ДзэкIолIхэм зэрахьэрэ лIыхъужъныгъэр егъэшIэрэу цIыфхэм къахэнэ. ПсышIуапэ дэт гурыт еджапIэу N 80-м бэмышIэу къыщызэIуахыгъэ мыжъобгъур зыфэгъэхьыгъэр хэушъхьафыкIыгъэ дзэ операцием лIыхъужъныгъэ щызэрихьэзэ фэхыгъэ тичIыпIэгъу лIы шIагъоу Хъущт Рэщыд Биболэт ыкъор ары.

Хъущт Рэщыдэ милицием иеджапIэу Шъачэ дэтыр къызеух нэужым ПсышIуа­пэ и РОВД Iоф щишIагъ. Къыщагъ. Пшъэшъэжъыеу Миланэ зэдапIугъ. Ятэ къызщыхъугъэ чылэу ШэхэкIаем лъытэныгъэ ин зэрэфишIырэм ишыхьатэу дзэ операцием хэлажьэ зэхъум макъэ зэрэ­зэрагъэIужьырэ гущыIэу «Сикамо» зыфиIорэр ыгъэфедэщтыгъ. А чIыпIэм щыпсэурэ ныбжьыкIэхэр, хабзэ зэрэхъу­гъэу, джащ фэдэу зэджэжьых. Ипшъэ­рылъхэр дэгъоу ыгъэцакIэхэзэ, зышъхьа­мысыжьэу ар зэуагъэ. НэмыкIэуи зекIон ылъэкIыщтыгъэп, ыгу къыфидэщтгъагъэп, сыда пIомэ ятэжъитIуи: Хъущт Хьаджырэт Махьмудэ ыкъомрэ Хэшх Нур Аюбэ ыкъомрэ Хэгъэгу зэошхом чанэу зэрэ­хэлэжьэгъагъэхэр щы­гъупшэу зыпарэкIи къы­хэкIыгъэп. Ахэр тIури ясэнэхьаткIэ кIэ­лэегъэджагъэх, заом орденхэр къащыфагъэшъошагъэх. Рэщыдэ ышнахьыкIэу Къамболэти нахьыжъым ыуж итэу хэушъхьафыкIыгъэ дзэ операциер зыщыкIорэ чIыпIэм кIуагъэ.

2022-рэ илъэсым чъэпыогъум и 5-м Рэщыдэ дунаим ехыжьыгъ. ХышIуцIэ Шапсыгъэ щыщ кIалэр илъэс 40-м джыри нэсыгъагъэп, неонацистхэм апэуцужьызэ Донецкэ Народнэ Республикэм икъалэу Артемовскэ дэжь лIыхъужъныгъэ зэрихьэзэ щыфэхыгъ. ШэхэкIае ар щагъэтIылъыгъ ищыкIэгъэ дзэ Iофтхьабзэхэр зэрифэшъуашэу дызэрахьэхэзэ. Хъущт Рэщыдэ Биболэт ыкъом идунай зехъожь нэужым Урысые Федерацием и Президентэу Владимир Путиным и УказкIэ ЛIыхъужъныгъэм иорден къыфагъэшъошагъ. Унагъом ыцIэкIэ тын лъапIэр къызэратыжьыгъэр ащ ышып­хъоу Фатим. Ядэжь ащ къыщэжьыгъэх ыш ыгъэфедэщтыгъэ пкъыгъо зэфэшъхьаф­хэр: бронежилетыр, каскэр, дзэ шъуашэм щыщ нэмыкI пкъыгъохэри.
Хъущт Рэщыдэ иIахьылхэр, къыпэблагъэхэр, иныбджэгъухэр ыкIи дэзэуагъэ­хэр кIэщакIо зыфэхъугъэ Iофтхьабзэм къыдырагъэштагъ ПсышIуапэ ишIушIэ фондэу «Из прошлого в будущее» зыфиIорэм итхьаматэу Юлия Коноваловам, Шъачэ и Къэлэ ЗэIукIэ идепутатэу Хъущт Заур, ПсышIопэ районым иадминистрацие, къалэу Шъачэ гъэсэныгъэм­кIэ ыкIи шIэныгъэмкIэ и ГъэIорышIапIэ ялIыкIохэм, гурыт еджапIэу N 80-м икIэ­лэегъаджэхэм ыкIи нэмыкIхэм.

Я 80-рэ еджапIэу ар зычIэсыгъэр Урысые патриотическэ проектэу «ЛIы­хъужъым ипарт» зыфиIорэм апэу хэлэжьагъэхэм ащыщ. Мы Iофтхьабзэр зыфытегъэпсыхьагъэр къыткIэхъухьэ­хэрэм ятарихъ ашIэныр, хэгъэгум исхэм лIыхъужъныгъэу зэошхом щызэрахьа­гъэр, ядзэ пшъэрылъ агъэцакIэзэ блэнагъэу зэрахьагъэр хэмыкIокIэжьынхэр ары. Джы мары еджапIэу N 80-м Хъущт Рэщы­дэ ыцIэ епхыгъэ партэ чIэт хъугъэ. Ащ лIыхъужъым исурэт, щыIэныгъэ гъо­гоу къыкIугъэр, тын лъапIэу къыфагъэшъошагъэхэр ыкIи нэмыкIхэр щалъэгъу­щтых.
Мы Iофтхьабзэм хэлэжьагъэх тичIыпIэгъу лIыхъужъ игупсэхэр, иныбджэгъу­хэр, къулыкъу дэзыхьыгъэхэр, ПсышIопэ районым иадминистрацие, шIушIэ организациехэм, общественнэ движе­ниеу «Адыгэ Хасэм» ялIыкIохэр, зычIэсыгъэ еджапIэм икIэлэегъаджэхэр ыкIи икIэлэеджакIохэр, волонтерхэр ыкIи юнармейцэхэр.
Ныбэ Анзор.
Сурэтхэр авторым иех.