Кавказ къэралыгъо био­сфернэ заповедникыр загъэпсыгъэр илъэси 100 зэрэхъурэм ехъулIэу къыдагъэкIыгъэ почтэ маркэхэм мыхъурыр зыщатырадзэгъэ Iофтхьабзэр Адыгэ къэралыгъо университетым щыкIуагъ.

Ащ хэлэжьагъэх тыкъэзыуцухьэрэ дунаим икъэухъумэнкIэ ыкIи чIыопсым икъэкIуапIэхэмкIэ АР-м и ГъэIорышIапIэ ипащэ игуадзэу Ешэ Аслъан, Урысыем и Почтэ ипащэ игуадзэу Ека­тери­на Володченкэр, АКъУ-м иректорэу Мамый Даут, естест­вознаниемкIэ ифакультет иде­канэу Андрей Кузьминыр.
МэфэкI лъапIэхэм яхъулIэу почтэ маркэхэр къыдэгъэкIы­гъэнхэр тихэгъэгу бэшIагъэ ха­бзэ зыщыхъугъэр. АщкIэ мэ­хьанэ зиIэ хъугъэ-шIагъэхэр тарихъым инэкIубгъо хэтхагъэхэ мэхъух. Урысыем и Почтэ илIы­кIо къызэриIуагъэмкIэ, едзы­гъоу «Флора России» зыфиIорэм лъыпыдзагъэу Кавказ къэра­лыгъо биосфернэ заповедникэу Х. Шапошниковым ыцIэ зыхьырэр загъэпсыгъэр илъэси 100 зэрэхъурэм ехъулIэу джыри мар­киплI къыдагъэкIыгъ. Заповедникым ишъолъыр къыщы­кIырэ къэгъэгъэ зэфэшъхьафхэм ясурэтхэр мыхэм атетых.
— ПстэумкIи маркэ мин 54-рэ къыдагъэкIыгъ, ащ щыщэу 400-р Адыгеим ипочтэ отде­лениехэм къа­чIэ­нэщт, уасэр — сомэ 67-рэ. Ахэм ятедзэу апэрэ мафэм иконверт ыкIи хэушъхьафыкIыгъэ почтэ мыхъурэу гъэ­нэфэгъэ мафэ зытетхагъэр къагъэхьазы­рыгъ. Мыекъуа­пэ ипочтэ отделение ииндекс нэмыкIэу ащ къэгъагъэ­хэр тешIыхьагъэх, — хигъэунэфыкIыгъ Екатерина Володченкэм.
МэфэкI шIыкIэм тетэу мы­хъурыр конвертым тырагъэу­цуагъ ыкIи ар акционер общест-
вэу «Марка» зыфиIорэм щагъэ­тIылъынэу агъэхьыгъ.
Iэшъынэ Сусан.
Сурэтхэр: Iэшъынэ Аслъан.