Федеральнэ проектэу «Iэрыфэгъу къэлэ щыIа­кIэ гъэпсыгъэныр» зыфиIорэм къыдыхэлъытагъэу зэтырагъэпсы­хьащт чIыпIэхэм якъы­хэхынкIэ мэкъэтынэу ­гъэтхэпэ мазэм и 15-м рагъэжьэщтым гуфакIохэр зэрэхэлэжьэщтхэр АР-м ныбжьыкIэ ­IофхэмкIэ и Комитет тыгъуасэ къыщаIотагъ.

Къалэу Мыекъуапэ, поселкэхэу Инэм, Яблоновскэм ячIыпIэхэм ащыщхэр агъэ­кIэжьыщтых. Адыгеим икъэлэ шъхьаIэ исаугъэт зэхэтэу «Памяти павших» зыфиIорэр, Лениным ыцIэ зыхьырэ площадыр ыкIи Свято-Успенскэ чылысым къыпэIулъ чIыпIэр зэнэкъокъум хэлэжьэнхэу къырагъэуцуагъэх.
Поселкэу Яблоновскэм иурамэу Кочубей ыцIэ зы­хьырэм тет спорт площадкэр, урамэу Космическэм общественнэ чIыпIэу иIэр, мы урам дэдэм тет кIэлэцIыкIу спортплощадкэр ары къы­хахыгъэхэр.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм иурамэу Крестьянскэм тет площадыр, къуаджэу БжыхьэкъоякIэм культурэм и Унэ къыпэIулъ чIыпIэр ары цIыфхэм амакъэхэр зыфатыщтхэр.
— УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ишIуагъэкIэ мыщ фэдэ амалхэр тиIэ хъугъэ. Илъэс къэс зымакъэ зытыхэрэм япчъагъэ нахьыбэ мэхъу. Тигуапэ цIыфхэм ащ фэдэу чаныгъэ къызэрэзыхагъафэрэр, — къыIуагъ АР-м и ЛIышъхьэу КъумпIыл Мурат. — Об­щественнэ чIыпIэу нахьыбэу макъэхэр зыфатыхэрэр къэкIощт 2025-рэ илъэсым зэтедгъэ­псыхьащтых.

Арышъ, респуб­ли­кэм щыпсэухэрэр мыщ хэлэжьэнхэу сыкъяджэ. АР-м ныбжьыкIэ IофхэмкIэ и Комитет къызэрэщаIуагъэмкIэ, цIыфхэр мэкъэтынхэм ахэлэжьэнхэмкIэ гуфакIохэр IэпыIэгъу афэхъущтых. Урамым тетхэу смартфонхэр агъэфедэхэзэ ахэр цIыфхэм адеIэщтых. Илъэс 14 — 35-рэ зы­ныбжь ныбжьыкIэхэу нэбгырэ 334-рэ пстэумкIи агъэхьазырыгъ. Ахэм сменитIоу Iоф ашIэщт. Апэрэр сыхьатыр 8-м къыщегъэжьагъэу 12-м нэс, ятIонэрэр сыхьатыр 12-м къыщегъэжьагъэу 5-м нэс. Зы мафэм нэбгырэ 84-мэ Iоф ашIэщт. Комитетым илIыкIохэм къызэраIуа­гъэмкIэ, гуфакIохэр щыгъынэу ащыгъхэм­кIэ къахэщыщтых. Кофтэхэм, футболкэ­хэм, ашъхьэ тесыщт паIохэм «Делаем город комфортней» атетхэгъэщт. Телефон приложениеу ахэм агъэфедэщтым такъи­къитIу нахьыбэрэ пэмылъхэу цIыфэу зэкIолIагъэхэм амакъэ рагъэтыщт. Мыщ фэдэ шIыкIэм имызакъоу, къэра­лыгъо фэIо-фашIэхэм япортал бгъэфедэзэ умакъэ птын плъэкIыщт. Ащ ищыкIэгъэ ссылкэр гуфакIохэм къыуатыщт. Шъугу къэдгъэкIыжьын, «ПсэупIэр ыкIи къэлэ щыIакIэр» зыфиIорэм къыды­хэлъытагъэхэм япхырыщын пае аштагъ федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэр. Ащ ишIуагъэкIэ 2017-рэ илъэсым къыщыублагъэу 2023-м нэс Адыгеим чIыпIэ 322-рэ щызэтырагъэпсыхьажьыгъ. Ахэм ащыщэу 216-р фэтэрыбэу зэхэт унэхэм ящагух, 106-р — общественнэ чIыпIэх.
ХЪУТ Нэфсэт.