КаратэмкIэ Урысые зэнэкъокъоу «Федерациехэм я Кубок» зыфиIорэр Московскэ хэкум икъалэу Одинцово щыкIуагъ. Къэралыгъом ишъолъыр 47-мэ яспортсмен 2300-рэ фэдиз ащ хэлэжьагъ. Адыгэ Республикэр нэбгырэ 12-мэ къагъэлъэгъуагъ, ахэм ятренерых Владимир Васильченкэмрэ Лъэустэнджэл Амиррэ. Республикэм илIыкIохэм дышъэ медали 5 къахьыгъ, нэбгырищмэ ятIонэрэ чIыпIэхэр къафагъэшъошагъэх. ТекIоныгъэр къыдахыгъ Артем Воробьевым, Паку Астемир, Дмитрий Петренкэм, Паку Алихъан, Тыу Батыр. Тыжьын медальхэр къахьыгъэх Паку Самир, Егор Христофоровым, Гъыщ Темыркъан. Зэнэкъокъухэм язэфэхьысыжьхэм адиштэу тикIалэхэм спортымкIэ разрядхэр къафагъэшъошэщтых. Мы спорт лъэпкъымкIэ Къыблэ федеральнэ шъолъырым ипервенствэу къалэу Темрюк ыкIи Урысые зэнэкъокъухэу Санкт-Петербург ащыкIощтхэм Адыгеим испортсменхэм зафагъэхьазырыщт.