«Шъоущыгъур» къызэузхэрэм ахэхъо
БлэкIыгъэ илъэсым изэфэхьысыжьхэмкIэ, шъоущыгъу узыр зиIэхэм япчъагъэ дунаим щыхэхъуагъ. Урысыер пштэмэ, нэбгырэ миллион 12,5-рэ фэдизыр ащ егъэсымаджэ, пчъагъэм ипроценти 7-м инсулиныр зыхалъхьэ. УплъэкIунхэм къызэрагъэлъэгъуагъэмкIэ, узыр «къэныбжьыкIагъ»: джы нахьыбэрэмкIэ ар илъэс 35-рэ зыныбжьымэ къызыдаштэ. Мы лъэныкъомкIэ Адыгеим иIоф зытетыр зэдгъашIэмэ тшIоигъоу АР-м иклиническэ сымэджэщ диабетологиемкIэ и Гупчэ ипащэу, врач-эндокринологэу ЯхъулIэ Маринэ гущыIэгъу тыфэхъугъ.
— Марин, Адыгеир тштэмэ, пчъагъэхэр сыд фэдэха?
— Шъыпкъэ, шъоущыгъу узыр къызэузхэрэм япчъагъэ республикэми щыхэхъуагъ. Ау бэ дэд пIон плъэкIыщтэп: нэбгырэ 300 фэдиз, проценти 3-м нэсы. Зигугъу сшIырэр зыныбжь икъугъэхэр ары. НэмыкI шъолъырхэм ягъэпшагъэмэ, ар бэп. УрысыемкIэ проценти 6-м щыкIахьэ. ПстэумкIи непэ шъоущыгъу уз зиIэ нэбгырэ мин 16452-рэ республикэм щэпсэу, ащ щыщэу 808-мэ инсулиныр зыхалъхьэ. Мыхэм ахэтэп кIэлэцIыкIухэр. Щылэ мазэм и 1-м ехъулIэу ахэр нэбгыри 139-рэ фэдиз мэхъух.
— Шъоущыгъу узыр ихьылъагъэкIэ зэтефыгъ. А узыр къызыхэжъугъэщыгъакIэхэм сыд фэда къяузыгъэр?
— Пчъагъэхэм сыдигъуи къыхэзыгъахъохэрэр шъоущыгъу узым ия 2-рэ гъэпсыкIэ зиIэхэр ары. Апэрэм хэхьэрэ сымаджэхэр нахьыбэ хъугъэх сIон слъэкIыщтэп. Ар нахь хьылъ, ар зиIэхэр инсулиным епхыгъэх. Мы узым нэмыкI гъэпсыкIэхэри иIэх, ау ахэр къызэузыхэрэм япчъагъэ мэкIэ дэд. КъызэрэсIуагъэу, бэмэ къяузырэр я 2-рэ гъэпсыкIэ зиIэр ары. Ахэр шэ егъэлыягъэ зытелъхэр, инсулиныр икъоу зэхэзымышIэхэрэр, гу-лъынтфэ зэхэтым ыгъэгумэкIхэрэр ыкIи шъоущыгъу узыр къызэузырэ Iахьылхэр зиIэхэр ары. Аужырэр ушэтынхэмкIэ агъэунэфыгъ: я 2-рэ гъэпсыкIэ зиIэ шъоущыгъу узыр IахьылныгъэкIэ зэIэпахы. ЛIакъом щыщ горэ ащ рысымэджагъэмэ, лIэуж горэм къыхэфэжьын ылъэкIыщт. Сымэджагъэр нахьыбэ зыхъукIэ, ащ ищынагъо нахь ин. ГущыIэм пае, уиIахьыл зы нэбгырэм узыр иIагъэмэ, ыуж къикIыщтым къызэрэхэфэжьыщтым ищынагъо процент 25— 50, нымкIи тымкIи ащ рысымаджагъэхэр къахэфагъэмэ, ар процент 70-м нэсы.
— Шъоущыгъу уз зиIэхэм сыд фэдэ IэпыIэгъуа непэ республикэм щагъотырэр?
— Ащ зэхъокIыныгъэ фэхъугъэп. Сыдигъуи фэдэу джыри ящыкIэгъэ Iэзэгъу уцхэр аратых. Узэу яIэм елъытыгъэу къэралыгъо IэпыIэгъу агъотын фаеу щыт: Iэзэгъу уцэуи шIы, инсулинэуи шIы. Шъоущыгъур дэкIоягъэмэ ежь-ежьырэу зэрауплъэкIущт амалымкIэ Iофхэм язытет нахьышIу хъугъэ. Сыдигъуи ахэр аIэкIэдгъэхьаным ыуж титыгъ, ау ащ дэжьым ар шIушIэ IэпыIэгъугъ. Джы республикэм къещыфых ыкIи нахьыбэу, ыпкIэ хэмылъэу сымаджэхэм ареты.
Ау анахь шъхьаIэр мы илъэсым федеральнэ программакIэу «Шъоущыгъу узым пэуцужьыгъэныр» зыфиIорэм иIофшIэн къэралыгъом зэрэщиублэжьыгъэр ары, республикэми ащ Iоф щешIэ. ПстэумкIэ программэр илъэсищым ателъытагъ. ТапэкIи ар щыIагъ: 1996-рэ илъэсым къыщегъэжьагъэу илъэс 12-рэ лэжьагъэ. Ащ ыужи тIогъогогъо лъагъэкIотэгъагъ. Ащ дэжьым программэм ишIуагъэкIэ тикъулыкъу ахъщэ къыфатIупщыщтыгъ, ищыкIэгъэ псэуалъэхэр къащэфыщтыгъэх, эндокринологие гупчэхэр зэтырагъэпсыхьэщтыгъэх, мы узымкIэ еджапIэхэр зэхащэщтыгъэх. Ащ ихьатыркIэ илъэс зэкIэлъыкIохэм сымаджэхэм тызэряIазэрэм идэгъугъэ нахьышIу тшIын тлъэкIыгъагъэ, къагъашIэрэми хэхъуагъ, къэгъэлъэгъонышIухэр тигъэшIыгъэх. Ащ дэжьыр ары сымаджэхэм ежь-ежьырэу зызэрауплъэкIурэ пкъыгъохэр Iэзэным къызхэдгъэхьагъэхэр, аужырэ шапхъэхэмкIэ тяIазэу зытыублагъэр. Ау программэм иIофшIэн зызэпэум, ащ тызэрэфэныкъор зэхэтшIагъ. БлэкIыгъэ илъэсым Урысыем псауныгъэр къэухъумэгъэнымкIэ иминистрэ зэхэсыгъо зэхищэгъагъ. Ащ дэжьым программэм икъэштэжьын фэгъэхьыгъэ упчIэм щытегущыIагъэх. ШIуагъэу къыхьыгъэмрэ зымылэжьэжьырэм къыкIоцI къэгъэлъэгъонхэр зыфэдэмрэ зызэрагъапшэм, IэзакIэм идэгъугъэ къыщыкIагъэу агъэунэфыгъ ыкIи программэр лъыгъэкIотэгъэн фаеу алъытагъ.
— Программэм сыдэущтэу Iоф ышIэра? Сыда ащ къыдыхэлъытагъэр?
— Анахь шъхьаIэу ащ иIофшIэнкIэ къыхэзгъэщымэ сшIоигъор «Диабетым иеджапI» зыфатIорэм къызэредгъэгъэзэжьыгъэр ары. Илъэс заулэкIэ узэкIэIэбэжьмэ, ыпэрэ программэхэм кIуачIэ яIэ зэхъум ар зэхэтщагъэу Iоф ышIэщтыгъ, шъоущыгъу уз зиIэхэм апае егъэджэнхэр зэхатщэщтыгъэх. Джы ахэм алъыпытыдзэжьын тлъэкIыгъэ.
Джащ фэд, сымаджэхэр зэрэтыуплъэкIухэрэм идэгъугъэ нахьышIу зышIыщт Iэмэ-псымэхэр тщэфышъущтых. Лъыр нахь куоу тыуплъэкIун амал тиIэ хъугъэ. IэзакIэу сымаджэхэм арахьылIэрэм идэгъугъэ, шIуагъэу къыхьырэр ащ къегъэунэфы. Непэ республикэм ирайон пэпчъ ащ фэдэ псэуалъэхэр ащагъэуцугъэх ыкIи щылэ мазэм къыщегъэжьагъэу Iоф ашIэ. Ащ нэс мыщ фэдэ амал зиIагъэр республикэ сымэджэщ закъор ары. Ар хэхъоныгъэшIоу сэ сэлъытэ.
— Щылэ мазэм къыщегъэжьагъэу ащ фэдэ амалхэр шъуиIэхэмэ, апэрэ зэфэхьысыжьхэр щыIэха?
— БэмышIэу АР-м псауныгъэр къэухъумэгъэнымкIэ иминистрэ тыригъусэу районхэр къэткIухьагъэх. Кардиологхэм, неврологхэм ыкIи эндокринологхэм заIудгъэкIагъ, сыда пIомэ гу-лъынтфэ узхэмрэ шъоущыгъу узымрэ лIэныгъэмкIэ пчъагъэхэм янахьыбэр къагъэпсы. Ахэм къызэраIуагъэмкIэ, лъыр зыуплъэкIурэ оборудованиер зэпыу имыIэу агъэлажьэ. Арышъ, зэфэхьысыжьхэмкIэ джыри жьыIо, ау къэблэгъэрэ уахътэм, сызэрэгугъэрэмкIэ, ахэр тиIэщтых.
— Диабетым иеджапIэ къыфэдгъэзэжьынышъ, сыда ащ ипшъэрылъыр?
— Мы еджапIэр УФ-м псауныгъэр къэухъумэгъэнымкIэ и Министерствэ иунашъокIэ зэхэщагъ. Ащ ишIуагъэкIэ сымаджэм иуз фэгъэхьыгъэ шIэныгъэхэр рагъэгъотых, ищыкIагъэ хъумэ, ежь-ежьырэу IэпыIэгъу зэригъэкIыжьышъуным фагъасэ. ЕджапIэр АР-м идиагностическэ IэзапIэ ыкIи къалэм иIэзэпIитIумэ ащыгъэпсыгъ. Джащ фэдэу Мыекъопэ ыкIи Тэхъутэмыкъое районхэм ахэр къащызэIутхынхэу щыт. Республикэм ипсэупIэхэм къарыкIыхэрэр егъэджэнхэм ахэлэжьэнхэ алъэкIыщт. ЫпэкIэ къызэрэщысIуагъэу, еджапIэм иIофшIэн мы илъэсым ригъэжьэжьыгъэ къодый, арышъ, джырэкIэ къакIорэр макIэ, ау сэгугъэ ахэм япчъагъэ хэхъонэу. Узым «дэпсэунхэу» ащ щыфагъасэх. Егъэджэнхэр мафэ къэс сыхьатитIурэ макIох.
— Иуз ыштэныр сымаджэм къехьылъэкIа?
— Ары адэ, узыр къызхагъэщыгъэ къодыер егъэджэным фэхьазырэп. Ащ уахътэ ищыкIагъ. Арышъ, ащ фэдэм е изакъоу удэлэжьэн фае, е ежь фэдэхэм ягъусэу ебгъэджэщт. Узым игъэпсыкIэкIи, зэрэсымаджэхэм ибагъэкIи зэхэуушъхьафыкIынхэ фае.
— Сымаджэхэр сыдэущтэу къыхэжъугъэщыхэра? Диспансеризацием ишIуагъэ къэкIуа, хьаумэ ежь-ежьырэу зэгуцэфэжьхэшъ, къышъуфэкIоха?
— Зэфэшъхьафэу узыр къэнэфэн фае. Ар цIыфым идагъомэ диспансеризацием къызэрэхигъэщын фаем щэч хэлъэп. Ау сыд фэдэрэ узи фэдэу шъоущыгъу узыри нахьыжьэу къэбгъэнафэмэ нахьышIу, сыда пIомэ Iэзэгъу уцэу епхьылIэщтыри нахь макI, IэзакIэри фэшъхьаф. ЕтIанэ къасIомэ сшIоигъор, шъоущыгъур зыфэдизыр гъэунэфыгъэным фэшI лъыр гунэкIэу аты. Ар макIэу сэлъытэ. Лъынтфэмэ агъэгумэкIэу, бащэ цIыфым къещэчымэ, е глюкозэмкIэ, е шхынкIэ гъэхьылъагъэу лъыр ууплъэкIун фае. Арышъ, шъоущыгъу узымкIэ гуцафэ пшIыгъэмэ, куоу зыууплъэкIун фае, етIани ар уиIахьыл горэхэм яIэмэ. Илъэсыбэ хъугъэу Iоф сэшIэми, сырихьылIэ къэс сэгъэшIагъо. НыбжьышIу ит цIыфыр къыпфэкIонышъ, ишъоущыгъу ммоль/л. 11-17 нэс дэкIоягъэу къычIэкIы. «Джырэ нэс тыдэ ущыIагъа?» зысIокIэ, «Фэбагъэ, ащ пае псыбэ сешъоу слъытагъэ» аIо.
— Шъоущыгъу уз зиIэм IэзакIэу къыфагъэуцугъэм блэмыкIэу ыгъэцакIэмэ, ищыIакIэ идэгъугъэ сыд фэдэщта?
— ЗэкIэ ыгъэцакIэмэ, цIыф къызэрыкIом фэдэу гъэшIэ кIыхьэ къыгъэшIэн ылъэкIыщт. Шъыпкъэ, ащ кIуачIэрэ щэIагъэрэ ищыкIагъ, ау пфэмыгъэцэкIэнэу щытэп. Анахь шъхьаIэр — шъоущыгъур зыфэдизым ренэу гъунэ лъыпфын фае. Ари непэ Iэрыфэгъу хъугъэ. Iапэр умыулыIоу, ар зыуплъэкIурэ пкъыгъохэр джы щыIэх. Ахэр сабыйхэм апае жъугъэу агъэфедэх. АР-м и ЛIышъхьэу КъумпIыл Мурат ихьатыркIэ шъоущыгъу уз зиIэ сабыйхэм ащ фэдэ пкъыгъохэр аратыгъэх. Ны-тыхэр имысхэми, сабыим илъ изытет телефонымкIэ алъэгъун алъэкIы. Илъэс заулэкIэ узэкIэIэбэжьмэ, ащ фэдэ хъун ылъэкIыным егупшысэгъоягъ.
ТапэкIэ шъоущыгъу уз зиIэ сабыйхэм икъоу ахахъощтыгъэп, ялэгъумэ адиштэщтыгъэхэп. Непэ садэжь къычIэхьэрэ ныбжьыкIэхэм узяплъырэм, сымаджэхэми пшIэщтхэп. Ахэр зыпылъыжьхэу, ищыкIагъэр зэкIэ зыгъэцакIэу, зыдэлэжьэжьхэрэр ары. Ащ фэдэхэр аужырэ уахътэм нахьыбэ мэхъух. Усымаджэми, щыIэкIэ тэрэз уиIэным зытебгъэгушIухьаным имэхьанэ ины.
Анцокъо Ирин.