Адыгеим и ЛIышъхьэу КъумпIыл Мурат АР-м и Правительствэ зычIэт унэм унэгъо ныбжьыкIэхэм зыщыпсэущтхэ унэхэр къызIэкIа­гъэхьанхэм пае сертификатхэр щаритыжьыгъэх. Республикэм икъэлэ ыкIи ирайон зэфэшъхьафхэм яунэгъуи 9-мэ сертификатхэр яIэ хъугъэ.

Адыгеим и ЛIышъхьэ къызэрэхигъэщыгъэмкIэ, къэралыгъо хэбзэ къулыкъухэм яIофшIэн чIыпIэшхо щеубыты унагъохэм ягъэпытэн. Ащ пае республикэм Iофтхьэбзэ гъэнэфагъэхэр щызэрахьэх нымрэ кIэлэцIыкIу­хэмрэ якъэухъумэнкIэ, сабыеу къэхъухэрэр нахьыбэ хъунымкIэ. Унагъом и Илъэс тегъэпсыхьагъэу УФ-м и Президент ыштэгъэ унашъохэм яшIуагъэкIэ а Iоф­тхьабзэхэм джыри нахь зарагъэушъомбгъущт.
«Урысые Федерацием и Президентэу Владимир Путиным къызэрэхигъэщыгъэмкIэ, «унагъор — къэралыгъомрэ обществэмрэ алъэпсэ къодыеу щы­тэп, ар гушъхьэлэжьынымкIэ, цIыфыгъэ шэпхъэ дахэхэр зе­хьэгъэнхэмкIэ лъэпсэ пытэу щыт». Тэри республикэм амалэу щыIэр зэкIэ щытэгъэфедэ унагъом, ным ыкIи кIэлэцIыкIухэм къэралыгъо IэпыIэгъу ятыгъэнымкIэ, унагъо пэпчъ щыIэкIэ Iэры­фэгъу иIэу, ицыхьэ зыте­лъыжьэу къэкIощт уахътэм пэплъэнымкIэ», — къыхигъэщыгъ КъумпIыл Мурат.
АР-м и ЛIышъхьэ къызэри­IуагъэмкIэ, анахь зигъо ыкIи шIуагъэ къэзытырэ Iофтхьа­бзэхэм ащыщ унэгъо ныбжьыкIэхэм зычIэсыщтхэ унэхэр ягъэгъотыгъэнхэм фэгъэхьыгъэ къэралыгъо программэр. Илъэс къэс ащ епхыгъэ Iофыгъохэр зэшIуахых. 2024-рэ илъэсым сомэ миллион 226,5-рэ ащ пае къыхагъэкIыщт, унэгъо ныбжьыкIи 103-мэ псэукIэ амалэу яIэхэр нахьышIу шIыгъэнымкIэ IэпыIэгъушIу ар хъущт. Ахэм ащыщэу унэгъуи 9-мэ мы лъэ­хъэнэ анахь благъэхэм зычIэсыщтхэ унэм иIофыгъо зэ­шIуахын алъэкIыщт. Адыгеим и ЛIышъхьэ ахэм сертификатхэмрэ унэчIэхьажьым ехъулIэу телевизорхэмрэ шIухьафтынэу аритыгъ.
А гушIогъо хъугъэ-шIагъэм пае къафэгушIозэ, КъумпIыл Мурат унэгъо ныбжьыкIэхэм гухэлъэу яIэхэм защигъэгъо­загъ, социальнэ проектхэм, грант программэхэм ахэлэ­жьэнхэ мурад яIэмэ зэригъэшIагъ. ЗэIукIэгъум хэлажьэхэрэм къа­Iуагъ кIэлэцIыкIухэр зэрыс унагъохэм республикэм и ЛIышъхьэ ынаIэ къызэратыригъэтырэм пае зэрэфэразэ-хэр, джащ фэдэу республикэм, муниципалитет пстэуми зэхъо­кIыныгъэ инхэр зэрафэхъухэрэр ахэм къыхагъэщыгъ. КъумпIыл Мурат унагъо пэпчъ кIэлэцIыкIоу щапIурэр нахьыбэ ашIынэу афэ­лъэIуагъ, сабыибэ зэрыс унагъохэм IэпыIэгъу ятыгъэным пае Iофтхьабзэу зэрахьащтхэм афэгъэхьыгъэуи къафиIотагъ. Ахэм япчъагъэ республикэм на­хьыбэ щэхъу зэпыт. Ащ дакIоу Адыгеим ихэхъоныгъэкIэ тапэкIи зэшIуахынхэу щытхэм ар къатегущыIагъ.
«Непэрэ хъугъэ-шIагъэм, Iо хэлъэп, цIыфхэм ящыIакIэ на­хьышIу хъунымкIэ ишIуагъэ къэ­кIощт, унагъохэм кIэлэцIыкIухэм япчъагъэ нахьыбэ ашIынымкIи амалыкIэхэр къытыщтых. Унэгъо ныбжьыкIэхэм IэпыIэгъу ятыгъэным, зычIэсыщтхэ унэхэм яшIын нахь зегъэушъомбгъугъэ­ным апае тфэлъэкIыщтыр зэкIэ тапэкIи тшIэщт. Джащ фэдэу мэхьанэшхо зиIэхэм ащыщ гу­IэтыпIэу щыт псэупIэхэр цIыф­хэм яIэ шIыгъэныр». — къы­Iуагъ КъумпIыл Мурат.
ЦIыфхэр зычIэсыщтхэ унэхэр шIыгъэнхэмкIэ республикэм амалэу иIэхэм афэгъэхьыгъэу Адыгеим ЛIышъхьэ къыIотагъ. Илъэсэу икIыгъэм псэупIэ квад­рат метрэ мин 570-рэ атыгъ. НепэкIэ нэбгырэ пэпчъ тефэрэр квадрат метрэ 1,13-рэ. Мыщ дэжьым къэIогъэн фае: чIыпIэхэм зэхэубытагъэу, зэдиштэу хэхъоныгъэ афэхъу зыхъукIэ ары псэолъэшIыным епхыгъэ проектыкIэхэм ягугъу тшIын зытлъэкIыщтыр. ПсэолъэшIынымкIэ джырэ уахътэм диштэрэ технологиехэр гъэфедэгъэнхэ, социальнэ, инженер ыкIи транспорт инфраструктурэр гъэпсыгъэнхэ фае. Илъэсэу икIыгъэм къыщегъэжьагъэу ащ фэдэ проектитф Адыгеим ублагъэ щыхъугъ: къалэу Мыекъуапэ зэтегъэпсыхьэгъэ микрорайонищ кIэу къыдэтэджэщт, Тэ­хъутэмыкъое районымкIэ псэу­пIэхэу Яблоновскэмрэ АдыгеякIэмрэ ащ фэдэу тIу ащагъэ­псыщт. Проектхэм атегъэпсы­хьагъэу фэтэрыбэу зэхэт унэхэм цIыфхэр зыщыпсэущт квадрат метрэ миллион фэдиз ахэтынэу агъэнэфагъ.
АР-м и ЛIышъхьэ ипресс-къулыкъу