Адыгэ Республикэм терроризмэм пэшIуекIорэ и Комиссие изэхэсыгъоу щыIагъэм щатегущыIагъэх Урысыем и Президент ихэдзынхэм республикэр зэрэфэхьазырым, хэушъхьафыкIыгъэ дзэ операцием илъэхъан транспортыр терроризмэм щыухъумэгъэным, ащ дакIоу террористическэ идеологием гъогур фызэпыбзыкIыгъэнымкIэ Iофтхьабзэхэм ыкIи ащ нэмыкI Iофыгъохэм.

Комиссием иIофшIэн хэлэ­жьагъэх АР-м и Къэралыгъо Совет –Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Прокуратурэ, АР-м и МВД, ФСБ-м и ГъэIорышIапIэу Адыгэ Республикэм щыIэм, федеральнэ ыкIи шъо­лъыр къулыкъухэм, муниципалитетхэм япащэхэр.

Урысыем и Президент ихэ­дзынхэм зэрафэхьазырхэм иIофыгъокIэ къэгущыIагъэх ФСБ-м и ГъэIорышIапIэу Адыгэ Республикэм щыIэм ипащэу Михаил Кемеровыр, АР-м хэдзын­хэмкIэ и Гупчэ комиссие итхьаматэу Сэмэгу Нурбый, АР-м гъэсэныгъэмрэ шIэныгъэм­рэкIэ иминистрэу Евгений Лебедевыр.

КъызэрэхагъэщыгъэмкIэ, гъэ­тхапэм и 7-м ехъулIэу хэдза­кIохэм ямэкъэтын зыщыIэщт мафэмрэ ар зэрэкIощт шIыкIэмрэ цIыфхэр ащыгъэгъозэгъэнхэмкIэ проектэу «Информ-УИК» зыфиIорэр гъэцэкIагъэ хъущт. ХэдзэкIо комиссиехэм ахэтхэм республикэм ит унэхэр зэкI пIоми хъунэу къа­кIухьагъэх. Мэкъэтыныр зыщыкIощт чIыпIэ 265-р ауплъэкIугъ, видеолъыплъэным яамалхэмкIэ ахэр зэрэзэтегъэпсыхьагъэхэм игъэунэфын ыкIэм фэкIо. Бюллетеньхэм якъэухъумэнкIэ хэу­шъхьафыкIыгъэ маркэхэмрэ бюллетеньхэмрэ хэдзынхэмкIэ чIыпIэ комиссиехэм аIэкIагъэ­хьагъэх.
КъызэраIуагъэмкIэ, щынэ­гъончъэным ылъэныкъокIэ тер­роризмэ, экстремизмэ нэшанэ зиIэ гумэкIыгъохэр къыхэгъэщыгъэнхэмкIэ ыкIи ахэм апэуцужьыгъэнымкIэ Iофтхьабзэхэр лъагъэкIотэщтых. Къалэу Мые­къуапэ «Щынэгъончъэ къалэр» зыфиIорэм тегъэпсыхьагъэу камерэхэм япчъагъэ нахьыбэ шIыгъэн зэрэфаери къыхагъэщыгъ.

Ащ нэмыкIэу къаIуагъ хэдзын­хэм ялъэхъан гъэсэныгъэ зыщарагъэгъотырэ чIыпIэхэу мы Iофтхьабзэм епхыгъэу щытыщтхэр куп-купэу зэрэзэтыраутыгъэхэр ыкIи паспортхэр зэрагъэхьазырыгъэхэр. Ахэм якъэ­ухъумэни агъэлъэшыгъ.

Адыгеим и ЛIышъхьэ къыхигъэщыгъ муниципалитетхэм япащэхэм хэбзэухъумэкIо къулыкъухэм ыкIи хэдзынхэмкIэ Гупчэ комиссием хэтхэм, джащ фэдэу лъыплъакIохэм гъусэныгъэ пытэ адыряIэным мэхьанэшхо зэриIэр.

«Тэ зэкIэхэми тэшIэ кощын Iофым тынаIэ тедгъэтын, лъыхъон Iоф­тхьабзэхэр нахь чанэу зэшIотхын, социальнэ хъытыухэм тынаIэ атедгъэтын зэрэфаер, лъэпкъэу къызыхэкIыгъэхэмрэ динэу алэжьыхэрэмрэ къапкъырыкIырэ зэпэуцуныгъэхэр къэмыхъунхэр, хэдзын лъэ­хъаным общественнэ щынэгъончъагъэ щыIэныр — лъэныкъо шъхьаIэхэм ащыщ. Къулыкъу пстэуми хабзэм иIофышIэхэм гъу­сэныгъэ пытэ адыряIэу хэдзынхэм языфэгъэхьазырын къыдилъытэрэ Iоф­тхьабзэхэр зэкIэ икъоу зэрахьанхэ фае. Мы лъэхъэнэ благъэхэм тэ типшъэрылъ гъэсэныгъэ зыщарагъэгъотырэ, медицинэ учреждениехэр, социальнэ псэуа­лъэхэр, щапIэхэр, общественннэ шъолъырхэр «Къэлэ щынэгъончъэр» зыфиIорэ системэм къыхедгъэубытэнхэр», — къы­Iуагъ КъумпIыл Мурат.

ХэушъхьафыкIыгъэ дзэ операциер зыщыкIорэ лъэхъаным транспортыр терроризмэм щыухъумэгъэнымкIэ Iофтхьэбзэ тедзэу зехьэгъэн фаехэм къатегущыIагъэх АР-м псэолъэшIынымкIэ, транспортымкIэ, унэ- коммунальнэ ыкIи гъогу хъыз­мэтымкIэ иминистрэ игуадзэу Лафышъэ Рэмэзанрэ Урысые Фе­дерацием и МВД транспортымкIэ и Краснодар гъэIорышIапIэ ипащэу Вячеслав Колесниковымрэ.

ХэушъхьафыкIыгъэу къызщыуцугъэхэр республикэм икъэлэ шъхьаIэ имэшIоку гъогурэ иавтовокзалрэ яIофхэм язытет.Транспортым ищынэгъончъагъэ къэзыушыхьатырэ паспортыр зэкIэ автобусхэм яI. Вокзалхэм къачIахьэхэрэм яуплъэкIункIэ Iэмэ-псымэхэр ачIэтых, кинологическэ пости яI. ЦIыфхэм язещэн фэгъэзэгъэ предприятие пстэуми щынэгъончъэным епхыгъэ лекциехэр афызэхащагъэх.

КъызэраIуагъэмкIэ, респуб­ликэм илъэмыджхэу автомобильхэр зэрыкIохэрэм язытет къэзыушыхьатырэ паспортхэр щыIэх, транспортыр щынэгъончъэнымкIи Iофтхьэбзэ гъэнэфагъэхэр зэрэзэрахьащтхэр агъэ­унэфыгъ. Илъэсэу икIыгъэм Мые­къопэ районым илъэмыджи 4-мэ ягъэIорышIэн зы чIыпIэм къикIэу шIыгъэным пэIухьащт ахъщэр къыхагъэкIыгъагъ. Мы илъэсым икъихьэгъум респуб­ликэм итранспорт инфраструктурэ къыхиубытэхэрэр зэкIэ щынэгъончъэным итехническэ амалхэмкIэ зэтегъэпсыхьэгъэнхэм епхыгъэ IофшIэнхэм язэшIохынкIэ зэзэгъыныгъэ зэда­шIыгъ.

Республикэм имэшIоку гъогу 24-мэ щынэгъончъагъэмкIэ яIоф­хэм язытет тэрэзыным пае Iофтхьабзэу зэшIуахыщтхэм ате­гущыIэхэ зэхъум республи­кэм и ЛIышъхьэ анахьэу анаIэ зытыраригъэдзагъэр Адыгеим имэшIоку гъогухэр зэкIэ джыри нахь щынэгъончъэу шIыгъэнхэр ары.

«Непэ республикэм зекIоу къихьэрэр нахьыбэ мэхъу, анахьэу етIани гъэмэфэ лъэхъаным. Ахэм яфэIо-фашIэхэм язэшIохынкIэ Iофтхьэбзабэ зэрахьэ, терроризмэм ылъэныкъокIи ахэр щынэгъончъэу щытынхэм зэкIэми тынаIэ тедгъэтын фаеу мэхъу. Зэпыу имыIэу ыкIи дэгъоу псынкIэу макъэ къэзгъэIун зылъэкIыщт амалхэу щыIэхэмрэ хэбзэухъумэкIо къулыкъухэмрэ къатефэ­рэр агъэцэкIэн фае», — къыIуагъ КъумпIыл Мурат.

Терроризмэм ипхырыщын къызыпкъырыкIырэ IэкIыб къэрал организациехэм ямурад къадэмыхъуным пае Iофтхьабзэу зэшIуахын фаехэм нэужым ате­гущыIагъэх. АР-м хэгъэгу кIоцI IофхэмкIэ иминистрэу Олег Безсмельницынымрэ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхы­ныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэррэ а лъэныкъомкIэ Iофхэм язытет фэгъэхьыгъэ къэбарым къекIолIагъэхэр щагъэгъозагъэх.

Ахэм къызэрэхагъэщыгъэмкIэ, ныбжьыкIэ экстремизмэм, лъэпкъ зэпэуцужьыныгъэм, Конституцием ыкIи урыс лъэпкъым къыхэкIыгъэхэм апэшIуе­кIогъэным япхыгъэ гухэлъ бзаджэхэр зыдэзыIыгъхэм афэгъэхьыгъэ лъэныкъо 30-м ехъу зэхафыгъ. КъызэрэхагъэщыгъэмкIэ, Донбассрэ Новороссиемрэ къарыкIыжьыгъэхэр общественнэ мэхьанэ зиIэ Iоф­тхьабзэхэм къахагъэлажьэх, республикэм икультурэрэ ишэн хабзэхэмрэ нэIуасэ афашIых. Урысые обществэм нахь псын­кIэу ахэр хэгъозэнхэм пае къэ­бар-гурыгъэIон Iофтхьабзэхэу къэкощыжьыгъэхэм адызэра­хьэхэрэр агъэлъэшынэу респуб­ликэм ипащэ пшъэрылъ афи­шIыгъ.

АР-м и ЛIышъхьэ ипресс-къулыкъу