Зэнэкъокъухэу «2024-рэ илъэсым икIэлэегъэджэ анахь дэгъу» ыкIи
«2024-рэ илъэсым икIэлэпIу анахь дэгъу» зыфиIохэрэм ямуниципальнэ едзыгъо икIэуххэр зэфахьысыжьыгъэх. ЗиIэпэIэсэныгъэкIэ анахь къахэщыгъэхэр Мыекъуапэ щагъэшIуагъэх.

Ащ епхыгъэ мэфэкI Iофтхьабзэм хэлэжьагъэх народнэ де­путатхэм якъэлэ Совет итхьаматэу Джармэкъо Азмэт, Мые­къопэ къэлэ администрацием гъэсэныгъэмкIэ и Комитет итхьаматэу Олег Черниковыр, УФ-м народнэ гъэсэныгъэм ыкIи шIэныгъэм иIофышIэхэм я Союз и Мыекъопэ къэлэ организацие ипащэу, УФ-м зэхэт гъэсэныгъэм иIофышIэ гъэшIуагъэу ШъэуапцIэкъо Аминэт.
МэфэкI Iофтхьабзэм хэла­жьэ­хэрэм закъыфигъэзагъ народнэ депутатхэм якъэлэ Совет итхьа­матэ.
— Мыекъопэ къэлэ адми­нистрацием ипащэу Геннадий Митрофановым ыкIи депутатхэм ацIэкIэ шIуфэс шъосэхы. Зэнэ­къокъум иедзыгъохэр къызэ­шъунэкIыгъэх ыкIи шъузыIут гъэсэныгъэ организациехэр зэ­кIэми зэрифэшъуашэу къэ­жъугъэлъэгъуагъэх. ТекIоныгъэ къыдэзымыхыгъэ къышъухэкIын ылъэкIыщтэп. Шъузэрэхэлэжьэгъэ закъом къеушыхьаты шъуи­сэнэхьаткIэ IэпэIэсэныгъэ дэгъу зэрэшъуIэкIэлъыр. Мы зэнэкъо­къум ишIуагъэкIэ а IэпэIэсэныгъэмкIэ шъузэдэгощэн, шъуи­творческэ амалхэм ахэжъугъэ­хъон шъулъэкIыгъ, тапэкIи шъуи­гъэхъагъэхэм, шъуиIофшIэн шIулъэгъоу фышъуиIэм ахахъоу, ежъугъаджэхэрэм шъуа­гъэгушIоу шъущыIэнэу сы­шъуфэлъаIо, — къыIуагъ Джармэкъо Азмэт.
Джащ фэдэу Олег Черниковыр ыкIи ШъэуапцIэкъо Аминэт къэгущыIагъэх. Тхьамэфищым къыкIоцI яIофшIэн илъэныкъо пстэумкIи лъэгэпIэшIухэм ади­штэу нэбгырэ пэпчъ зыкъыгъэ­лъэгъон зэрилъэкIыгъэр, Iэпэ­Iэсэныгъэ дэгъу зэряIэр ахэм къыхагъэщыгъ. ТапэкIи мы зэ­нэкъокъум нахь IофышIабэ хэлэжьэнхэу къыфэджагъэх.
Илъэс къэс зэхащэрэ зэнэ­къокъур уцугъо-уцугъоу зэтеутыгъагъ. Ахэр: «Сэлам шъосэхы! Ар сэры!», «МетодикэмкIэ мастерскоир», «Урок»,«Класснэ сыхьат», «Мастер-класс» зыфиIохэрэр ыкIи нэмыкIхэр. Мы илъэсым кIэлэегъэджи 10-рэ кIэлэпIуи 4-рэ зэнэкъокъугъэх. Хэлэжьэгъэ пстэуми къэлэ адми­нистрацием идипломхэр ыкIи шIухьафтынхэр аратыгъэх.
Професоюз къэлэ организацием ихэушъхьафыкIыгъэ шIу­хьафтын едзыгъоу «Призвание — педагог» зыфиIорэм щигъэ­нэфагъ. А лъэныкъомкIэ къыхагъэщыгъэх кIэлэцIыкIу IыгъыпIэу N 62-м икIэлэпIоу КIубэ Саидэ ыкIи гимназиеу N 22-м урысыбзэмрэ литературэмрэкIэ икIэлэегъаджэу Олеся Асеевар.
ХагъэунэфыкIырэ чIыпIэхэр къыдахыгъэх кIэлэпIухэу КIубэ Саидэ, Инна Лойко (кIэлэцIыкIу IыгъыпIэу N 7-р), Ирина Осадчаям (кIэлэцIыкIу IыгъыпIэу
N 37-р). КIэлэегъаджэхэмкIэ — Галина Зборовскаяр (еджапIэу N 6), Олеся Асеевар (гимназиеу N 22-р), Анна Николаевар (еджапIэу N 17-р).
МыекъуапэкIэ 2024-рэ илъэсым икIэлэегъэджэ анахь дэгъу хъугъэр гурыт еджапIэу N 7-м урысыбзэмкIэ икIэлэегъаджэу Светлана Великовар ыкIи кIэлэпIу анахь дэгъур кIэлэцIыкIу IыгъыпIэу N36-м икIэлэпIоу Ольга Плохотниковар арых. Мыхэр джы зэнэкъокъум ишъо­лъыр едзыгъо Мыекъуапэ къыщагъэлъэгъощт.
Къыхэгъэщыгъэн фае, 2024-рэ илъэсыр УФ-м и Президен-
тэу В. В. Путиным унагъом и Илъэсэу зэригъэнэфагъэр зэнэ­къокъум изэхэщакIохэм ащы­гъупшагъэп — едзыгъоу «Воспитание личности в духе семейных традиций» зыфиIорэр хагъэхьагъ. Ащ къащыхэщыгъэр гурыт еджапIэу N 6-м ублэпIэ классхэм якIэлэегъаджэу Галина Зборовскаяр ары.
Iэшъынэ Сусан.