ХэушъхьафыкIыгъэ дзэ опе­рацием хэлажьэхэрэм зэрадырагъаштэрэр, зэракъотхэр къизыIотыкIырэ автопробегыр тыгъуасэ Адыгеим къэсыгъ.

Ащ фэгъэхьыгъэ зэхахьэу Мыекъуапэ и Гупчэ саугъэт зэ­хэтэу «ЕгъэшIэрэ машIор» зыфиIорэм дэжь щыкIуагъэм хэлэжьагъэх хэбзэ къулыкъухэм, ветеран ыкIи общественнэ организациехэм ялIыкIохэр.
Iофтхьабзэм кIэщакIо фэхъу­гъэх Республикэу Дагъыстан и Правительствэ илIыкIоу АР-м щыIэмрэ Краснодар краим иобщественнэ организациеу «Дагъыстан щыпсэурэ лъэпкъхэм якультурэ Гупчэу «ЗыкIыныгъ» зыфиIорэмрэ.
ШIуфэс гущыIэхэмкIэ Iофтхьа­бзэр къызэIуихыгъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм ады­ряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет итхьаматэ игуадзэу Константин Щербаковым.
— Непэ неонацизмэм пэуцужьырэ тидзэкIолIхэм лъэпкъ ыкIи ныбжь зэхэдз ямыIэу зэ­къотых. ЗэкIэ цIыф лъэпкъхэм тызэзыпхырэр Урысыер ары. ТилIыхъужъхэм адежъугъаштэу, агу къыдэшъущаеу непэрэ Iоф­тхьабзэр зэрэзэхэшъущагъэмкIэ, Адыгеим шъукъызэрэсы­гъэмкIэ тышъуфэраз, — къы­Iуагъ Константин Щерба­ковым.
Автомобиль зэхэтхэу Мые­къуапэ къэсыгъэхэм тишъолъыр зэрэщапэгъокIыгъэхэр зэрягуапэр Дагъыстан илIыкIоу АР-м щыIэ Чупан Асильдаровым къыхигъэщыгъ. Джащ фэдэу Дагъыстан чIыпIэ зэжъу зефэм, Урысыер зэракъоуцуагъэр зэра­щымыгъупшэрэр, къэралыгъом зэрэкъотхэр хигъэунэфыкIыгъ.
Республикэу Дагъыстан илIыкIоу Краснодар краим щыIэ Магомед Нурудиновым Iофтхьабзэр лъигъэкIотагъ.
— СиIэпыIэгъоу Алибек Магомедовым игукъэкIыкIэ мыщ фэдэ автопробегыр хэушъхьафыкIыгъэ дзэ операциер зырагъэжьагъэм къыщыублагъэу ящэнэрэу зэхэтэщэ, джы тыз­дэ­хьащт къалэхэм ахэдгъэ­хъуагъ. Фэбагъэ хэлъэу къызэ­рэтпэгъокIыгъэхэмкIэ Адыгеим ипащэхэм тафэраз. Ащ тицыхьэ телъыгъ, сыда пIомэ ткъош адыгэ лъэпкъыр сыдигъокIи лъэпкъ зэгурыIоныгъэр, рэхьатныгъэр, мамырныгъэр къэухъу­мэгъэнхэм ыуж ит. Хэгъэгу зэошхом илъэхъан зыпсэ зытыгъэ лIыхъужъхэм ясаугъэтэу тыздэщытым имэхьанэ куу, ахэм шъхьащэ афэтэшIы. Фашистхэм тихэгъэгу щызэрахьэгъэ хьэ­кIэ-къокIагъэр джы къэмыгъэхъу­гъэным ыуж титыщт, — къы­Iуагъ М. Нурудиновым.
Автопробегыр зигукъэкIэу Алибек Магомедовым зэрэхигъэунэфыкIыгъэмкIэ, Урысыер къэралыгъо кIочIэшхоу щытыным, щыпсэухэрэм щыIэкIэшIу яIэным афэшI ти Президент ышIэрэр бэ. Къэралыгъом ищы­нэгъончъагъэ къэухъумэгъэным фытегъэпсыхьагъ хэушъхьафыкIыгъэ дзэ операциери, ащ хэ­лажьэхэрэм зэракъотхэр, зэ­­радырагъаштэрэр, афэлъэкIыщтымкIэ IэпыIэгъу зэрафэхъу­хэрэр ащ къыхигъэщыгъ.
Непэрэ Iофтхьабзэм мэхьанэ зэриIэр ипсалъэ къыщиIуагъ АР-м иветеранхэм я Совет итхьаматэу Къуаджэ Аслъан. Зэкъошныгъэ азыфагу илъэу тиреспубликэхэр зэрэщыIэхэм имэхьанэ къыкIигъэтхъыгъ.
— ХэушъхьафыкIыгъэ дзэ операцием игугъу къэтшIымэ, сыд фэдизэу зэонымкIэ технологиехэр зэблэхъугъэхэ хъугъэ­ми, зимычIыпIэ зыубытынэу ежьагъэхэм къадэхъущтэп. Уры­сыем текIоныгъэр зэриещтым тицыхьэ телъ, — хигъэу­нэфыкIыгъ Къуаджэ Аслъан.
Зэхахьэм икIэухым саугъэтым къэгъагъэхэр кIэралъхьагъэх. Автомобиль зэхэтхэу Краснодар къикIыхи Мыекъуапэ къыдэхьагъэхэр нэужым гъогу техьажьыгъэх. Ахэр къалэхэу Ростов, Ставрополь анэсыщтых.
Iэшъынэ Сусан.