Къэралыгъо хъарзынэщ къулыкъум изэтегъэуцон ыкIи ихэгъэхъон Адыгеим итарихъ гопчын умы­лъэкIынэу зэхъо­кIыны­гъэхэм пытэу япхыгъ.

Къэралыгъо хъарзынэщ къулыкъум иилъэси 100 фэгъэхьыгъэ Iофтхьабзэу «Адыгеим ита­рихъ документхэмкIэ» зыфи­Iорэр АР-м илъэпкъ тхылъ­еджапIэ щызэхащагъ. МэфэкIым къыдыхэлъытагъэу, документхэмкIэ ыкIи тхыгъэхэмкIэ хъарзынэщ сборникищым ялъэтегъэу­цо щыIагъ. Ахэр: «Национально-­государственное строительство Адыгеи. 1920 — 1930-е гг.: до­кументы и материалы (к 100-летию образования Адыгей­ской (Черкесской) автономной области» (1922 г.), «Адыгейская автономная область в условиях экономической и социальной модернизации 1933 — 1941 гг.: документы и материалы (к 100-летию образования Адыгейской (Черкесской) автономной области», «Адыгейская автономная область в годы Великой Отече­ст­венной войны 1941 — 1945 гг.: документы и материалы (к 80-
летию освобождения от не­мецко-фашистской оккупации)». Мы­хэм зэфэдэу Адыгеим ыкIи Пшызэ къэралыгъо университетым яшIэныгъэлэжьхэр адэлэ­жьагъэх.
МэфэкI Iофтхьабзэм хэлэжьагъэх АР-м и Лъэпкъ хъарзынэщ ипащэу БрантI Азэмат, тарихъ шIэныгъэхэмкIэ докторэу, профессорэу, АКъУ-м тарихъымкIэ ифакультет идеканэу ПэкIэшхо Нурбый, тарихъ шIэныгъэхэмкIэ кандидатэу, Пшызэ къэралыгъо университетым тарихъымкIэ икафедрэ идоцентэу ЯхъулIэ Юрэ, педагогикэ шIэныгъэхэмкIэ кандидатэу, Адыгэ кIэлэ­егъэджэ колледжэу Хъ. Андыр­хъуаем ыцIэ зыхьырэм ипащэу Къэгъэзэжь Мурат.
Тхылъ къэгъэлъэгъонэу
«АР-м и Къэралыгъо хъарзынэщ къулыкъу иилъэси 100 гъогу» зы­фиIорэм мэфэкIым къеблэгъагъэхэр фигъэнэIосагъ тхылъеджапIэм научнэ-методикэ отделымкIэ иметодист шъхьаIэу, тарихълэжьэу, АР-м изаслу­женнэ журналистэу Александр Данильченкэм.
ТхылъымкIэ апэрэ гущыIэ игъэкIотыгъэр «Адыгэ автоном хэкур Хэгъэгу зэошхом илъэ­хъан: документхэмкIэ ыкIи тхы­гъэхэмкIэ» зыфиIорэмкIэ къы­шIыгъ тарихъ шIэныгъэхэмкIэ докторэу, профессорэу, хэгъэгу тарихъымкIэ АКъУ-м икафедрэ ипащэу Елена Малышевам. Джащ фэдэу лъэтегъэуцом хэ­лэжьагъэхэм зигъо Iофыгъо­хэмкIэ, хъарзынэщ къулыкъум ипшъэрылъ ин, зэрифэшъуашэу документхэр гъэфедагъэ хъунхэмкIэ ыкIи цIыфхэм ахэр зэлъягъэшIэгъэнхэмкIэ, шIуагъэ къатэу гъэпсыгъэнымкIэ Iофышхоу ашIэрэр щыкIагъэтхъыгъ. Мы сборникищым язэхэгъэуцон дэлэжьэгъэ авторхэм ащыщэу, журналистикэмкIэ факультетым идеканэу, Урысые тарихъымкIэ кафедрэм ипащэу, тарихъ ыкIи социологие шIэныгъэхэмкIэ докторэу, Пшызэ къэралыгъо университетым ипрофессорэу Валерий Касьяновым ыцIэ къы­раIуагъ.
Лъэтегъэуцом хэлэжьагъэх АКъУ-м итарихъ факультет, Адыгэ кIэлэегъэджэ колледжэу Хъ. Андырхъуаем ыцIэкIэ щытым ястудентхэр, АР-м и Лъэпкъ хъарзынэщ илIыкIохэр, Лъэпкъ тхылъеджапIэм иIофышIэхэр, журналистхэр.
Дзэукъожь Нуриет.