Я IХ-рэ дунэе Кавказ хьисап олимпиадэр тыгъуасэ Адыгэ къэралыгъо университетым щы­рагъэжьагъ. Хэгъэгу 14-мэ, Урысыем ишъолъыр 21-мэ къарыкIыгъэ кIэлэеджэкIуи 160-м ехъу ащ хэлэжьэщт.

Очнэу ыкIи пэIудзыгъэ шIыкIэм тетэу олимпиадэр кIощт. Очнэу ащ хэлэжьэнэу амал зимыIэ кIэлэеджакIохэм онлайн шIыкIэр къызыфагъэфедэщт. Куп-купэу зэтеутыгъэхэу: я 8 — 9-рэ классхэм ыкIи я 10 — 11-рэ классхэм арысхэр яшIэныгъэкIэ зэнэкъокъущтых.
Дунэе Кавказ хьисап олимпиадэм икъызэIухын хэлэжьагъэх АР-м финанс­хэмкIэ иминистрэу Виктор Орловыр, Адыгеим гъэсэныгъэмрэ шIэныгъэмрэкIэ иминистрэ игуадзэу Артем Журавель, хэгъэгу зэфэшъхьафхэм къарыкIыгъэ шIэныгъэлэжьхэр. Адыгэ Республикэм и ЛIышъхьэу Къум­пIыл Мурат ыцIэкIэ Виктор Орловым кIэлэеджакIохэм шIуфэс къарихыгъ.
— Мы Iофтхьабзэр лъэгэпIэшхом зэ­рэнэсыгъэр къагъэлъагъо илъэси 8-м къыкIоцI президент грантхэм я Фонд щэгъогогъо ащ къызэрэдыригъэштагъэм ыкIи Урысыем гъэсэныгъэмкIэ и Министерствэ иолимпиадэхэу ныбжьыкIэхэм ятворческэ амалхэм зязыгъэушъомбгъу­хэрэм яспискэ зэрэхахьэрэм. Апэрэ Кавказ хьисап олимпиадэр Президентэу Владимир Путиныр кIэщакIо зэрэфэхъу­гъэм тетэу зэхащэгъэ гупчэу ­«Сириусым» щыкIуагъ. НыбжьыкIэхэр нахь зэпэ­благъэ хъунхэм, зэгурыIонхэм, пIэлъэ кIы­хьэхэм ателъытэгъэ зэпхыныгъэхэр яIэн­хэм олимпиадэр фэIорышIэ. Зэнэкъокъухэм шъуахэлажьэзэ, шIэныгъэу, къулайныгъэу шъуиIэр, пытагъэу шъухэлъыр къэ­жъугъэлъагъу. ХьисапымкIэ шIэныгъэ куу зэрэшъуиIэм нэмыкIэу, ямышIыкIэу шъугупшысэн зэрэшъулъэкIырэр, Iофым творческэ екIолIакIэ зэрэфышъуиIэр къэшъуушыхьатыжьын фае, — къыIуагъ министрэм.

КIэлэеджакIохэм гъэхъагъэхэр ашIынэу ар афэлъэIуагъ республикэм и ЛIышъхьэу КъумпIыл Мурат ишIуфэс олимпиадэм и Координационнэ совет итхьаматэу, Адыгэ къэралыгъо университетым иректорэу Мамый Даутэ ащ IэкIигъэхьа­жьыгъ.
Кавказ хьисап олимпиадэр тиреспубликэ иапшъэрэ еджапIэ имызакъоу, зэрэшъолъырэуи зэрыгушхорэ Iофтхьабзэу щыт. Адыгеим гъэсэныгъэмрэ шIэныгъэмрэкIэ иминистрэ игуадзэу Артем Журавель зэрилъытэрэмкIэ, тиджырэ лъэхъан хьисапым наукэм чIыпIэшхо щеубыты.
— Адыгэ къэралыгъо университетыр специалист дэгъухэр зыщагъэхьазырырэ чIыпIэу залъытэрэр бэшIагъэ. Республикэ хьисап еджапIэр математик ныбжьыкIэ­хэм ягъэхьазырынкIэ Урысыем и ­Къыблэ иеджэпIэ анахь пэрытхэм ащыщ, — къы­Iуагъ Артем Журавель.
Мэфэ заулэм къакIоцI математик ныб­­жьыкIэхэр олимпиадэм зэрэхэлэ­жьэщтхэм нэмыкIэу, ахэм языгъэпсэфыгъо уахътэ гъэшIэгъонэу зэрагъэ­кIощтми зэхэщакIохэр егупшысагъэх.
Зэнэкъокъухэм къащашIыщт гъэцэкIэнхэр Урысыем, Болгарием, Люксембург, Иран яматематикхэр зыхэхьэрэ комите­тым къыгъэхьазырыгъэх. КIэлэеджакIо­хэм яIофшIагъэхэм уасэ къафэзышIыщтыр Урысыем, Колумбием, Шам ялIы­кIохэр зыхэхьэрэ дунэе жюрир ары. Урысыем иматематик, икIэлэегъэджэ цIэрыIохэр, хьисапымкIэ Урысыем ихэшыпыкIыгъэ куп итренерхэр, илъэс зэ­фэшъхьафхэм Дунэе хьисап олимпиадэ­хэм дышъэ, тыжьын медальхэр къащызыхьыгъэхэр, хьисапымкIэ кIэлэеджакIо­хэм я Дунэе олимпиадэ итренерхэу Ки­рилл Суховыр, Павел Кожевниковыр, хьисапымкIэ кIэлэеджакIохэм я Урысые олимпиадэ иметодическэ комиссиерэ ижюрирэ ятхьаматэу Назар Агахановыр ащ хэхьэх.
Кавказ хьисап олимпиадэм изэхэща­кIохэр Адыгэ къэралыгъо университетым и Кавказ хьисап гупчэ, АР-м гъэсэныгъэмрэ шIэныгъэмрэкIэ и Министерствэ, мысатыу организациеу «ТехнологиякIэхэр гъэсэныгъэм щыгъэфедэгъэнхэмкIэ Гупчэу «Матэма» зыфиIорэр, рес­публикэ естественнэ-хьисап еджапIэр, кIэлэцIыкIу сэнаущхэр къыхэзыгъэщырэ ыкIи ахэм IэпыIэгъу язытырэ шъолъыр гупчэу «Полярис-Адыгея» зыфиIорэр ары. Гъэтхапэм и 16-м олимпиадэр зэфашIыжьыщт.
Александра Балабась.