Ар зыцIэ программэр УФ-м и Президент кIэщакIо зыфэхъугъэ лъэпкъ проектхэм ащыщэу «Бизнес цIыкIур ыкIи гурытыр» зыфиIорэм къыдыхэлъытагъэу Урысыем щыпхыращы.

УФ-м экономикэ хэхъоныгъэ­мкIэ и Министерствэ къызэритыгъэмкIэ, ащ хэлажьэрэм ипчъагъэ илъэс къэс нахьыбэ мэхъу. БлэкIыгъэ илъэсым изакъоу лъэIу тхылъ мини 5 къатыгъ, нэбгырэ мини 3,5-рэ зэкIэ иедзыгъохэм ахэлэ­жьагъ, грантэу аратыгъэр сомэ миллиони 10-м кIэхьэ, нэмыкI IэпыIэгъоу бзылъфыгъэ сатыушIхэм афэкIуагъэм сомэ миллиони 5 пэIуагъэхьагъ.
Шъолъырэу зыщыпхыращыхэрэр нахьыбэ ашIыщтэу ары къызэратыгъэр. Джащ фэдэу «Къуаджэм дэс ныр» зыфиIорэ лъэныкъори программэм къыдыхэлъытагъэу атIупщыгъ, «Экспортым хэлажьэрэ ныр» зыфиIорэ лъэныкъуи атIупщынэу тегущыIэх.
Программэм ипхырыщын къэралыгъо къулыкъухэм ямызакъоу, УФ-м мэкъу-мэщ хъыз­мэтымкIэ и Министерствэ, коммерческэ компаниешхохэу Wildberris, VK, Слетать.ру, РЭЦ зыфэпIощтхэр, фондэу «Наше будущее», нэмыкIхэр къыхэлажьэх.
Мы илъэсымкIэ программэр атIуп­щыгъ. Сабый къызфэхъугъэ бзылъфыгъэу, ащ зэрэлъып­лъэрэм фэшI IофшIапIэ Iумытхэр, зыныбжь имыкъугъэ кIэлэцIыкIу зиIэхэр, ыпIунэу е лъыплъэнэу къаIызыхыгъэхэри ахэтхэу, хэлэжьэнхэ алъэкIыщт.
ЫпэрапшIэу шIыкIэ зэфэ­шъхьафхэмкIэ егъэджэнхэр афызэхащэщтых, нэужым бизнес-проектэу къагъэхьазыры­гъэхэмкIэ бзылъфыгъэхэр зэ­нэкъокъущтых. Зипроект анахь дэгъоу къыхахыхэрэм грантэу сомэ мини 100 зырыз аратыщт, нэмыкI IэпыIэгъухэри агъотыщтых.
Программэу «Ны-сатыушI» зыфиIорэр зыщыпхыращыщт шъолъырхэр охътэ благъэм къа­гъэнэфэщтых. Къыхэдгъэщымэ тшIоигъу, программэм ишъо­-лъыр этап Адыгеим аужырэ илъэсхэм щыпхыращы. Ащ ишIуа­гъэкIэ бзылъфыгъэхэм яса­ты­ушIын хэпшIыкIэу зеушъомбгъу.
Хэлажьэмэ зышIоигъохэм интернет нэкIубгъоу мамапредприниматель.рф зыфиIорэм лъэIу тхылъыр къыщатын алъэ­кIыщт.