Дунэе къэгъэлъэгъон-форумэу «Урысыер» зыфиIоу ВДНХ-м щызэIухыгъэм иIофшIэн къыдыхэлъытагъэу Урысые бзылъфыгъэ форумэу гъэтхапэм и 5 – 6-м щыкIуагъэм Адыгеим илIыкIохэр хэлэжьагъэх. Ащ шъхьэу иIагъэр – «Бзылъфыгъэхэр: шэн-хабзэхэр къэтэухъумэх – Урысыем хэхъоныгъэ фэтэшIы».

УФ-м и Федеральнэ зэIукIэ ФедерациемкIэ и Совет Iофтхьабзэм икIэщакIу ыкIи щыIэныгъэм илъэныкъо пстэуми Урысыем инепэрэ бзылъфыгъэхэр зэрахэлажьэхэрэр, ахэм ягъэхъагъэхэр къэгъэлъэгъогъэныр ары пшъэрылъэу иIагъэр.
Урысые бзылъфыгъэ форумыр язэ­IукIапIэ хъугъэ къэралыгъом ишъолъыр пстэуми къарыкIыгъэ бзылъфыгъэхэу сэнэхьат зэфэшъхьафыбэмэ арылажьэ­хэрэр яIофшIэкIэ амалхэмрэ ягъэхъагъэхэмрэкIэ зэдэгощэнхэм, гумэкIыгъоу къэуцухэрэм атегущыIэнхэм ыкIи ахэм язэшIохыкIэ къызэдагъотыным апае.
Мафэхэу Iофтхьабзэр зыщыкIуагъэхэм шъолъырхэм якъэгъэлъэгъуапIэхэмрэ ВДНХ-м лъэныкъо зэфэшъхьафхэм афэгъэхьыгъэхэу щыгъэпсыгъагъэхэмрэ къащатыгъ яшъолъырхэм яхэхъоныгъэ, псауныгъэм икъэухъумэн, социальнэ лъэныкъом, гъэсэныгъэм, шIэныгъэм, къыдэгъэкIыжьыным, технологие пэрыт­хэм, псэолъэшIыным, культурэм, тыкъэ­зыуцухьэрэ дунаим икъэухъумэн, агъэ­лъэпIэрэ зэхэтыкIэ шапхъэхэм бзылъ­фыгъэхэм яIахьэу хэлъыр.
Адыгеим илIыкIо куп чанэу форумым хэлэжьагъ. Ащ хэтыгъэх Наталья Арте­мь­евар, Мыекъуапэ и Народнэ депу­татхэм я Совет хэтыр, псэолъэшI ком­паниехэм ащыщ игенеральнэ пащэ ыкIи Ассоциа­циеу «Женщины бизнеса» зыфиIорэм иправление хэтыр; Наталья Долбинар, мы Ассоциацием итхьаматэ ыкIи шъо­лъыр хэхъоныгъэмкIэ пащэр.
Форумым къекIолIагъэхэм Урысыем и Президент закъыфигъэзагъ ыкIи къыт­кIэхъухьэрэ ныбжьыкIэхэм япIункIэ, гушъхьэбаиныгъэмрэ шэн-хабзэхэмрэ якъызэтегъэнэнкIэ бзылъфыгъэм имэхьанэ зэрэапшъэм къыкIигъэтхъыгъ.
«Бзылъфыгъэхэр арых еджапIэхэмрэ кIэлэцIыкIу IыгъыпIэхэмрэ ащылажьэхэрэр, гъэсэныгъэм ылъэныкъо апшъэрэ чIыпIэ щызыIыгъхэр. Бзылъфыгъэхэр – унагъом игупчэх, зэгурыIоныгъэм, шIулъэгъуныгъэм ыкIи гукIэгъуныгъэм якъэкIуапIэу щытых. Ащ къыпкъырэкIы унагъом и Илъэс шъуизэIукIэгъу зэрэтефагъэри, шъуи­форум игупшысэ шъхьаIи — «Бзылъфыгъэхэр: шэн-хабзэхэр къэтэухъумэх – Урысыем хэхъоныгъэ фэтэшIы», – къыIуагъ Владимир Путиным.
Президентым мы илъэсыр унагъом зыфегъэхьым лъэбэкъу ин зэришIы­гъэр УФ-м и Федеральнэ зэIукIэ и Федеральнэ Совет и Тхьаматэу Валентина Матвиенкэм къыхигъэщыгъ, ащкIэ сабыибэ зэрыс унагъом зыкI статус зэрэфишIыгъэр къыIуагъ.
«Шъолъырыбэ ащ зэрежагъэр сэшIэ. КъэсымыIон слъэкIыщтэп бэмышIэу Президентым и Джэпсалъэ программэу зигугъу къыщишIыгъэм фэгъэхьы­гъэу. Шъори гу лъышъутагъэн фае ащ иедзыгъо пэпчъ цIыф­хэм, сабыйхэр зэрыс уна­гъохэм ящыIакIэ къэIэтыгъэным зэрэ­фэ­гъэхьыгъагъэр», — къыхигъэщыгъ Валентина Матвиенкэм.
«УФ-м и Президентрэ и Правительствэрэ къапкъырыкIырэ къэралыгъо программэхэу бзылъфыгъэхэм афэгъэхьыгъэ пстэури чанэу Адыгеим щыпхыращы. Бзылъфыгъэхэм алъэ­кIыщтэу зыфэщагъэхэр пхыращын амалхэр яIэным АР-м и ЛIышъхьэу КъумпIыл Мурат пылъ. Ныгъомрэ сабыигъомрэ, унагъом IэпыIэгъу ягъэгъотыгъэныр тишъолъыр иполитикэ илъэныкъо шъхьаIэу къэнэжьыщтых», — къаIотагъ тилIыкIо куп хэтхэм.
Адыгеим икъэгъэлъэгъон къекIолIа­гъэх шъолъыр зэфэшъхьафхэм къарыкIыгъэхэу Урысые общественнэ организациеу «Женщины Бизнеса» зыфиIорэм хэтхэр. Iофтхьэбзэ зэфэшъхьафэу ащ щызэхэщагъэхэм ахэр ахэлэжьагъэх, IэрышI акъылым иамалхэу тикъэгъэлъэгъон къыщытыгъэхэу нэмыкIхэм къазэрэхэщырэр къызфагъэфеди, нэбгырэ пэпчъ ар къызфагъэлъэIуагъ.
Наталья Артемьевам къытыгъэ къэбархэмкIэ къэзыгъэхьазырыгъэр

МэшIодз Саид.
Сурэтхэр: Наталья Артемьева.