Теуцожь районым иад­министрацие ипащэу УдыкIэко Адам муни­ципалитетым щыщ спортсменхэу гъэхъэгъэшIу зышIыгъэхэм ащыщхэм мы мафэхэм аIукIагъ.

Мыхэр зэнэкъокъу зэфэшъхьафхэм ахэлэжьагъэх, текIоныгъэр ыкIи ха­гъэунэфыкIырэ чIыпIэхэр къащыдахыгъэх. Районым, республикэм ацIэ дахэкIэ рязыгъэIорэ спортсменых.
Щытхъу тхылъхэмкIэ ыкIи ахъщэ шIу­хьафтынхэмкIэ къыхагъэщыгъэх сам­бэмкIэ Урысыем ипервенствэ апэрэ ыкIи хагъэунэфыкIырэ чIыпIэхэр къыщыдэзыхыгъэхэ Хьакъуй Амир, Тыгъужъ Тимур, Гъомлэшк Анзор ыкIи ЛIыхъурэе Мурат. Джащ фэдэу районым ипащэ зыфэгушIуагъэхэм ащыщых мы спорт лъэпкъымкIэ Къыблэ федеральнэ шъо­лъырым ичемпионхэу ыкIи хагъэунэ­фыкIырэ чIыпIэхэр къызфагъэшъоша­гъэхэу Хьакъуй Эльдар, Хьабэхъу Сал­бый, Едыдж Разиет, Хъот Тамирлан, КIыкI Долэт, Анцокъо Амир, Мэлгощ Адам. ХагъэунэфыкIыгъэхэм ащыщ футболистэу Блэгъожъ Рустем, мыр Урысыем изэнэкъокъухэм ячемпион. Районым испортсменкэ анахь лъэшхэм ащыщхэу, теннис цIыкIумкIэ гъэхъэ­гъэшIухэр зышIыгъэхэ Чэтаохэу Альбинэрэ Аринэрэ, Блэгъожъхэу Данэрэ Динарэрэ ацIэхэр къараIуагъэх, шIухьафтынхэр афашIыгъэх.
Теуцожь районым иадминистрацие ипащэ ыцIэкIэ щытхъу тхылъхэр ыкIи ахъщэ шIухьафтынхэр афагъэшъошагъэх спортсменхэм ятренерхэу Гъомлэшк Алый, Нэныжъ Байзэт ыкIи КIыкI Аслъанбэч.
— ТапэкIи гъэхъагъэхэр шъушIынхэу, джыри нахь лъэгэпIэ инхэм шъуа­нэсынэу шъуфэсэIо. Спортсменым сыдигъокIи ипшъэрылъ шъхьаIэр ихэгъэгу шIу ылъэгъуныр ары. Ар шъо жъугъэцакIэ, тэ амалэу тиIэмкIэ тапэкIи IэпыIэгъу тыкъышъуфэхъущт, шъуигъэ­хъагъэхэм тарыгушхощт, — къыIуагъ УдыкIэкIо Адам спортсменхэм закъы­фигъазэзэ.