Классым ипэщэ кIэлэегъаджэхэм язэнэкъокъоу къалэу Шъачэ щыкIуагъэм текIоныгъэр къыщыдэзыхыгъэхэр къэнэфагъэх. Мы Iофтхьабзэр илъэс къэс зэхащэ, къэлэ администрацием гъэсэныгъэмрэ шIэныгъэмрэкIэ и ГъэIорышIапIэрэ гъэсэныгъэм хэхъоныгъэхэр егъэшIыгъэнхэмкIэ Гупчэмрэ кIэщакIо фэхъух.

«Самый классный классный» зэнэ­къокъум зэреджагъэхэр. Мы илъэсым ащ къалэм иеджапIэхэм якIэлэегъаджэ 26-рэ хэлэжьагъ. «Педагогический дебют в классном руководстве» зыфиIорэ лъэ­ныкъомкIэ анахь дэгъоу къыхахыгъ поселкэу ПсышIуапэ ия 75-рэ еджапIэ тарихъымрэ обществознаниемрэкIэ икIэлэегъаджэу Шъхьэбэ Заур.
Ар поселкэу Шъхьафит къыщыхъугъ, Хьаджыкъо игурыт еджапIэу N 94-м щеджагъ. Ащ ыуж, Пшызэ къэралыгъо технологическэ университетыр къызеухым, илъэс зэфэшъхьафхэм Шъачэ и ПсышIопэ район, етIанэ ежь къалэм яадминистрациехэм Iоф ащишIагъ.
2021-рэ илъэсым сэнэхьат компетенциехэмкIэ Москва иакадемие егъэджэн курсхэр щикIугъэх. Ащ тарихъымрэ обществознаниемрэкIэ ригъэджэнхэу фитыныгъэ къыритыгъ. А илъэс дэдэм къыщыублагъэу мы еджапIэм щэлажьэ.
— «Ебгъаджэхэзэ ори едж». Ар непэрэ кIэлэегъаджэмкIэ анахь шъхьаIэу щыт. Арышъ, мыщ фэдэ зэнэкъокъухэм уахэлажьэ­мэ уисэнэхьаткIэ хэ­хъоны­гъэ­хэр ошIых, — къы­Iуагъ Шъхьэ­бэ Заур. — Апэрэ уахътэм те­кIоныгъэр къыдэсхыным зыпа­рэкIи сыщыгугъыщтыгъэп, ау апэрэ едзыгъом гъэхъагъэхэр зыщысэшIыхэм ыуж, анахь дэгъухэм сахэфэным сыфэбэнэнэу кIуачIэ сиIэ къэхъугъ. Сигъэса­кIоу Аида Давыдовам, сиIоф­шIэгъухэм ыкIи сызипэщэ классэу 5 «А-м» исхэм «тхьа­шъуегъэпсэу» ясIомэ сшIоигъу. КIэлэцIыкIу­хэр лъэшэу къыс­къотыгъэх, сыгу къыдащэягъ. ЗэкIэми лъэшэу Iоф зэдэт­шIагъ, текIоныгъэр зэдытый.

Зэнэкъокъум хэлэжьагъэхэм зэкIэми къэлэ администрацием и ГъэIорышIапIэ идипломхэр къаратыгъэх, текIоныгъэр къыдэзыхыгъэхэм гъэсэныгъэм ыкIи наукэм иIофышIэхэм я Урысые профсоюз и Шъэчэ чIыпIэ организацие шIухьафтынхэр къафишIыгъэх.
НЫБЭ Анзор.