Мы илъэсымкIэ ятIонэрагъ
Лъэс зекIонымкIэ Iофтхьабзэу «Спортыр — щыIэныгъэм ишапхъ» зыфиIорэр рагъэкIокIыгъ. Ащ кIэщакIо фэхъугъэр Мыекъуапэ физическэ культурэмкIэ ыкIи спортымкIэ и Комитет ары. Мы илъэсымкIэ ар ятIонэрэу зэхащагъ.
— Лъэс зекIоныр спортым фэд. Тимарафонхэм ахэлэжьэрэ цIыфхэм бэрэ лъэсэу къакIухьэ, япсауныгъэ агъэпытэ. Мы Iофтхьабзэм къызэригъэнафэу ащ хэлажьэхэрэм мэфипшIым къыкIоцI лъэбэкъу мини 100 къакIун фэягъ, ау бэхэм мэфи 2 — 3 ныIэп агъэфедагъэр. Ащ къикIырэр лъэс зекIоныр бэхэм шапхъэ зэрафэхъугъэр ары, — еIо Мыекъуапэ физическэ культурэмкIэ ыкIи спортымкIэ и Комитет иметодистэу Бзаго Рустам.
Гъэтхэпэ марафоным Адыгеим, Краснодар краим ыкIи Челябинскэ хэкум ащыпсэурэ нэбгыри 160-рэ хэлэжьагъ, ахэм ащыщэу зэхэщакIохэм къагъэуцугъэ пшъэрылъыр зыгъэцэкIагъэр 91-рэ. Лъэбэкъу мини 100 къакIунымкIэ шапхъэхэр зыгъэцэкIэн зымылъэкIыгъэхэри къахэкIыгъэх, ау зэкIэми япсауныгъэ агъэпытагъ, жьы къабзэ къащагъ, чIыопсым идэхагъэ зэхашIагъ. Нэужым социальнэ хъытыухэм яамалхэр къызфагъэфедэзэ алъэгъугъэмкIэ ахэр зэдэгощагъэх.