Урысыем иуголовнэ-гъэцэкIэкIо системэ иIофышIэ и Мафэрэ мы системэр зызэхащагъэр илъэси 145-рэ зэрэхъурэмрэ афэгъэ­хьы­гъэ игъэкIотыгъэ зэIукIэ АР-м и ЛIышъхьэ и Координационнэ гупчэ щыкIуагъ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, феде­ральнэ инспектор шъхьаIэу Сергей Дрокиныр, пщыныжь ягъэхьыгъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ ипащэу Виталий Перхорович, АР-м иминистрэхэм я Кабинет хэтхэр, хэбзэухъумэкIо, федеральнэ, республикэ къулыкъухэм япащэхэр, дин пащэхэр.
Пщыныжь ягъэхьыгъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ Iофэу ышIагъэм фэгъэхьыгъэ видеороликыр зэIукIэм хэла­жьэхэрэм къафагъэлъэгъуагъ, Урысыем и ФСИН ипащэу Ар­кадий Гостевыр видео амалкIэ ахэм къафэгушIуагъ.
Адыгеим и ЛIышъхьэ зэIукIэм хэлажьэхэрэм шIуфэс къарихи, якъулыкъу тарихъ гъогушхо къызэрикIугъэр, хабзэр зыу­къуа­гъэхэу зэрэмысэхэр зыдэзышIэ­жьыгъэхэр щыIэныгъэм хэгъэгъозэгъэнхэм ащ иIофы­шIэхэм яIахь зэрэхашIыхьэрэр къы­Iуагъ.
«ЛъэныкъуабэхэмкIэ Iоф зэ­рэзэдатшIэрэр, хьапс зыты­ралъхьагъэхэм Iоф ягъэшIэгъэнымкIэ ыкIи заказыкIэхэм якъэгъотынкIэ зэдэлэжьэныгъэ зэрэзэдытиIэр хэгъэунэфыкIыгъэн фае. 2023-рэ илъэсым тизэдэлэжьэныгъэ ишIуагъэкIэ УФСИН-м иучреждениехэм продукцие лъэпкъыкIэ 13 къыдагъэкIы хъугъэ. Сомэ миллион 70-рэ мин 400-рэ зыосэ продукцие ахэм къыдагъэкIыгъ», — къыIуагъ КъумпIыл Мурат.
Республикэм ипащэ зэIукIэм хэлажьэхэрэм анаIэ тырари­гъэдзагъ хьапсдэсхэм атегъэпсы­хьэгъэ гупчэ Джэджэ районым ищэ завод къызэрэщызэIуахыщтым. Урысыем и Президентэу Владимир Путиным иунашъокIэ ащ фэдэ гупчэхэр шъолъырхэм къазэращызэIуахыхэрэр ЛIышъхьэм къыхигъэщыгъ. Ащ фэдэ гупчэ Кощхьэблэ районми ­итыщт. Республикэм ипредприя­тиехэу хэушъхьафыкIыгъэ чIыпIэхэр зэхэзыщэным фэхьа­зырхэм предложение гъэнэфа­гъэхэр къахьых. Ахэр Джэджэ, Красногвардейскэ, Кощхьэблэ, Мыекъопэ районхэм ащагъэ­псынхэ алъэкIыщт.
Республикэм и ЛIышъхьэ зэ­рэхигъэунэфыкIыгъэмкIэ, пщы­ныжь языгъэхьырэ гупчэхэм язе­гъэушъомбгъункIэ хэбзэ къулыкъухэмрэ УФСИН-мрэ зэ­дагъэцэкIэрэ Iофыр эконо­ми­кэ, гуманитар проектэу хъущт.
Колониехэм ащызэхэщэгъэ профучилищхэм яIофшIэн къытегущыIэзэ, хьапсдэсхэм рабочэ сэнэхьатхэр аIэ къырагъэхьанхэм мэхьанэшхо зэриIэр КъумпIыл Мурат къыхигъэщыгъ. Мыгъэ ащ фэдэ сэнэхьат 13 ахэм аIэ къырагъэхьащт.
Хьапсдэсхэм пIуныгъэ, социальнэ, психологическэ Iофэу адызэрахьэрэм нахьыбэу шIуагъэ къегъэтыгъэн, правэм ылъэ­ныкъокIэ яшIэныгъэ зыкъегъэ­Iэтыгъэным пае кIэлэеджакIо­хэм, гурыт, апшъэрэ еджапIэхэм ачIэсхэм зэIукIэгъухэр адызэхащэн фаеу республикэм и ЛIышъхьэ къыIуагъ.
Джащ фэдэу республикэм ипащэ УФСИН-м иветеранхэм опытышхо зэряIэр, хабзэр мыукъогъэным, республикэм иобщественнэ щынэгъончъагъэ игъэпытэн яIахьышхо зэрэха­шIыхьэрэр къыхигъэщыгъ.
«КъулыкъумкIэ опытышхоу шъуиIэр обществэмрэ къэра­лыгъомрэ яфедэхэм якъэгъэ­гъунэн тапэкIи зэрэфэжъугъэIорышIэщтым сицыхьэ телъ», — къыIуагъ КъумпIыл Мурат.
ЗэIукIэм джащ фэдэу къыщыгущыIагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Апшъэрэ хьыкум итхьаматэу Шумэн Байзэт, щынэгъончъа­гъэмкIэ Федеральнэ къулыкъум АР-мкIэ и ГъэIорышIапIэ ипащэу Михаил Кемеровыр, АР-м хэгъэгу кIоцI IофхэмкIэ иминистрэу Олег Безсмельницыныр, Росгвардием АР-мкIэ и ГъэIорышIапIэ ипащэу Олег Якушевыр, Урысыем и МЧС АР-мкIэ и ГъэIорышIэпIэ шъхьаIэ ипащэу Станислав Илющенкэр, Урысыем и ФСИН АР-мкIэ и ГъэIорышIапIэ ипащэу Виталий Перхорович.
ЗиIофшIэн гъэхъэгъэшхохэр щызышIыгъэ къулыкъушIэхэм ащыщхэм щытхъуцIэу «АР-м изаслуженнэ врач» зыфиIорэр къафагъэшъошагъ, АР-м и ЛIы­шъхьэ, Къэралыгъо Советым — Хасэм, Урысыем и ФСБ АР-мкIэ и ГъэIорышIапIэ, АР-м хэгъэгу кIоцI IофхэмкIэ и Министерствэ, Урысыем и МЧС АР-мкIэ и ГъэIорышIэпIэ шъхьаIэ ярэзэныгъэ тхылъхэр, Урысыем и ФСИН и Щытхъу ыкIи ирэзэныгъэ тхылъхэр зэIукIэм къащаратыжьыгъэх.
АР-м и ЛIышъхьэ ипресс-къулыкъу