Адыгэ культурэм ифестиваль Тэхъутэмыкъое районым щыкIуагъ, ар загъэпсыгъэр илъэси 100 зэрэхъурэм фагъэхьыгъ.

Хабзэ зэрэхъугъэу, щэ­пIэ зэ­хэтэу «Мега Адыгея» зыфиIорэм ар щызэхащэ ыкIи цIыфхэр зэ­жэхэрэ хъугъэ-шIагъэхэм ясатыр хэуцуагъ. СыдигъокIи Iофтхьа­бзэм ипрограммэ зэхэщакIохэм гъэшIэгъонэу агъэпсы. Мызэгъэ­гуми ар агъэ­цэкIагъ. Адыгэ ­лъэпкъ культурэм идунай дахэ ипчъэхэр ащ цIыфхэм къафызэIуихыгъ. ­Лъэпкъ IэшIагъэхэмрэ адыгэ шъуашэхэмрэ якъэлъэгъон­хэм зэпымыоу фестивалыр зыкIогъэ мэфэ реным Iоф ашIагъ. Iэпэщысэхэм, шъуашэхэм ямызакъоу ахэр зыгъэхьазыры­гъэхэм хьакIэхэр нэIуасэ ыкIи гущыIэгъу афэхъугъэх, ясэнэхьат ишъэф цIыкIухэми защагъэгъозэн алъэ­кIыгъ. Декоративнэ-прикладной, художественнэ искусствэм, ­адыгэ шъуашэхэм ядын дэлэжьэрэ Iэпэ­Iасэхэр лъэпкъ мэхьанэ зиIэ Iоф­тхьабзэу республикэм щызэхащэхэрэм ренэу аку итых. Ахэм тыгъосэрэр непэрэм къыхащэ­жьы, лIэужыкIэхэм арагъэшIэжьы. Джащ фэдэу мэфэ реным къы­кIоцI сабыйхэм апае чIыпIэ шъхьафхэр лэжьагъэх, егъэджэнхэр афыщызэхащагъэх. А пстэумэ адакIоу адыгэ мэкъамэр тыди щыIугъ, къэшъуагъэх, Адыгеим итворческэ купхэр щызэблэкIхэзэ цIыфхэр агъэчэфыгъэх. ­Адыгэ пщынаохэм якъэгъэлъэгъон Iоф­тхьабзэм ихъугъэ-шIэгъэ шъхьаIэ хъугъэ. Ахэр купэу зэхэтхэу пщы­нэхэр агъэжъынчхэзэ щапIэм къырыкIуагъэх. — КIэлэцIыкIухэми сэри мэфэкIым тигъэгушIуагъ. Анахьэу тыгу рихьыгъэр мастер-классхэр ары. Тэ тизакъоп, бэхэр ягуапэу фестивалым хэлэжьагъэх. ЗэхэщакIохэр Iофтхьабзэм игъэхьазырын дэгъоу дэлэжьагъэх, зэрифэшъуашэу рагъэкIокIыгъ, — къыддэгощагъ адыгэ культурэм ифестиваль щыIэгъэ Къэлэ­къу­тэкъо Бэллэ. Адыгэ орэдыIохэм язэхэт кон­церт мэфэкIым кIэух дахэ фэ­хъугъ. Лъэпкъ культурэм игъэпытэн­кIэ, икъэухъумэнкIэ ыкIи хахъо егъэ­шIыгъэнымкIэ мыщ фэдэ Iоф­тхьабзэхэм мэхьанэшхо яI. Ащ иамалкIэ къыткIэхъухьэрэ ныбжьыкIэхэр тятэжъ пIашъэхэм ягушъхьэлэжьыгъэ кIэн баеу къы­днэсыжьыгъэм хэщагъэ мэхъух, лъэпкъым ыугъоигъэ шэн-­хэбзэ дахэхэм шъхьэкIафэ, осэ икъу афашIыным фапIух, лъэпкъ зэфэшъхьафхэр адыгэ культурэм нэIуасэ фашIых. Адыгеим имыза­къоу тигъунэгъу Пшызэ шъо­лъыр щыпсэухэрэри гъэ къэс Адыгэ культурэм ифестиваль къекIуа­лIэх. ШъолъыритIум азыфагу зэ­ныбджэгъуныгъэрэ зэгурыIоныгъэрэ илъыным ар фэлажьэ. АНЦОКЪО Ирин.