Адыгэ Республикэм аужырэ илъэсхэм сабыибэ зэрыс унагъохэм япчъагъэ щыхэхъуагъ.

Шэуджэн районым ит къуа­джэу Мамхыгъэ щыпсэурэ Цукъо Светланэрэ Аликрэ сабыищэу зэдапIурэм нэмыкIэу 2010-рэ илъэсым кIэлэцIыкIуибл яунагъо къыхэхъуагъ. Ахэр къалэу Чебаркуль дэт кIэлэцIыкIу Унэу N 2-м щаIыгъыгъэхэм ащы­щыгъэх. ЩыIэныгъэм ахэм къины­шхоу щызэпачыгъэр къагурыIозэ Цукъохэм яунагъо кIэлэцIыкIухэм апэгъокIыгъ. Сабыйхэр къаIахынэу зэрэхъугъэм Светланэ тыщигъэгъозагъ. — Сишъхьэгъусэрэ сэрырэ тиныбджэгъумэ адэжь хьакIапIэ тыкIуагъэу унагъом пшъэшъэ­жъые цIыкIуитIу къаIахыгъэу апIоу тлъэгъугъэти, лъэшэу сыгу рихьыгъэх, псынкIэуи бзэ къа­дэзгъотыгъ. Тыщэсыфэ ахэм са­шIодахэу сурэт сыкъашIи, къы­сатыгъ. Джащ къыщыублагъэу тизэныбджэгъуныгъэ тыублагъэ, бэрэ сымылъэгъухэмэ сафэзэщэу, яшъэфхэр къысфаIуатэу, упчIэжьэгъу сашIэу хъугъэ. Си­пшъэшъэгъу къысиIуагъ: «Сабыйхэм лъэшэу шIу уалъэгъоу зыкъыпфащэи, дэгъуба кIэлэцIыкIухэр къаIыпхэу ппIухэмэ». Джащыгъум сишъхьэгъусэ есIуагъ шIулъэгъуныгъэу сабыйхэм афысиIэр зэрэгъунэнчъэр ыкIи тиунагъо хахъо фэс­шIынэу сызэрэфаер. Тхьаегъэ­псэу, Алик къыздыригъэштагъ, — къеIуатэ Светланэ. Охътэ шIукIае тешIагъэу Светланэ зэхихыгъ Челябинскэ шъолъырым сабыитф хъухэу ибэу къэнагъэхэу, кIэлэцIыкIу Унэм щаIыгъхэу. Джащ дэжьым пшъэдэкIыжьэу пылъыр къагурыIозэ зэшъхьэгъусэхэм тырау­бытагъ кIэлэцIыкIухэр къаIа­хынхэшъ, унагъом щапIунхэу. — ИщыкIэгъэ тхылъхэр сыугъоихи, Челябинскэ сыкIуи, сабыиплI къаIытхынэу зыдгъэ­хьазырыгъэу, кIэлэцIыкIу Унэм ипащэ лъэшэу ыгу сырихьыгъэу къысэлъэIугъ джыри зэшыпхъу цIыкIуитIу тштэнэу. АпэрэмкIэ тIэкIу сыкъэщтагъ, ау пшъэшъэ­жъые цIыкIуитIум анэгухэм са­зыкIаплъэм, ахэри сиунагъо щыщ сшIыгъэх. Ахэм илъэс 12 зырыз аныбжьэу, яшэнкIи зэтеуцуагъэхэу щытхэти, лъэшэу къин апытлъэгъуагъ, арэу щытми, къытфэразэхэу еджапIэр къаухи, тегъэпсыхьагъэхэу щы­Iэныгъэм игъогу техьагъэх, — еIо Светланэ. Охътэ шIукIае тешIагъэу етIа­ни сабыитф Шэуджэн районым ит еджэпIэ-интернатым къыIа­хыгъ. А кIэлэцIыкIухэмрэ ежьхэм ялъфыгъэхэмрэ зэгуры­Iоныгъэ дахэ азыфагу илъэу къы­зэдэтэджых. ЩыIэныгъэ гъогур ифэшъуашэу къызэрэпкIун плъэкIыщтым ахэр фагъа­сэх. ЦIыфыгъэ ахэлъэу, Iоф­шIэным аIэ екIоу, ячIыгу шIу алъэгъоу ны-тыхэм ахэр апIух. Хэти унагъом уасэ фишIыным мэхьанэшхо иI. «Бын Iужъур — гъэбэжъу» адыгэ гущыIэ- жъым зэриIоу, къакIэхъухьэрэ кIэлэцIыкIухэм ягъэхъагъэхэм Цукъохэр арэгушхох. Бзылъфыгъэхэм я Союз Свет­ланэ хэт, зэхахьэхэм чанэу ахэ­лажьэ. Спортым пылъ, кIэлэ­цIыкIухэри ащ хещэх. ЯцIыкIугъом къыщегъэжьагъэу якIа­лэ­хэр бэнэным пыщагъэх. АпIу-­ гъэ кIалэхэм ащыщхэр къулы­къум къэтых, зэкIэми сэнэхьат дэгъухэр яIэ хъугъэ, унагъо- хэр ашIэнэу рагъэжьагъ. Светланэрэ Аликрэ упчIэжьэгъу ашIых, зэралъэкIэу ахэм аде- Iэх. Зыныбжь икъугъэ кIалэу апIугъэхэри, джы унагъом щапIухэрэри, ялъфыгъэхэри Илъэ­сыкIэм Цукъохэм яунагъо щызэхэхьэх, мэфэкIыр зэдагъэ­мэфэкIы. — КIэлэцIыкIухэм «Хьалы­гъурэ псырэ нахь шъумыгъо­тыщтми, шъуапэкIэ шъуисабыйхэр чIэшъумыдзых» ренэу ясэIо. ХэткIи нафэ щыIэныгъэр тэ тызэрэфэе занкIэу зэрэмыкIо­рэр. Къэхъурэ сабый пэпчъ ры­зыкъ иI. ЧIыпIэ къинхэми та­рэфэ, зэшIотхын тымылъэ­кIыщт гумэкIыгъохэри къыт­шъхьа­рыуагъэхэу къытщэхъу. Ащ фэдэ чIыпIэхэм уишъхьэ­гъусэ пытэу къызэрэбготыр, ащ иIэпыIэгъу узэрэщымыкIэщтыр зызэхап­шIэкIэ, пстэури нахь зэшIохыгъошIу мэхъу, — къыкIигъэтхъыгъ Светланэ. Джащ тетэу зэдеIэжьхэзэ Светланэрэ Аликрэ илъэсхэр зэранэкIых. Ны-тыхэр зышъхьарымытыжьхэ кIэлэцIыкIу ибэхэм ядунай агъэкIэракIэ. — Зыныбжь имыкъугъэхэм зынаIэ атезыгъэтырэ къулыкъоу Шэуджэн районым итым ипащэу Къыкъ Алый сыд фэдэрэ IофкIэ зыфэзгъэзагъэми, ишIуа­гъэ къысегъэкIы, — еIо Светланэ. — КIэлэцIыкIухэм тиунагъо псэукIэу щыряIэм лъэплъэх къулыкъум испециалистхэу Бырдж Симэрэ Бэщныбэ Джэн­пагурэ. ГумэкIыгъоу, щыкIагъэу тиIэр зэрагъэшIагъэ, ахэм ягъэ­цэкIэнкIэ къыддэлажьэх. Сабыим нахь тхъагъуи, нахь шIагъуи зи щыIэп. Ахэр къэралыгъом инеущырэ мафэх. ТикIэ­лэцIыкIухэр ары тищыIэныгъэ тфэзыгъэдахэрэр, ткIуачIэ къезыгъэблырэр, къиныгъохэр зэпытэзыгъэчырэр, лъапсэ уиIэмэ, шъхьапэ зэрэуиIэщтыр зэхэтэзыгъашIэрэр. Лъэпшъыкъо Фатим. Сурэтхэр: унагъом ихъарзынэщ.