Социальнэ мэхьанэ зиIэ продукцием, мыщ дэжьым хьа­лыгъум, икъыдэгъэкIын пылъхэм яIофшIэн мэхьанэшхо иI. Ар къыдыхэлъытагъэу къэралыгъоми IэпыIэгъу арегъэкIы.

НыбжьыкIэу чылэм адэсхэу лэжьэн гухэлъ зиIэхэм шIыкIэ-­амалхэр зэрэзэрагъэгъотыщтхэм щэч хэлъэп. Къуаджэм удэс зыхъукIэ, е мэкъу-мэщым, е пIэ къихьэрэ IофшIэным уафэгъэзагъэу улэжьэн фае.
Хьалыгъум ыкIи хьаджыгъэм хэшIыкIыгъэ гъомылапхъэхэм якъыдэгъэкIын пылъ хъызмэтшIапIэу къуаджэу Мамхыгъэ дэтыр Хьагъундэкъо Азэмат егъэлажьэ.
— Апшъэрэ еджапIэр къызысэухым, зэзгъэгъотыгъэ сэнэхьатыр къызфэзгъэфедэзэ районым ит лэжьапIэмэ саIутыгъ. Нэужым тиунагъокIэ зыгорэ тшIэ тшIоигъо хъугъэ ыкIи хьалыгъугъэжъэным сишъхьэ­гъусэрэ сэрырэ тыфежьагъ, — еIо Азэмат. — АпэрэмкIэ хэзгъэунэфыкIы сшIоигъу къэралыгъо IэпыIэгъур къызэрэтшъхьэпагъэр. Тхылъэу ищыкIагъэхэм ягъэпсыни Iофыбэ къыпыкIыгъэп, мэкъу­мэщ хъызмэтымкIэ район гъэIорышIапIэм испециалистхэр къыддеIагъэх. Программэм ухэлэжьэным пае ахъщэу ищыкIагъэм ипроцент гъэнэфагъэ ори пIэкIэлъын
фае. Арышъ, ар зэIубгъэкIэ­шъумэ, ухэлэжьэн фаеу сэ­лъытэ. Ахъщэу къытфэкIуа­гъэмрэ тэ тиIагъэмрэ зэхэд­гъахъохи, хьалыгъугъэжъапIэм ищыкIагъэхэр къэтщэфыгъэх.
Тэ тимылъку закъокIэ а зэ­пстэур зэдгъэгъотыным охътабэ ыхьыщтыгъ. Тищагу щапIэу къыщызэIутхы­гъэм ыкIи нэмыкI чIыпIэхэм хьалыгъур ащы­тэщэ.
Хьалыгъугъэжъэным ишъэф­хэр зэдгъэшIэнэу Азэмат ишъхьэ­гъусэу Бэлэ гущыIэгъу тыфэхъугъ.
— Унэгъо хьалыгъум иIэ­шIугъэ зыми хэкIокIэщтэп. Хме­лыр тэр-тэрэу къэтэугъои, тэгъэгъу, лъэтэныри тэшIы. Мам­хыгъэ хьалыгъугъэжъэ Iазэу дэсхэр упчIэжьэгъу тшIыгъэх, лъэныкъо шъэфэу иIэхэр къытфаIотагъ. Набэкъомэ яныожъ хмель гъэчэрэгъугъэр къыщытщэфыщтыгъ, ащ ыужкIэ тэри ащ ишIыкIэ къызIэкIэд­гъэхьагъ. Къэралыгъо IэпыIэ­гъум ишIуагъэкIэ хьалыгъугъа­жъэмэ ясатыр пытэу тыхэу­цуагъ. Гъунэгъу чылэхэм, къутырхэм къарыкIхэзэ, анахьэу нэжъ-Iужъхэу унэгъо хьалыгъум есагъэхэм ащэфы. ЩэфакIо пэпчъ тэгъэлъапIэ, къызэрэтщыгугъыхэрэр къэдгъэшъыпкъэ­жьыным тыпылъ, — еIо Бэлэ.
Бэлэрэ Азэматрэ унэгъо дахэ зэдашIагъ, пшъэшъиплI зэдапIу. Заринэрэ Аминэтрэ апшъэрэ еджапIэм щеджэх, АКъУ-м щызэхащэгъэ адыгэ къэшъокIо купым хэтых, адыгэ шхынхэр аупщэрыхьыныр якIас. Саидэрэ Гупсанэрэ Мамхыгъэ еджапIэм макIох, дэгъоу еджэх. Унагъом изехьан, хьалыгъур зэрэбгъэ­жъэщтыр пшъашъэхэм зэрагъа­шIэ, янэ-ятэхэм адеIэх.
Хьаджыгъэм хэшIыкIыгъэ гъомылапхъэхэм ауасэ дэмыкIоеным фэшI хьалыгъугъажъэ­хэм Iофыгъуабэ зэшIуахы. Коц хьаджыгъэм ыуасэ зэрэ­лъапIэм емылъытыгъэу, уасэхэр зыпкъ итыным пылъых.
Шъугу къэдгъэкIыжьын, Азэмат зыхэлэжьэгъэ программэр УФ-м и Президентэу Владимир Путиныр кIэщакIо зыфэхъугъэ лъэпкъ проектэу «Бизнес цIыкIур ыкIи гурытыр, предпри­нимательхэр кIэщакIо зыфэ­хъугъэхэм япхырыщынкIэ аде­Iэгъэныр» зыфиIорэм къыдыхэ­лъытагъэхэм ащыщ.
Лъэпшъыкъо Фатим.