НыбжьыкIэ парламентэу АР-м и Къэралыгъо Совет — Хасэм щызэхащагъэм изэIугъэкIэгъоу мы уахътэм Iоф зышIэрэм ипащ Эвелина Ананниковар. Ащ дакIоу ар «Сириусым» иадминистрацие хьыкум ухъумэнымкIэ иотдел щэлажьэ.

Эвелинэ Мыекъуапэ къыщыхъугъ, щапIугъ. Я 22-рэ гимназием ыуж народнэ хъызмэтымкIэ ыкIи къэралыгъо къулыкъумкIэ Урысые академиеу УФ-м и Президент дэжь къыщызэIуахыгъэм июридическэ факультет къыухыгъ.
Джыри студентыгъ исэнэхьат апэрэ лъэбэкъухэр щишIынхэу зырегъажьэм ыкIи пшъэшъэ чанэу, зипшъэрылъхэр гуетыныгъэ иIэу зыгъэцакIэхэрэр, шIэныгъэ дэгъу зыIэкIэлъэу зыкъэзыгъэлъэ­гъуагъэр къалэм ипрокуратурэ Iоф щишIэнэу рагъэблэгъагъ. Ащ прокурорым иобщественнэ IэпыIэгъоу зэрэщылэжьагъэм исэнэхьат хэгъозэнымкIэ амалышIу къыритыгъ. Ар Мыекъопэ къэлэ администрацием юристэу зыIохьэм къышъхьэпэжьыгъ, специалист къызэрыкIом щыригъажьи охътэ кIэкIым администрацием иправовой ГъэIорышIапIэ ипащэ игодзэ IэнатIэ нэсыгъ.
Адыгеим ипарламентаризмэ и Мафэ ипэгъокIэу Эвелинэ гущыIэгъу тыфэ­хъугъ.
— НыбжьыкIэ парламентым ухэхьанэу сыдэущтэу хъугъа?
— 2020-рэ илъэсым къыщегъэжьагъэу Урысые политическэ партиеу «Единэ Россием» сыхэт. Ащ игъэцэкIэкIо Комитет иунашъокIэ НыбжьыкIэ парламентым сыхэхьанэу сикандидатурэ къырагъэу­цуагъ. СисэнэхьаткIэ сылъыкIотэнымкIэ ащ джыри шIэныгъэ тедзэ къызэрэситыщтыр, ишIуагъэ къызэрэсэкIыщтыр къы­дэс­лъытэхи, сигуапэу ар сштагъэ.
— Ухэхьэгъэ закъоу щымытэу, НыбжьыкIэ парламентым урипащ. Сыда оркIэ а IэнатIэр?
— Хэбзэгъэуцугъэхэм ягъэпсын пшъэ­дэкIыжь ин зыхэлъ Iофэу сэлъытэ. Гущы­Iэм пае, ныбжьыкIэ ыкIи нэмыкI организациехэм зэпхыныгъэ адытиIэу Iоф адэтэшIэ. Ахэм яупчIэхэр, яIофыгъохэр къытахьылIэх. Цыхьэ къызэрэтфашIырэр ащ къеушыхьаты. Ар къэдгъэшъыпкъэ­жьын фае. Непэ зигъо зэфэхьысыжь пшIыным мэхьанэшхо иI. Щысэ къэсхьын. БлэкIыгъэ илъэсым Адыгэ къэралыгъо университетым иректорэу Мамый Даутэ студентхэм зэIукIэгъоу адыриIагъэм парламентым къыздыхэт сиIофшIэгъухэр сигъусэхэу тыхэлэжьэгъагъ. Стипендиехэр ары зигугъу тшIыгъагъэр. Тызэхэгущы­Iэжьзэ, уздэлэжьэн, бгъэкIэжьын зищыкIэгъэ Iофыгъоу ар зэрэщытыр нафэ къэхъугъ. НыбжьыкIэ политикэмкIэ ап­шъэрэ еджапIэм ипроректор тигъусэу зэдэтшIэгъэ IофшIэным ишIуагъэкIэ мыщ фэгъэхьыгъэ хэбзэгъэуцугъэм зэхъокIыныгъэхэр фэшIыгъэнхэу предложение дгъэхьазырынышъ, НыбжьыкIэ парламентэу УФ-м и Къэралыгъо Думэ щызэхащагъэм дгъэхьын тлъэкIыгъ.

— Мыщ лъыпыдзагъэу НыбжьыкIэ парламентэу узипащэм иIофшIэн укъыте­гущыIэгъа­гъэмэ дэгъугъэ. О уишIошIыкIэ, сыда ащ имэхьанэ?
— Хэбзэгъэуцугъэхэм афэшIыгъэн фэе зэхъокIыныгъэу тлъытэхэрэм ягъэхьазырын тыдэлажьэ. ЗаконихъухьанымкIэ кIэщакIо зыгорэм фэхъурэп НыбжьыкIэ парламентыр. Предложениехэр егъэхьазырхэшъ, Къэралыгъо Советым — Хасэм фегъэхьых. Ахэм къапкъырыкIыгъэ правовой актэу зэхагъэуцуагъэм тиIофшIэн шIуагъэ къызэритырэр къеушыхьаты.
АщкIэ лъэбэкъушIухэр тшIыгъэх. ТизэIугъэкIэгъу илъэситIу нахьыбэ мыхъугъэми Iоф зишIэрэр, Къэралыгъо Советым — Хасэми, НыбжьыкIэ парламентэу УФ-м и Къэралыгъо Думэ щызэхащагъэми зигъо тлъэгъурэ Iофхэм япхыгъэу мымакIэу афэдгъэхьыгъ. Ахэр ныбжьыкIэ политикэм имызакъоу, унэгъо ныбжьыкIэхэм чIыгу Iахьхэр ятыгъэнхэм къыщегъэжьагъэу стипендиехэм анэсыжьэу япхыгъэх.
НыбжьыкIэ парламентым ныбжьыкIэхэмрэ хабзэмрэ зэрепхых, хэбзэихъу­хьан IофшIэным хэпчын умылъэкIыщт Iахьэу щыт. Iофыгъор дэгъэзыжьыгъэ зэрэхъущт хэкIыпIэхэм якъэгъотынкIэ ныбжьыкIэ нэ чанхэм яшIогъэшхо къэкIо.
— Эвелина, хэбзэихъухьан Iоф­шIэныр тапэкIи лъыбгъэкIотэн гухэлъ уиIа?
— Депутат мандатыр зэнэкъокъу шIыкIэм тетэу, хэдзынхэм уахэлажьэзэ къызэрэдэпхыщтыр зэкIэми къыдгурэIо. Ащ фэдэ опыт тIэкIу зэрэсиIэри мыщ дэжьым къыщыхэзгъэщымэ сшIоигъу. 2023-рэ илъэсым «Единэ Россием» илIыкIо нэбгырищмэ сахэтэу зыкI хэдзы­пIэ округым икандидатэу сахэлэжьэ­гъагъ. Шъыпкъэу пIощтмэ, юрист Iофэу згъэцакIэрэмкIэ ар къысшъхьэпэщт, арышъ, тапэкIэ хэдзынхэм сахэлэжьэнэуи хъун ылъэкIыщт.
— Адыгеим ипарламентаризмэ и МафэкIэ уиIофшIэгъухэм сыд къяпIощт?
— Къиныгъоу апэ къикIыхэрэр къызэпачышъунхэу сиIофшIэгъухэм сафэлъа­Iо! Тиреспубликэ цIыкIурэ тикъэралыгъо­рэ хэхъоныгъэхэр ашIынхэу, щыIэкIэшIу арылъынэу, парламентаризмэм, цIыфхэм хэбзэгъэуцу ыкIи гъэцэкIэкIо хабзэм цыхьэ зэрафашIырэм акIуачIэ зэпстэумэ атекIонэу афэсэIо!
ХЪУТ Нэфсэт.
Сурэтхэр: Эвелина Ананниковам ихъарзынэщ.