Урысыем и Президентэу Владимир Путиным Уры­сыем и Къыблэрэ Приазовьемрэ яхэхъо­ныгъэ иIофыгъохэмкIэ шъо­лъырхэм зэIукIэ ады­риIагъ. Адыгеим ыцIэкIэ пэIудзыгъэ шIыкIэм тетэу кIогъэ конференцием хэлэжьагъ республикэм и ЛIышъхьэу КъумпIыл Мурат.

Iофтхьабззр зыфэгъэхьыгъагъэр экономикэм, цIыфхэр зы­чIэсыщтхэ унэхэм яшIын, транспорт инфраструктурэм зягъэу­шъомбгъугъэнымкIэ пшъэрылъхэм ятегущыIэн, джащ фэдэу Урысыем и Къыблэрэ Приазовьемрэ экологием ылъэныкъокIэ яIофхэм язытет гъэунэфыгъэныр ары.
«Зигугъу сшIырэр мыщ фэдэ тишъолъырхэр ары: Республикэу Къырым, къалэу Севастополь, Краснодар краир, Ростов хэкур, Адыгэ Республикэр, Донецкэ ыкIи Луганскэ народнэ рес-­
пуб­ли­кэхэр, Запорожскэ ыкIи Хер­сон хэкухэр ары. ЗэкIэми апэу къыхэсэгъэщы мы шъо­лъырхэм хэхъоныгъэ ашIынымкIэ амалы­шхохэр зэряIэхэр, анахьэу етIа­ни экономикэмкIэ, металлургиемкIэ, машинэшIынымкIэ, агропромышленнэ комп­лексымкIэ», — къыIуагъ Владимир Путиным.
Президентым агу къыгъэкIы­жьыгъ унашъохэу Федеральнэ ЗэIукIэм фигъэхьыгъэ Тхылъым зигугъу къыщишIыгъэхэр. ЧIыпIэ­хэм инвестиционнэ лъэныкъомкIэ нахь загъэчаныным пае Iоф­тхьэбзэ заулэмэ ягугъу ащ къышIыгъ: «Зэрэ Урысыеу технологие инхэм атегъэпсыхьэгъэ производствакIэхэр щызэхэщэгъэнхэр, джырэ уахътэм диштэрэ IофшIэпIэ чIыпIэхэу нахь шIуагъэ къэзытыщтхэр ыкIи лэжьэ­пкIэ дэгъу зыIулъыщтхэр къызэ­Iухыгъэнхэр». А унашъохэм къа­пкъырыкIыхэзэ, экономикэ хэхъоныгъэмкIэ проект гъэнэфа­гъэхэм ахэплъагъэх. Ахэр Къы­блэмрэ Приазовьемрэ яшъо­лъырхэм ащагъэцакIэх. ХэушъхьафыкIыгъэу къэралыгъом ипащэ хэгъэгу кIоцI зекIоным иIофыгъохэм анаIэ тыраригъэдзагъ.
«Къыхэсэгъэщы Урысыем зыщагъэпсэфыным иамал зиIэ ти­цIыфхэр, унагъохэр нахьыбэ хъунхэм пае тфэлъэкIыщтыр тшIэн зэрэфаер. Зызщагъэпс­кIыщт, лыжэхэмкIэ къызщакIу­хьащт, чIыпIэ гъэшIэгъонхэу унаI­э зы­теудзэн фаеу щытхэр ягъэлъэгъугъэнхэ фае. Мыщ дэ­жьым уасэхэри «мыцакъэхэу», агу щи­зэу цIыфхэм загъэпсэфынымкIи амалхэр агъотын зэрэфаер зыщытышъумыгъэгъупш», — къыIуагъ Владимир Путиным.
Адыгэ Республикэм и ЛIышъхьэу КъумпIыл Мурат къызэ­рэхигъэщыгъэмкIэ, зекIоным ылъэ­ныкъокIэ Адыгэ Респуб­ликэм щагъэпсырэ зыгъэпсэфыпIэу «Лэгъонакъэ» мэхьанэ­шхо иIэу щыт. Хэгъэгум ипащэхэм яIэпыIэгъу хэлъэу инфраструктурэм ишIын рагъэжьагъ. Ащ да­кIоу зекIоным илъэныкъо зэфэшъхьафхэм зарагъэушъомбгъу. Инфраструктурнэ бюджет чIыфэхэмкIи, казначейскэ чIыфэ гъэнэфагъэхэмкIи республикэм амал зэфэшъхьафхэр егъэ­федэх. Ахэм зэкIэми яшIуагъэ къэ­кIощт Адыгеим зекIоу къи­хьэ­хэрэм япчъагъэ нахьыбэ хъунымкIэ.
УФ-м и Президент Азово-­Черноморскэ шъолъырым иавтомобиль гъогухэм язытеткIэ гухэлъэу щыIэхэм къащыуцуугъ: кэкIощт илъэситфым къыкIоцI федеральнэ гъогу километрэ 460-рэ, шъолъыр мэхьанэ зиIэ гъогу километрэ 320-рэ ашIыщт ыкIи зэтырагъэпсыхьащт.
Iофыгъоу зытегущыIагъэхэм зыкIэ ащыщыгъ цIыфхэр зычIэ­сыщт унэхэм яшIын. Владимир Путиным къызэрэхигъэщыгъэмкIэ, псэолъэшI индустрием ылъэ­­ныкъокIэ чаныгъэ хэлъэу Iофхэр зэрэлъыкIуатэхэрэм къыкIырагъэч хъущтэп, къэралы­гъо Iэпы­IэгъумкIэ амалэу щы­Iэхэри, унэ­гъо ипотекэр зэрэхэтэу, цIыфхэм зычIэсыщтхэ унэхэр ягъэгъотыгъэным фэлэжьэнхэ фае.
«ПсэупIэ амалэу яIэхэр на­хьышIу ашIынхэм, унакIэхэмрэ фэтэрыкIэхэмрэ ахэр ащы-
псэунхэм апае Iофыгъоу къэуцухэрэм язэшIохын зэкIэми тынаIэ атетыным мэхьанэшхо иI. Ау ащ фэдэ псэолъэшIыным дакIоу еджапIэхэм, сымэджэщхэм, кIэлэцIыкIу IыгъыпIэхэм яинфраструктурэ изэтегъэпсыхьан зыщыдгъэгъупшэ хъущтэп», — къыIуагъ Президентым. ЧIыпIэхэм яхэхъоныгъэкIэ амалэу щыIэр зэкIэ къызфигъэфедэзэ Адыгеим цIыфхэр зычIэсыщтхэ унэхэм яшIын зырегъэу­шъомбгъу. 2030-рэ илъэсым нэс къэлэгъэпсыным къыдыхэлъытагъэу квадрат метрэ миллион 1,69-рэ ашIыщт.

«Адыгеир Азово-Черноморскэ кластерым зыхахьэкIэ, респуб­ликэм иэкономики, иинфраст­руктури нахь кIочIакIэ къахэ­хьащт, нахь псынкIэу хэхъоныгъэ ашIыщт. Адыгэ Республикэм ихэхъоныгъэкIэ лъэныкъо 12 анахь шъхьаIэу агъэнэфагъэр. Ахэр зэпхыгъэхэр промышленнэ производствэр, цIыфхэр зы­чIэсыщтхэ унэхэм яшIын, зе­кIоным зегъэушъомбгъугъэ-ныр ыкIи нэмыкIхэр. Владимир Путиным иIэпыIэгъу хэ­лъэу клас­терым ихэхъоныгъэ къыди­лъы­тэрэ лъэныкъохэр зэкIэ зэшIотхынхэ зэрэтлъэкIыщтым сицыхьэ телъ», — къыIуагъ Адыгеим и ЛIышъхьэ.
Президентым унашъоу ышIыгъэм — шъолъырхэм бюджет чIыфэу ателъхэм ящэнитIу атет­хыкIыжьыгъэным фэгъэхьыгъэм ишIуагъэкIэ тиреспубликэ Адыге­им ихэхъоныгъэ тапэкIи пэIуигъэхьащт ахъщэр нахьыбэ ышIын ылъэкIыщт. Адыгэ Республикэм исоциальнэ-экономикэ хэхъоныгъэкIэ Унэе программэр илъэси 6-кIэ лъыгъэкIотэгъэным иамали ащ къытыщт.
АР-м и ЛIышъхьэ ипресс-къулыкъу