Урысыем ичемпионат и Суперлигэ хэлэжьэрэ «АГУ-Адыифым» къалэу Ижевскэ щыриIэгъэ ешIэгъур къыхьыгъ, мы спорт лъэпкъыр зыгу рихьэу республикэм щыпсэухэрэр ыгъэгушIуагъэх.

«Университет» (Ижевск) — «АГУ-Адыиф» (Мые­къуапэ) — 20:26 (9:14).
Командэхэм ахэт ешIакIохэм якъэгъэлъэгъонхэм шъуащытэ­гъэ­гъуазэ:
«Университет»: Вахрушевар — 7, Бересневар — 4, Басанговар — 3, Низовцевар — 2, Жуковар — 1, Альшановар — 1, Минабутдиновар — 1, Шкляевар — 1.
«АГУ-Адыиф»: Миловар — 7, Кобл — 5, Болоба — 4, Терлецкаяр — 3, Краснокутскаяр — 2, Бондаренкэр — 2, Томилинар — 2, Кавера — 1.
ИлъэсипшIым ехъугъэу Мые­къуапэ икомандэ Ижевскэ текIоныгъэр къыщыдихын ылъэкIыгъэп. Мы зэIукIэгъур зырагъажьэм, апэ­рэ Iэгуаор къэлапчъэм дэзыдзагъэр бысымхэм яешIакIоу Карина Минабутдиновар ары. «АГУ-Адыифым» псынкIэу пчъагъэр зэфэдиз ышIыгъ, нэужым иешIакIэ ригъэхъугъ. Такъикъ заулэм къыкIоцI типшъашъэхэм зэлъыпытэу Iэгуар къэлапчъэм дадзагъ, пчъагъэр — 6:3. Нэужым Iэгоуи 8-кIэ бысымхэм апэ ишъы­гъэх. Такъикъи 9-рэ Ижевскэ игандболисткэхэм Iэгуаор къэлапчъэм дадзэн алъэкIыгъэп. Апэрэ таймыр 14:9-у Адыгеим илIыкIохэм къахьыгъ.

ЯтIонэрэ едзыгъоми тигандболисткэхэр нахь лъэшэу ешIагъэх. Мы уахътэм дэгъу дэдэу зыкъагъэлъэгъуагъ Кобл Зуретэ, Дарья Миловам ыкIи Ангелина Болоба. Мы пшъэшъищмэ Iэгоо 16 къэлапчъэм дадзагъ. Пчъагъэр 26:20-у зэIукIэгъур аухыгъ, тикомандэ текIоныгъэр къыдихыгъ.
— УхъумэнымкIэ пшъэ­рылъэу зыфэдгъэуцужьыгъэр зэрэдгъэцэкIагъэм лъэшэу сигъэрэзагъ. ЕшIэгъур етымыгъажьэзэ пшъашъэхэм ясIуагъэр зэкIэ къагурыIуагъ, къэлэпчъэIутхэри цыхьэшIэгъоу ешIагъэх, — къы­Iуагъ «АГУ-Адыифым» итренер шъхьаIэу Наталья Дерепаскэм.
Я 7-рэ турым изэфэхьысыжьхэр:
«Ростов-Дон» (Ростов-на-Дону) — «Лада» (Тольятти) — 33:22, «Черноморочка» (Новороссийск) — «ЦСКА» (Москва) — 28:25, «Кубань» (Краснодар) — «Астраханочка» (Астрахань) — 28:31, «Университет» (Ижевск) — «АГУ-Адыиф» (Мыекъуапэ) — 20:26, «Динамо-Синара» (Волгоград) — «Ставрополье» (Ставрополь) — 28:31, «Луч» (Москва) — «Звезда» (Звенигород) — 30:39.
Командэхэр зыдэщыт чIыпIэхэр ыкIи очко пчъа­гъэу рагъэкъугъэр:
Купэу «А-р»:

1. «Ростов-Дон» — 54.
2. «ЦСКА» — 45.
3. «Астраханочка» — 42.
4. «Лада» — 38.
5. «Черноморочка» — 36.
6. «Кубань» — 27.
   Купэу «Б-р»:
7. «Динамо-Синара» — 32.
8. «Звезда» — 31.
9. «Ставрополье» — 17.
10. «АГУ-Адыиф» — 16.
11. «Луч» — 6.
12. «Университет» — 4.
    Зичэзу ешIэгъур «АГУ-Адыифым» Мыекъуапэ щыриIэщт, гъэтхапэм и 20-м командэу «Динамо-Синара» зыфиIорэр тихьа­кIэщт. Зэнэкъокъум ипэшIоры­гъэшъ едзыгъо аухынымкIэ типшъашъэхэм ешIэгъуи 3 къафэнагъ.