Пшызэ инэпкъ кIэрыс чылэ зэ­кIужьэу Бжы­хьэкъое­жъым щы­псэурэ Барцо Хьилымрэ ишъхьэгъусэу Кулэрэ пшъашъэу къа­фэхъугъэм Асиет фаусыгъ. Игъо къэсышъ, ­еджапIэм ар макIо, ­къеухы, сэнэхьатэуыгу рихьыщтыгъэм феджэ­нэу Мыекъуапэ дэт медицинэ училищым чIэхьэ.

Ятэу Хьилым Хэгъэгу зэо­шхом уIэгъэ хьылъэ къыщытыращагъэу, ылъакъуи пымыты­жьэу дзэ госпиталым къыщеIэзагъэхэу щытыгъэти, врачхэм якъэбар бэрэ къыIуатэу Асиет зэхихыщтыгъ, арын фае ыгу пытэу зыкIыриубытэгъагъэр ме­дицинэм феджэнэу. Игухэлъи къыдэхъугъ, 1968-рэ илъэсым училищыр къыухыгъ фельдшер сэнэхьатыр иIэу. А лъэхъаным специалистхэр зыщищыкIэгъэ чIыпIэм ­агъакIощтыгъэх. Асиети Теуцожь районым, къутырэу ­Краснэм Iоф щишIэнэу къагъа­кIо, ащ инасыпи щегъоты
— ­Бэгъушъэ Аскэр шъхьэгъусэ фэхъу. Аскэр кIэлэегъаджэу Аскъэлэе гурыт еджапIэм Iоф щишIэщтыгъ, ащ къыхэкIэу ежьыри фельдшер-мамыку IэзапIэм Iоф щишIэнэу а къуаджэм зыкъе­гъазэ. Аскэррэ Асиетрэ кIэлищ апIугъ, апшъэрэ гъэсэныгъэ арагъэгъотыгъ, унэгъо зырыз хъугъэхэу мэпсэух. Аскэр идунай ыхъожьыгъэми, икIалэхэм зэгурыIоныгъэ азыфагу илъэу, янэ лъытэныгъэ фашIэу, унэгъо дахэхэу лIакъом хэуцуагъэх. Аскъэлэе ФАП-м Iоф зыщи­шIэрэр илъэс 55-рэ хъугъэшъ, чылэм ащ ищытхъу бэрэ щаIо. «Асе цIыкIур», «Типшъэшъэ дах» — нэжъ-Iужъэу чылэм дэсхэр джары ащ зэреджэхэрэр.
Асиет иIофшIакIэ осэшхо фашIыгъ, 1983-рэ илъэсым «СССР-м псауныгъэр къэухъу­мэгъэнымкIэ иотличник» зыфи­Iорэ щытхъуцIэр къыфагъэшъошагъ, ар Теуцожь районым ицIыф гъэшIуагъ, щытхъу тхы­лъэу къылэжьыгъэр бэ. Сыд фэдэрэ уахъти, чъыIи ощхи имы­Iэу лIэшIэгъуныкъом ехъурэ цIыфмэ япсауныгъэ ащ къыу­хъумагъ. Адыгэ шэн-зекIокIэ дахэу хэлъхэм яшIуагъэкIэ цIыф­мэ ащ ыцIэ дахэкIэ раIоу, жъи кIи шъхьэкIафэ фашIэу, шIу алъэгъоу хъугъэ. Ащ осэшхо иI.
Асиет къызыхъугъэ мафэр бэмышIэу хигъэунэфыкIыгъ, ащ пае аскъэлаехэмкIэ тыгу къыддеIэу тыфэгушIо, тыфэлъаIо икъорэлъфхэм яхъяр ылъэгъоу, ищытхъу хахъоу илъэсыбэрэ тиIэнэу.
Участковэ терапевтэу, заслуженнэ врачэу, Аскъэлае ицIыф гъэшIуагъэу Хъут Рузанэ Станислав ыпхъум еIо: «Сэри къо­джэдэсхэм адесэгъаштэ, сыгу къыздеIэу сыфэгушIо Асиет имэфэкI мафэ пае. Аскъэлае лIэшIэгъуныкъом ехъурэ цIыф­хэм япсауныгъэ къэуухъумэу удэ­сыгъ, Асиет, шIу уалъэгъугъ.уиIофшIагъэрэ уиIэпэIэсэны­гъэрэ щысэтехыпIэ ныбжьыкIэмэ афэрэхъу!»
Ары, цIыфыбэмэ шIу уалъэгъуным Iоф хьылъэ пылъ. Ау Асиет ар фызэшIокIыгъ.
Зэрэчылэу тыпфэгушIо, ­Асиет!
Цэй Ерстэм,
къу. Аскъэлай.