Адыгабзэмрэ тхыбзэмрэ я Ма­фэ фэгъэхьыгъэ зэхахьэ Адыгеим иобщественнэ движениеу «Адыгэ Хасэмрэ» АР-м культурэмкIэ и Министерствэрэ зэкIыгъухэу Мыекъуапэ щырагъэкIокIыгъ.

Общественнэ IофышIэхэр, къэлэдэс­хэр, районхэм къарыкIыгъэхэр, анахь шъхьаIэр бзэм инеущ зэлъытыгъэ ныбжьыкIэхэр ащ къекIолIагъэх. Къэзэрэугъоигъэхэм мэфэкIымкIэ къафэгушIагъ Адыгэ Хасэм итхьаматэу ЛIымыщэкъо Рэмэзан.
— МэфэкIымкIэ сышъуфэгушIо. Ащ къыдыхэлъытэгъэ Iофтхьабзэхэр къалэм ичIыпIэ зэфэшъхьафхэм мы уахътэм ащэкIох. Ащ нэмыкIэу мы тхьамафэм къыкIоцI республикэм икъэлэ шъхьаIэ имызакъоу, районхэми зэхэсыгъохэр, конференциехэр, Iэнэ хъураехэр ащырекIокIыгъэх. АщкIэ ахэм зэкIэми та­фэраз. Тыбзэ игугъу тшIынымкIэ, ныбжьыкIэхэм зэхядгъэхынымкIэ а зэкIэри зы амалышIу, — къыIуагъ ЛIымыщэкъо Рэмэзан.
Пчыхьэзэхахьэм усэхэр, орэдхэр адыга­бзэкIэ щыIугъэх, къашъохэр къа­шIыгъэх. Адыгэ Къэралыгъо телерадиокомпанием иIофышIэ куп ясабыйхэр ягъусэхэу ащ къеблэгъагъэх, адыгэ IурыIупчъэхэр къаIуагъэх.
ХьакIэмыз Сусан —
АР-м изаслуженнэ журналист, КъТРК-у «Адыгеим» радиомкIэ икъулыкъу ипащ:
— Джащ фэдэу тилъфыгъэхэр тигъусэу адыгабзэр дгъэIу тшIоигъуагъ. Ахэтых тисабыйхэм псэолъэшIхэри, врачхэри, кIэлэеджакIохэри, нэмыкIхэри. Сыд фэдэ сэнэхьат фэгъэзагъэхэми, ахэм адыгабзэр ащымыгъупшэу орэпсэух.
ТIэшъу Светлан — АР-м изаслуженнэ журналист, КъТРК-у «Адыгеим» иIофышI:
— Унагъом и Илъэсэу зэрэщытым елъытыгъэу мыщ фэдэу унэгъо-унагъоу тыкъэкIуагъ. Адыгабзэм тырэлажьэ, тэгъэбаи. Тэ къыткIэхъухьэрэ ныбжьыкIэхэм ныдэлъфыбзэр зэраIутлъхьагъэр къэдгъэлъэгъонышъ, ар щысэ хъунэу тыфэягъ.
Джащ фэдэу Шэуджэн, Красногвардейскэ районхэм къарыкIыгъэ творческэ купхэм, АР-м искусствэхэмкIэ иколле­джэу Тхьабысымэ Умар ыцIэ зыхьырэм иеджакIохэм, республикэм иартистхэм зэхахьэр къагъэдэхагъ. Iэгутеуабэр къа­лэжьыгъ анахь цIыкIухэу мэфэкIым хэ­лэжьэгъэхэ Мерэм зэшыпхъухэу Залинэрэ Ясминэрэ. Ахэр адыгабзэкIэ IупкIэу усэхэм къяджагъэх ыкIи Адыгэ Хасэм ищытхъу тхылъхэмрэ шIухьафтынхэмрэ афагъэшъошагъэх.
Анцокъо Ирин.