Бзылъфыгъэхэм я Дунэе мафэ ипэгъокIэу общественнэ организациеу «Адыгэ Республикэм ибзылъфыгъэхэм я Союз» зыфиIорэм тишъолъыр щызэхэщэгъэ общественнэ движениехэм ягуфакIохэм зэIукIэгъу адыриIагъ.

Iофтхьабзэм хэлэжьагъэх Урысые Федерацием и Къэралыгъо Думэ идепутатэу Хьасанэкъо Мурат, партиеу «Единэ Россием» ишъолъыр къутамэ игъэцэкIэкIо комитет ипащэу АфэшIэгъо Рэмэзан, бзылъфыгъэхэм я Союз хэтхэр, Хэгъэгум изэолIхэм яунагъохэм я Комитет ипащэу Ольга Пронтенкэр, общественнэ движениехэм ялIыкIохэр.
ХэушъхьафыкIыгъэ дзэ операциер зырагъэжьагъэм къыщублагъэу куп гъэ­нэ­фагъэхэу: «Сетевой Плацдарм», «Надежда», «Все для фронта — Все для Победы» ыкIи «Тихий фронт» зыфиIохэрэм тизэолIхэм ящыкIэгъэ шIушIэ IэпыIэгъур аIэкIагъэхьанымкIэ алъэкI къызэрамыгъанэрэм фэшI общественнэ организациер зэрафэразэр мы зэIукIэгъумкIэ къыраIотыкIыгъ ыкIи а гумзэгъэ бзылъфыгъэхэм мэфэкIымкIэ афэгушIуа­гъэх.
— Къэблэгъэрэ мэфэкIымкIэ сыгу къыздеIэу сышъуфэгушIо. Шъо, бзылъфыгъэ ныхэр, бэ шъупшъэ ифэрэр, шъуилъэкI къыхьырэр. Шъуигухэлъхэр къы­жъудэхъухэу, псауныгъэ пытэ шъуиIэу, шъукIуачIэ къыкIимычэу бэрэ шъущыIэнэу сышъуфэлъаIо! — къыIуагъ Хьасанэкъо Мурат.
АР-м и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат ыцIэкIэ бзылъфыгъэхэм закъыфигъэзагъ АфэшIэгъо Рэмэзан. Дэхагъэу, шIоу щыIэр апэкIэ къикIызэ щыIэнхэу ар къафэ­лъэIуагъ.
— ТизэолIхэмкIэ мэхьанэ зиIэр тылыр пхъашэу къазэрэкъотыр ары. Шъо шъуфызэшIохырэр бэ, шъоры мыхъумэ ТекIоны­гъэр къэблэгъэщтэп. Сыда пIомэ ахэм агу къызэрэдэшъущаерэм мэхьанэшхо иI, унэм къызэрэщяжэхэрэри ашIэ. Тучаным къыращыгъэ псым е гъомылапхъэм нахьи, унэм къикIэу ахэм афащэрэр бэкIэ нахь ашIоIэшIу, ащ кIуачIэ къареты. Арышъ, IофшIэнэу жъугъэцакIэрм пае тышъуфэраз, — хигъэунэфыкIыгъ «Единэ Россием» ишъолъыр къутамэ игъэцэкIэкIо комитет ипащэ.

Джащ фэдэу хэушъхьафыкIыгъэ дзэ операцием хэлажьэхэрэм IэпыIэгъу афэ­хъугъэнымкIэ агу къикIэу зэхэхьэгъэ бзылъфыгъэ купхэм яIофшIэн уасэ зэрэфэшIыгъуаер къыхигъэщыгъ Адыгеим ибзылъфыгъэхэм я Союз итхьаматэу Вэрэкъо Хьалимэт.
— ШIушIэ IэпыIэгъу зэфэ­шъхьафхэм яугъоинкIэ, «мас­кировочнэ» хъытыухэм яб­лэн­кIэ, Iофтхьэбзэ зэфэшъхьаф­хэм язэхэщэнкIэ IофшIэнышхо зэрэзешъухьэрэм тидзэкIолI­хэм­кIэ мэхьанэшхо иI, ащкIэ «тхьашъуегъэпсэу» шъотэIо, — къыIуагъ Вэрэкъо Хьалимэт.
ГуфэкIо бзылъфыгъэхэр нэпэеплъ шIухьафтынхэмкIэ ыкIи къэгъэгъэ Iэ­рам­хэмкIэ агъэшIуагъэх.
Iэшъынэ Сусан.
Сурэтхэр: Iэшъынэ Аслъан.