Адыгеимрэ Херсон хэкумрэ ныбжьыкIэ политикэм ылъэныкъокIэ Iоф зэрэзэда­шIэщтым мы шъолъырхэм ялIыкIохэр ныбжьыкIэхэм я Дунэе фестиваль щытегущыIагъэх.

Ахэр Сириусым щызэрэугъоигъэх социальнэ мэхьанэ зиIэ проектхэмкIэ зэрэзэдэлэжьэщтхэм рыгущыIэнхэу, Iоф­шIэкIэ амалэу аIэкIэлъымкIэ ыкIи фестивалым гузэхашIэу аригъэшIыгъэмкIэ зэдэгощэнхэу.

«Херсон хэкумрэ тэрырэ зэфыщытыкIэ хэушъхьафыкIыгъэхэр тиIэх, — къащи­тхыгъ исоциальнэ нэкIубгъохэм АР-м и ЛIышъхьэ. — Адыгеим ынаIэ тет Ге­ни­­ческэ районэу мэхьэнэ ин зиIэ об­ще­ственнэ проектхэр зыщызэ­шIотхы­хэрэм. Мыщ еджапIэхэмрэ кIэлэцIыкIу IыгъыпIэ­хэмрэ щытэгъэцэкIэжьых, спортым зыщыпылъыщтхэ чIыпIэхэмрэ гупчэхэмрэ щытэшIых, бэмышIэу МФЦ къыщызэ­Iутхыгъ».

ЗэIукIэм Адыгеимрэ Херсон хэкумрэ къарыкIыгъэ ныбжьыкIэхэм щыкIагъэ­тхъыгъ общественнэ организациехэм, ныбжьыкIэ ыкIи патриотическэ движе­ниехэм алъэныкъокIэ зэдэлэжьэнхэм имэхьанэ зэрэиным. Социальнэ Iофхэм ныбжьыкIэхэр ахэгъэщэгъэнхэм, ныб­жьыкIэ политикэм хэт IофышIэхэм япчъагъэ зэримыкъурэм афэгъэхьыгъэ Iофыгъохэр къаIэтыгъэх, IофышIэхэмкIэ зэхъожьынхэу, яамалхэмкIэ зэдэгощэнхэу Iуагъэ зэдашIыгъ. ЗэIукIэм ыкIэм Херсон хэкум къикIыгъэхэр Адыгеим икъэгъэ­лъэгъуапIэ рагъэплъыгъэх, ахэр респуб­ликэм къызэрэфэлъаIохэрэр ащ къыщы­ты­ратхагъэх, адыгэ къуаер иIэшIугъэкIэ ауплъэкIугъ ыкIи тишъолъыр игъэхъа­гъэхэм нэIуасэ зыщафашIыгъ. ЦIыфыбэ зыхэлэжьэрэ Iофтхьабзэхэм язэхэщэнкIэ IофшIэкIэ амалхэмкIэ зэхъожьынхэм пае Урысыем ишъолъырыкIэ къикIыгъэхэр къырагъэблэгъагъэх гъэсэныгъэ форумэу

«Адыгеим иныбжьыкIэхэр» зыфиIоу республикэм мэлылъфэгъу мазэм щы­кIощтым.
«Сицыхьэ телъ мыщ фэдэ зэлъыIэсы­ныгъэхэр тапэкIэ нахьыбэ зэрэхъущтхэм, IофшIэкIэ амалхэу зэрэзэхъожьыщтхэм тишъолъырхэм яныбжьыкIэ политикэ хэхъоныгъэ ышIынымкIэ яшIогъэшхо къызэрэкIощтым», — къыкIигъэтхъыгъ КъумпIыл Мурат.