Мыщ фэдэ шъхьэ зиIэ мэшIоку Мыекъуапэ иуцупIэ тыгъуасэ къытехьагъ. [caption id="attachment_146823" align="aligncenter" width="800"] Александра Балабась.[/caption] Iофтхьабзэм пшъэрылъэу иIэхэр зыпкъ­итыныгъэ цIыфхэм ахэлъыныр, непэрэ мафэхэм къэралыгъор зэрэуIэшыгъэр къэгъэлъэгъогъэныр, дзэ тарихъыр чIямыгъэукъощэгъэныр, ныбжьыкIэхэм якъэралыгъо шIу алъэгъоу къэтэджынхэр ыкIи тидзэкъулыкъушIэхэу хэушъхьафыкIыгъэ дзэ операцием тичIыгу инамыс къыщызыухъумэхэрэм агу къыдащэеныр ары. ЗэхэщакIор — Урысыем УIэшыгъэ КIуачIэхэмкIэ и Министерств. МэшIокур Хэгъэгум иухъумакIохэм я Мафэ Москва и Киевскэ вокзал къыIукIыгъ, ТекIоны­гъэ­шхом и Мафэ ехъулIэу Москва и Белорусскэ вок­зал техьажьыщт. Уры­сые Федерацием ишъо­лъыр 67-мэ ямэ­шIоку уцупIэ 75-мэ ар къащы­уцущт, респуб­ли­кэм икъэ­лэ шъхьаIэ ыуж Черкесскэ дэхьащт. Мыекъуапэ мэшIокум мэфэкI шIыкIэкIэ щыпэ­гъо­кIыгъэх. Пчэдыжь пасэм къы­щыуб­лагъэу юнармейцэхэмрэ дзэ оркестрэмрэ мэшIоку къэуцупIэм те­ты­гъэх. Сыхьатыр 8-м къэблэгъэрэ мэ­шIокум ишIуфэс макъэ къэIугъ. Мыекъопэ гарнизоным ипащэ ип­шъэ­рылъхэр зыгъэцэкIэрэ Константин Ко­пыловым нэужым лъигъэIэсыгъ ХышIуцIэ апшъэрэ хыдзэ училищэу На­химовым ыцIэ зыхьырэм ипащэу, контр-адмиралэу Александр Гринкевич Iоф­тхьабзэм ире­гъэ­кIокIын зэрэфэхьа­зыр­хэр. МэшIокур къызэсым митинг зэхащагъ, об­ще­ственнэ ыкIи ветеран организа­циехэм ахэтхэр ащ къыщыгущыIагъэх. Я 175-рэ стрелковэ полкым ибыракъ Мые­къуапэ ренэу къ­ы­ща­у­хъумэнэу мэшIокум ипа­щэ къаритыгъ. Мые­къуапэ щызэхащэгъэ полкэу я 347-рэ стрел­ковэ дивизием хэтыгъэм иапэрэ дзэ ушэтыпIагъэр 1941-рэ илъэсым ишэ­кIогъу мазэ Кавказ ишъхьафитыныгъэ зы­щы­­фэбэнэгъэхэ заор ары. Нэужым Къырым­рэ Прибалтикэмрэ яшъхьа­фитныгъэ икъы­дэхын хэлэжьагъ. Къыб­лэ, Кавказ­кIыб, Темыр-Кав­каз, я 4-рэ Украинскэ, а I-рэ При­балтийскэ ыкIи Ленинградскэ зэ­уапIэхэм ащыкIогъэ зэмызэгъыныгъэхэм ядэгъэ­зыжьын хэлэжьагъ. Псэе­мыблэ­жь­ныгъэу, лIыгъэу ыкIи лIыблэнагъэу ащ хэтхэм къызхагъэфагъэм пае полкым щытхъуцIэу «Митавский» зыфиIорэр къыфагъэ­шъошагъ. КъекIолIагъэхэм закъыфигъэзагъ контр-адмиралэу Александр Гринкевич. — МэшIокур Мыекъуапэ къыщыублагъэу Владивосток нэс кIощт, Гудермес щегъэжьагъэу Мурманскэ нэсыщт. Жъо­ныгъуакIэм и 8-м, ТекIоныгъэм и Мафэ ия 79-рэ илъэс ипэгъокIэу, Москва и Белорусскэ вокзал къыщыуцужьыщт. ШIоигъоныгъэ зиIэ пстэуми вагонибгъумэ ащыугъоигъэ къэгъэлъэгъонхэу УIэшыгъэ КIуачIэхэм ялъэныкъо зэфэшъхьафхэм, дзэ лъэпкъ зэмлIэужыгъохэм, тятэжъхэмрэ тятэжъ пIашъэхэмрэ агъэфедэщтыгъэ Iашэхэу тикъэралыгъо ишъхьафитыныгъэ къыдахы зэхъум агъэфедэщтыгъэхэм къатегущыIэхэрэм ащяплъынхэ алъэкIыщт, — къыIуагъ А. Гринкевич. Адыгеим и ЛIышъхьэ ыцIэкIэ къызэ­рэугъоигъэхэм закъыфигъэзагъ АР-м и Къэралыгъо Совет – Хасэм и Тхьаматэ игуадзэу, Урысыем и ЛIыхъужъэу Цэй Эдуард. — УФ-м зыкъэухъумэжьынымкIэ и Министерствэу мы Iофтхьабзэм изэхэщакIо сыфэраз мэхьэнэ ин зиIэ Iофыгъоу УФ-м илъэпкъыбэ зэрэзэрипхырэм имызакъоу, къэралыгъом илъэшыгъэ — кIуачIэм шъыпкъэр, зэфагъэр ыкIи зыкIыныгъэр зэрялъапсэр къэзгъэшъыпкъэжьырэр зэрэзэхащагъэм пае. Ти Президентэу, Апшъэрэ дзэпащэу Владимир Путиным къызэриIуагъэу, Урысыем сыд фэдэ джэгъогъу зекIуакIи джэуап ритыжьын ылъэкIыщт, — къы­Iуагъ Цэй Эдуард. ТилIэужхэм якъэралыгъо шIу алъэгъоу тпIунхэм имэхьанэ зэрэинми ЛIыхъужъым къыкIигъэтхъыгъ. — Украинэм къыщыхъухэрэр тари­хъыр зымышIэжьхэрэм язекIуакIэхэм бгъэтэрэзыжьын умылъэкIыжьыщт хъугъэ-шIагъэхэр къызэрэздахьышъущтхэм ищысэх. Непэ Урысыер джыри неонацизмэм ебэнын фае хъугъэ ищынэгъон­чъагъэрэ ишъхьафитныгъэрэ къыухъумэхэзэ. Донбасс икъэухъумэн фэгъэхьыгъэ хэушъхьафыкIыгъэ дзэ операцием ти­дзэ­кIолIхэм лIыгъэшхо щызэрахьэ дзэ пшъэрылъ къинхэр щагъэцакIэхэзэ. Тилъэхъан ахэм лIыхъужъныгъэу Хэ­гъэгу зэошхом игъом тятэжъхэм къагъэлъагъощтыгъэм ебгъэпшэн плъэкIыщтхэр къахэфэх, — къыIуагъ Цэй Эдуард. Урысыем и ЛIыхъужъхэу Роман Тороховымрэ Олег Цоковымрэ ацIэхэр юнармием иотрядитIумэ афэусыгъэным фэгъэхьыгъэ Iофтхьабзэм зэIукIэр лъи­гъэкIотагъ, нэбгырэ 35-рэ дзэ-патри­отическэ движением джыри хагъэхьагъ. Сыхьат заулэм къыкIоцI экскурсионнэ мэшIокур Мыекъуапэ щыпсэухэу ыкIи ихьакIэхэу нэбгырэ минитIум нахьыбэмэ зэрагъэлъэгъугъ. Джащ фэдэу вокзал Iупэм концертышхо къыщатыгъ, дзэ пщэрыхьапIэр щызэIухыгъагъ, лъэхъэнэ зэфэшъхьафхэм агъэфедэщтыгъэ Iашэм ыкIи дзэ техникэм якъэгъэлъэгъон щызэхэщэгъагъ. Александра Балабась.