, тапэкIэ гухэлъышIоу зыдаIыгъхэр, агу рихьырэ шхыныгъохэр ыкIи гъэм иуахътэхэр псынкIэу, губзыгъэу къаIотагъэх.
Нэужым едзыгъоу зэрэзэтеутыгъэхэмкIэ Iофтхьабзэр лъагъэкIотагъ. Пстэуми ашIогъэшIэгъоныгъэр творческэ зэнэкъо­къур ары. Лъэныкъо пстэумкIи Адыгеим икIыгъэ лIыкIохэм ясэнаущыгъэ къагъэ­лъэгъуагъ.
Зэнэкъокъоу «Незримая красота» зыфиIорэм кIэух дахэ фэзышIыгъэр пчыхьэ джанэхэм якъэгъэлъэгъон ары. Шъо зэфэшъхьаф зиIэ джанэхэр зы­щыгъ пшъашъэхэр апкъ ищыгъэу, зэхэтхэу къырыкIуагъэх.
Мыщ фэдэ апэрэ зэнэкъокъоу Волгоград щыкIуагъэм текIоныгъэр къыщыдихыгъ Татьяна Степановам (Волгоград щыщ). Адыгеим икIыгъэ пшъашъэхэм щытхъуцIэхэр ыкIи дипломхэр къахьы­жьыгъэх: Юлия Цымбаловар — «Мисс Эрудиция», Диана Зайцевар — «Мисс Скромность», Алина Пристанскаяр ­— «Мисс Очарование» хъугъэх.
Типшъашъэхэм Адыгеир зэрифэшъуа­шэу, гъэшIэгъонэу, дахэу зэнэкъокъум къыщагъэлъэгъон, ныбджэгъушIухэр агъо­тынхэ ыкIи акIуачIэ къыхьын ылъэкIыщтыр зэрэбэр ашIошъ хъун алъэкIыгъ.
Алексей Хлоповыр.
Хьафизэхэм я Урысые обществэ ичIыпIэ организациеу Мыекъуапэ дэтым итхьамат.