Амакъэхэр атыщтых
Федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэм къыдыхэлъытагъэу зэтырагъэпсыхьащт чIыпIэхэм якъыхэхынкIэ мэкъэтынхэр гъэтхэпэ мазэм и 15-м рагъэжьэщтых.
Урысыем ишъолъырхэм зэкIэми онлайн шIыкIэм тетэу ар ащыкIощт, шIоигъоныгъэ зиIэхэр зэкIэ хэлэжьэнхэ алъэкIыщт. Нахьыбэу цIыфхэм амакъэхэр зыфатыхэрэр 2025-рэ илъэсым агъэкIэжьыщтых.
УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае аштэгъэ федеральнэ проектэу ар щыт. Ащ ишIуагъэкIэ 2017-рэ илъэсым къыщыублагъэу 2023-м нэс Адыгеим чIыпIэ 322-рэ щызэтырагъэпсыхьажьыгъ.
Нахьыпэрэм фэдэу къалэу Мыекъуап, поселкэхэу Инэм, Яблоновскэр ары чIыпIэу гъэкIэжьын зищыкIагъэхэр къызщыхахыгъэхэр. Адыгеим икъэлэ шъхьаIэ исаугъэт зэхэтэу «Памяти павших» зыфиIорэр, Лениным ыцIэ зыхьырэ гупчэр ыкIи Свято-Успенскэ чылысым къыпэIулъ чIыпIэр зэнэкъокъум хагъэлэжьэнэу къырагъэуцуагъэх.
Поселкэу Яблоновскэм иурамэу Кочубей ыцIэ зыхьырэм тет спорт площадкэр, урамэу Космическэм общественнэ чIыпIэу иIэр, мы урам дэдэм тет кIэлэцIыкIу спорт площадкэр ары къыхахыгъэхэр.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм иурамэу Крестьянскэм тет гупчэр, къуаджэу БжыхьэкъоякIэм культурэм и Унэу дэтым дэжь язэтегъэпсыхьан ары цIыфхэр амакъэхэр зыхэдэщтхэр.
АР-м ныбжьыкIэ IофхэмкIэ и Комитет мэкъэтынхэр зэрэкIощтхэм изыфэгъэхьазырын щытегущыIэхэзэ къызэрэщаIуагъэмкIэ, цIыфхэр мэкъэтынхэм ахэлэжьэнхэмкIэ гуфакIохэр IэпыIэгъу афэхъущтых. Нэбгырэ 250-м ехъу ащ фагъэхьазырыгъ. Смартфонхэр агъэфедэхэзэ ахэр цIыфхэм адеIэщтых. Ащ имызакъоу, гъэтхапэм и 15 — 17-м хэдзыпIэ участкэу мы муниципальнэ образованиехэм къащызэIуахыщтхэм ячIэхьагъухэми Iоф ащашIэщт. Общественнэ чIыпIэхэм апае мэкъэтынхэр мэлылъфэгъум и 30-м нэс кIощтых.
Шъугу къэдгъэкIыжьын, блэкIыгъэ илъэсхэми ащ фэдэ мэкъэтынхэмкIэ чIыпIэхэр мы муниципальнэ образованиехэм къащахахыгъэх. ГущыIэм пае, Мыекъуапэ ирайон цIыкIоу Черемушкэм мы уахътэм щагъэкIэжьырэ бульварэу «ТекIоныгъэм ия 55-рэ илъэс» зыфиIорэм гъэрекIо анахьыбэу макъэхэр фатыгъагъэх.