2023-рэ илъэсым изэфэхьысыжьхэмкIэ, мэз хъызмэтым идэлэжьэнкIэ Адыгеир Къыблэ федеральнэ шъолъырымкIэ анахь дэгъоу алъытагъ. Мэзым епхыгъэ лъэныкъо пстэумкIи ащ къэгъэлъэгъонышIухэр ышIыгъэх. Зэфэхьысыжь зэхэсыгъоу мы илъэсым къалэу Ставрополь щыкIуагъэм ар шъхьэ­ихыгъэ къыщашIыгъ. Мэзхэр Адыгеим ичIыопс къэкIопIэ анахь шъхьаIэхэм ащыщых. КъФШъ-мкIэ республикэр анахь мэзылъэ шъолъыр — гектар мин 330-рэ фэдиз мэхъу. Мы пчъагъэм щыщэу мэз хъызмэтым ыIэ илъыр гектар мин 240-рэ. Чъыгхэр къэухъумэгъэнхэр, япчъагъэ къыщымыкIэныр, машIом зыкъащимыштэныр, хэбзэнчъэу пхъэ хамыщыныр —мыхэм ыкIи нэмыкIхэм гъунэ алъыфыгъэныр мэз хъызмэтым иIофышIэхэм япшъэрылъ. Ар гъэрекIо зэкIэми анахь дэгъоу агъэцэкIагъ. — ГъэрекIопагъэ елъытыгъэмэ, блэкIыгъэ илъэсым мэзхэм машIом зыкъызэращиштагъэр процент 30 фэдизкIэ нахь макIэ хъугъэ. УФ-м и Президент унашъо ышIыгъ 2030-рэ илъэсым нэс мэзхэм ащыхъурэ лыгъэхэр дэдгъэзыжьыпэнхэу. Арышъ, илъэс къэс ар дгъэца­кIэзэ ащ тыкъыфэкIонэу тыфай. АщкIэ лъэшэу ишIуагъэ къытегъэкIы АР-м и ЛIышъхьэу КъумпIыл Мурат. Мэз хъыз­мэтым имэшIогъэкIосэ къу­лыкъу ахъщэ къыфитIупщыгъ. Ащ ишIуагъэкIэ Iофы­шIэхэр нахьыбэу тштэнхэ ыкIи тищыкIагъэхэмкIэ къу­лыкъур зэтедгъэпсыхьан тлъэ­кIыгъ. Ащ нэмыкIэу мы лъэныкъом фэгъэзэгъэ пстэуми зэгурыIоныгъэ тазыфагу илъэу ма­шIо къызыхъукIэ тызэкъоу­цошъ, гумэкIыгъор дэтэгъэзыжьы. Джащ фэдэу чъыгхэм япчъагъэ къыщымыкIэным фэшI мэзым хэкIодыкIырэм фэдиз икIэрыкIэу хэтэгъэтIыс­хьажьы. Арышъ, къытфагъэшъошэгъэ пэрытныгъэр къэдгъэшъы­пкъэжьыным пае тиIофшIакIэ къыщыдгъэкIэщтэп. Нахьы­шIоу ар зэхэщэ­гъэ­ным тыдэлэжьэщт, — къыддэгощагъ АР-м мэзхэмкIэ и Гъэ­IорышIапIэ ипащэу Былымыхьэ Рэщыдэ. Мэз хъызмэтыр Iофыгъо шъхьаIэу зыдэлажьэхэрэм ащыщ чъыгыкIэхэм ягъэхьазырын. ГущыIэм пае, блэкIыгъэ илъэсым чылэпхъэкIэ килограмм мини 5-м нахьыбэ ащ иIофышIэхэм къаугъо­ижьыгъ. Анахь дэгъухэу ащ килограмм мини 2-м нахьыбэ къахахыщт. ЗэрэрахъухьэрэмкIэ, а кIэхэм чъыгэе плъы­жьым ичъыгыкIэ мин 200-рэ дэшхо шIуцIэу мини 150-рэ къатыщт. Джащ фэдэу мэзым пхъэ хэзытыгъукIыхэрэм япчъагъэ процент 60-кIэ гъэрекIо нахь макIэ хъугъэ. НэкIубгъор зыгъэхьазырыгъэр Анцокъо Ирин.