Жъы хъугъэ е узэзэщыгъэ щыгъынхэр имыдзыжьыщтхэмэ сыда япшIэ­щтыр? АР-м имысатыу зэхахьэу, шIушIэ Гупчэу «Важные вещи» зы­фиIорэм зэхищэгъэ Iофтхьабзэу «Эко-девичниккIэ» зэджагъэр упчIэм иджэуап нэрылъэгъу хъугъэ.

Творческэ цIыфхэр, мысатыу зэхэхьэ зэфэшъхьафхэм ялIыкIохэр, волонтерхэр, АР-м куль­­турэмкIэ, IофшIэнымрэ соци­альнэ хэхъоныгъэмрэкIэ иминистерствэхэм яIофышIэхэр — пстэумкIи нэбгыри 150-рэу ащ къекIолIагъэмэ щыгъынхэм ятIонэрэ щыIэныгъэ зэрагъотыжьырэр къарагъэлъэгъугъ. Амыгъэфедэжьырэ щыгъынхэм ахэшIыкIыгъэ хьап-щыпхэм ягъэ­хьазырынкIэ мастер-классхэм хьакIэхэр ахэлэжьагъэх, ежь-­ежьырэу гъэдэхэн пкъыгъохэр зыфашIыжьыгъэх, кIэдыкIыжьыгъэ Iэпэщысэхэм яермэлыкъи Iоф ышIагъ. Ау «Эко-девични­кым» ыгупчэу, нахь шъхьаIэу хъугъэр джинсым хэшIыкIыгъэ зэштэгъу 30-м ехъоу Iофтхьа­бзэм къыщагъэлъэгъуагъэхэр ары. Пстэури ащыгъыгъэ щы­гъынхэм ахэдыкIыгъэх. АКъУ-м и Мыекъопэ къэралыгъо гумани­тар-техническэ колледж иеджа­кIохэм ахэм ягъэхьазырын Iоф да­шIагъ. Модельер-конструкто­рэу адэлэ­жьагъэр еджапIэм ия 4-рэ курс ис Александр Ко­вальчевскэр ары.

— Щыгъынхэм ягъэхьазырын илъэсрэ Iоф дэсшIагъ. А 30-р непэ алъэгъуным пае цIыфхэм къытфахьыжьыгъэ щыгъыныжъ килограмми 100 пчъагъэ дгъэфедагъэ. Ахэр дгыкIыгъэх, дгъэ­тIэпIыжьыгъэх, дгъэнэфэгъэ шап­­хъэхэмкIэ икIэрыкIэу тыдыжьыгъэх. Дэным сызыпылъ илъэс 12-м къыкIоцI мыщ фэдэу сшIогъэшIэгъон дэдэу Iоф зэ­рэсшIагъэр апэрэ. ШэкI бзыхьафышхом тебгъэлэнтхъыкIынышъ, хэбдыкIыщтым ар фэдагъэп. Щыгъыныжъхэм къахэкIыгъэ бзыхьаф Iахьхэм задебгъэштэн, имыкъурэм гуадзэ фэп­шIын фае, — къытфиIотагъ Александр. КIэпхынхэр, гъончэджхэр, кIэко зэпылъхэр, джанэхэр — пстэури джырэ модэм диштэу дыгъэх. НыбжьыкIэхэм къащегъэжьагъэу зыныбжь хэкIота­гъэхэм анэсэу къякIунхэу гъэ­псыгъэх. — Илъэс 17-м къыщегъэжьагъэу 62-м нэс зыныбжьхэм апае щыгъынхэр дгъэхьазырыгъэх. Сэ сипшъэрылъыгъэр, зыщы­гъыщтхэм ялъытыгъэу, шэкIым инэшанэхэр къыдэслъытэхэзэ, тызфадэхэрэм анэгукIи, апкъ зэхэлъыкIэкIи къякIущт дыкIэ шIыкIэхэр згъэнэфэнхэр ары ыкIи къыддэхъугъэу сэлъытэ. IофшIэныр сэркIэ гъэшIэгъон дэдагъ. А зы къэгъэлъэгъоным модель зэфэшъхьафхэм уащыдэлэжьэнэу зырыз къызэрэха­фэрэр. НахьыбэрэмкIэ пшъэшъэ ныбжьыкIэ лъэпэ-лъагэх, — тыщигъэгъозагъ Iофтхьабзэм истилистэу Нэлбантова Лилие. КъэIогъэн фае. ежь зэхэща­кIохэми кIэдыкIыжьыгъэ зэштэгъухэр ащыгъыгъэх. АР-м имысатыу зэхахьэу, шIушIэ гупчэу «Важные вещи» зыфиIорэм ипащэу Ирина Дербеневам джинсым хэшIыкIыгъэ кIэпхын зэпылъыр щыгъэу хьа­кIэхэм апэгъокIыгъ. А мафэм ар илъэсрэ ежагъ. — Непэрэ мэфэкIыр илъэс IофшIэгъум изэфэхьысыжь. Джащ фэдизрэ ащ тыкъыфэ­кIуагъ. БлэкIыгъэ илъэсым Пре­зидентым ифонд икультурнэ гукъэкIхэмкIэ зэнэкъокъум ты­хэлажьи, республикэм ипроектитIоу ащ пхырыкIыгъэмэ яз тыхъугъ. Ащ къыкIэкIогъэ ахъщэм ишIуагъэкIэ тигупчэ иIоф­шIэн ригъэжьагъ. Типроект итхъухьэ зэхъум, шIушIэныр ыпэ идгъэшъыгъ, ау творческэу, ямышIыкIэу зэрэщытын фаери къыдэтлъытагъ ыкIи щыгъыныжъхэм ящыIэныгъэ лъыгъэ­кIотэгъэным зыфэдгъэзагъ. Ащ елъытыгъэу къэралыгъо мылъкур щыгъыныжъхэм ятIонэрэ щыIакIэ агъотыжьын зэралъэкIыщтыр къызщытIотэгъэ мастер-класс 17 редгъэкIокIыгъ. Мы лъэныкъом непэ дунаими зыщеу­шъомбгъу, жъым кIэ хэпшIыкIыныр жъугъэу агъэфедэ ыкIи ащ лъапсэ иI. Непэ ащ цIыфхэр фэтпIунхэ фае, ямыщыкIагъэу къащэфырэ заулэу нэужым ра­дзыжьырэм шIуагъэ къыхьырэп, ары пакIошъ, дунаир аушIои, — къыддэгощагъ АР-м имыса­тыу зэхахьэу, шIушIэным игуп­чэу «Важные вещи» зыфиIо­рэм ипащэу Ирина Дербеневар.

Ау тигущыIэгъу къызэрэхигъэ­щыгъэу, Гупчэм ипшъэрылъ шъхьаIэр шIушIэныр, къин хэфа­гъэхэм IэпыIэгъу афэхъунхэр ары, творчествэр, щыгъынхэм якIэдыкIыжьын ащ ыуж. Мэтэшхохэр къалэм ичIыпIитIумэ ащигъэуцугъэу цIыфхэм ямыщы­кIэгъэжь щыгъынхэр ахэм ара­хьылIэх. А пстэумэ яугъоинрэ язэхэдзынрэ волонтерхэр дэлажьэх. ЕгъэжьапIэм ахэр нэ­бгыритфыгъ, джы непэ 25-рэ мэхъух. ЯIофшIэн шъхьаIэхэм уахътэу къялыжьырэр щыгъынхэм яугъоинрэ язэхэдзынрэ апэIуагъахьэ. Илъэсэу шIушIэ Гупчэм Iоф зишIэрэм къыкIоцI республикэм щыпсэурэ нэбгырэ минмэ ящыкIэгъэ щыгъыныр арагъэгъотыгъ. ШIушIэ Гупчэу «Важные ве­щи» зыфиIорэм Iофэу ышIэрэм мэхьанэ ин зэриIэр къыхигъэщыгъ IофшIэнымрэ социальнэ хэхъоныгъэмрэкIэ Министерст­вэм иIофышIэу ЦIыпIынэ Жа­не­тэ. Ащ къызэриIуагъэмкIэ, мыщ фэдэ социальнэ зэхахьэхэм япчъагъэ республикэм щыхэхъо ыкIи ахэм адэлэжьэщт оператор шъхьаф джы республикэм иIэ хъугъэ. — Мыщ фэдэ организациехэм апае ар шъхьафэу агъэпсыгъ. Урамэу Лениным ыцIэ зыхьырэм тет унэу N 54-м щылэ­жьэщт. Бэгъырэт Азэмат ащ ипащ. АР-м IофшIэнымрэ социальнэ хэхъоныгъэмрэкIэ и Министерствэ епхыгъэу лэжьэщт, тэри гъунэ лъытфыщт. Арышъ, непэ тлъэгъугъэм фэдэ социальнэ Iоф горэм ыуж ихьэ зышIои­гъохэм ащ IэпыIэгъу щагъотыщт. IофшIэныр ащ нахь къыгъэпсын­кIэщт. Джащ фэдэу мысатыушI организациехэм япроектхэм ягъэцэкIэнкIэ къэралыгъо IэпыIэгъу зыгъоты зышIоигъохэм апае зичэзыу республикэ зэ­нэкъокъур мэлылъфэгъум ре­кIокIыщт. Мэзэ псаум ар кIощт. Мыгъэ ащ къыдыхэлъытэгъэ мылъкур фэдитIукIэ нахьыбэ хъу­гъэ. АР-м и ЛIышъхьэ Iофы­шхоу зэшIошъухырэр зелъэгъум, сомэ миллион 15 фэдиз къыхигъэхъуагъ, — къыIуагъ ЦIыпIынэ Жанетэ. ШIушIэ зэхахьэу «Важные вещи» зыфиIорэми мы лъэныкъомкIэ иIофшIэн лъигъэкIотэщт. Рихьыжьэгъэ проектхэм заригъэушъомбгъущт. Анцокъо Ирин.