Партиеу «Единэ Россиер» кIэщакIо зэрэфэхъугъэм тетэу, Урысыем хэхъоныгъэ егъэшIыгъэнымкIэ, лъэпкъ, унэгъо ха­бзэхэм, культурэ шIуагъэхэм якъэухъумэнкIэ къэралыгъо политикэу пхыращырэм зэрэдырагъаштэрэр къызыщынэфэгъэ форум-концертхэу «Лъэпкъхэм языкIыныгъ» зыфиIохэрэр
ти­хэгъэгу ишъолъыр пстэуми ащыкIуагъэх.

АдыгеимкIэ мыщ фэдэ Iофтхьабзэу АР-м и Къэралыгъо филармоние щызэхащагъэм нэбгырэ миным ехъу хэлэ­жьагъ. Ахэр общественнэ движениехэм, патриотическэ организациехэм ялIыкIохэр, хэушъхьафыкIыгъэ дзэ операцием иветеранхэр, гуфакIохэр ыкIи нэ­мыкIхэр ары.
Форумым патриотическэ орэдхэр къыщаIуагъэх, къалэмрэ республикэмрэ ятворческэ коллектив пэрытхэм зы­къыщагъэлъэгъуагъ.
Тиджырэ лъэхъан обществэм изыкIыныгъэ игъэпытэн мэхьанэшхо зэриIэр, хэушъхьафыкIыгъэ дзэ операцием хэлажьэхэрэм, тидзэкIолIхэм яунагъохэм IэпыIэгъоу аратырэм, къохьэпIэ къэралыгъохэу Урысыер нахь хъыбэй зышIы зышIоигъохэм апэуцужьын зылъэкIыщтхэр зыч-зыпчэгъоу зэкъот лъэпкъхэр арэу зэрэщытыр Iофтхьабзэм хэла­жьэхэрэм къаIуагъ.
«КъохьэпIэ къэралыгъохэм джэгъо­гъуныгъэ къызыщыддыряIэ, санкциехэмкIэ къызыщыттеIункIэхэрэ, тиэкономикэ къырагъэIыхынэу, дзэхэм амалэу яIэхэм къакIырагъэчынэу, къэралыгъо кIоцI Iофхэр зэщагъэкъонэу зыщыпыхьэхэрэ тихэгъэгу къафызэкIакIорэп. Ары пакIопышъ, Урысыем ис цIыф лъэпкъхэм язэкъотныгъэ непэ нахь пытэ хъугъэ, ти Хэгъэгу ифедэхэм якъэухъумэнкIэ Урысыем ипащэхэм гъогоу пхыращырэм ахэм дырагъ=аштэ. Къэлэшхо пстэуми ащыкIогъэ форум-концертхэм цIыфыбэ зэрахэлэжьагъэм тиобществэ изыкIыныгъэ зэрэпытэр джыри зэ къыушыхьатыгъ. Хэгъэгум и Президент ихэдзынэу къэралыгъом тапэкIэ хэхъоныгъэ зэри­шIыщт лъэныкъохэр къэзыгъэнэфэщтыр мэфэ заулэкIэ щыIэщт. А хъугъэ-шIа­гъэм дунэе мэхьанэ иI. Республикэм исхэм загъэчанынэу ыкIи мэкъэтыным хэлэ­жьэнхэу сыкъяджэ!» — къыIуагъ Адыге­им и ЛIышъхьэу КъумпIыл Мурат.
«Лъэпкъхэм языкIыныгъ» зыфиIорэ форум-концертхэу шъолъырхэм ащы-
кIуа­гъэхэм нэбгырэ мин 200-м ехъу ахэлэжьагъ.