Непэ, гъэтхапэм и 6-м, Къэралыгъо телерадиокомпаниеу «Адыгеим» и Мафэ хегъэунэфыкIы.Илъэс 31-кIэ узэкIэIэбэжьмэ, 1993-рэ илъэсым, Урысые къэралыгъо телерадиокомпание инэу хэгъэгум щылажьэрэм ишъолъыр къутамэу Адыгеим ар къыщызэIуахыгъагъ. Апэрэ пащэу иIагъэр КIэрэщэ Аслъанбэч. Ащ къыщегъэжьа­гъэу зэпымыоу къэралыгъо бзитIумкIэ, адыгабзэкIэ ыкIи урысыбзэкIэ, Iоф ешIэ. Джащ фэдэу радиоэфирым ара­пыбзэкIэ ыкIи тыркубзэкIэ къехьэ. Ащ ишIуагъэкIэ хэхэс адыгэхэр хэкум щыхъурэ-щышIэрэм щэгъуазэх. Телеканалхэу «Россия 1», «Россия 24» ыкIи радиоканалхэу «Радио России», «Маяк» зыфиIохэрэм икъэтынхэр къарэхьэх. Непэ КъТРК-у «Адыгеир» республикэм икъэбарлъыгъэIэс амал шъхьаIэхэм ащыщ. Медицинэм, гъэсэныгъэм, политикэм, культурэм, спортым — щыIэныгъэм илъэ­ныкъо пстэумкIи шъолъырым щыхъурэ- щышIэрэр псынкIэу, шъыпкъагъэ хэлъэу къеIуатэ. ТичIыгогъу цIэрыIохэм, лэжьа­кIохэм, шIэныгъэлэжьхэм ыкIи нэмыкIыбэу республикэм хахъо езыгъэшIэхэрэм, ыцIэ дахэкIэ зыгъэIухэрэм афэгъэхьыгъэ къэтыныбэ егъэхьазыры, ахэр цIыф­хэм зэлъарегъашIэ, зигъо Iофыгъохэм афэгъэхьыгъэ упчIэхэр къеIэтых, ахэр зыщызэхафырэ зэдэгущыIэгъухэм, къэтынхэм адэлажьэ.

Непэ телерадиокомпаниеу «Адыгеир» зэхъокIыныгъэшIухэм ягъогу тет. БлэкIыгъэ илъэсым къыщегъэжьагъэу Пхъэш Ащэмэз телерадиокомпаниеу «Адыгеим» ипащ. IофшIэныр зэригъэпсыщтымкIэ ащ мурадышхохэр иIэх, IофшIэныр гъэлъэшыгъэнымкIэ амалхэм яусэ. Къыдэхъу­гъэхэм ащыщ телерадиокомпанием иэфир уахътэ нахьыбэ зэрэхъугъэр. Мы илъэсым къыщегъэжьагъэу икъыдэкIыгъохэм зы сыхьат къахэхъуагъ. Телеканалэу «Россия 1» зыфиIорэм къызэрэщыдэкIыщтыгъэхэ уахътэм пчыхьэм сыхьатыр тфым ыныкъом къыщыублагъэу хым ыныкъом нэс къыхэхъуагъ. Ащ елъытыгъэу, культурэм ыкIи шэн-хабзэхэм, тарихъым, бзэм афэгъэхьыгъэ къэтыныкIэхэм ягъэ­хьазырын телевидением иIофышIэхэр непэ дэлажьэх. Ахэм ащыщхэр эфирым къихьэгъахэх ыкIи еплъыхэрэм шIу алъэ­гъунхэу игъо ифагъэх. Джащ фэдэу рес­публикэм итеатрэхэм агъэуцугъэхэр, Адыгеим ирежиссерхэм яфильмхэр къагъэ­лъагъохэзэ ашIыщт. Гъэхъагъэхэр зышIырэ цIыфхэр къырагъэб­лагъэхэзэ эфирым занкIэу къихьэрэ къэтынхэри зэхащэщтых.

А пстэури зэшIохыгъуае хъущтыгъэ IэпэIэсэныгъэ ин зыхэлъ IофышIэ купыр ары мыхъугъагъэмэ. ЯсэнэхьаткIэ пытэу зэтеуцогъэ IофышIэхэр, IэпэIэсэныгъэ ин зыхэлъ журналистхэр, редакторхэр, режиссерхэр, операторхэр, видеоинженерхэр непэ телерадиокомпанием щэлажьэх. Ахэм ренэу яшIэныгъэхэм аха­гъахъо, лъэхъаным изэхъокIыныгъэхэм задырагъаштэ, агъэхьазырырэ къэтынхэр къяплъыхэрэм нахь ашIогъэшIэгъон хъун­хэм пае кIэ горэхэм алъэхъух. Непи, телерадиокомпанием иIофышIэхэм я Мафэ, лэжьапIэм щыпэгъокIых. Мафэм ихъугъэ-шIагъэхэр цIыфхэм къафаIотэным фагъэхьазырых. Республикэ гъэзетэу «Адыгэ макъэм» щылажьэхэрэр телерадиокомпаниеу «Адыгеим» иIофышIэхэм я МафэкIэ афэгушIох. Анцокъо Ирин.