Медицинэ сэнэхьатым ныбжьыкIэхэр нахь пыщэ­гъэнхэм, ар зэзыгъэгъотыхэрэм япчъагъэ нахьыбэ шIыгъэным ыкIи яшIэныгъэхэм ахэгъэхъогъэным фэгъэхьыгъэ зэнэкъокъу Мыекъопэ къэралыгъо техно­логическэ университетым и Медицинэ институт щы­зэхащагъ.

«Медицинская эволюция: в поисках лечения» зыфиIорэр уцугъуищэу гощыгъэу кIуагъэ, мы мафэхэм аужырэр зэха­щагъ ыкIи текIоныгъэ къыдэзыхыгъэхэр къэнэфагъэх. Мыекъопэ къэралыгъо технологическэ университетым истудентхэм анэмыкIэу медицинэ гурыт сэнэхьат зэзыгъэгъоты­хэрэр ыкIи медицинэ, эколого-­биологическэ е химико-био­логическэ лъэныкъохэм нахь афэ­гъэзагъэу еджэрэ кIэлэ­еджакIохэри зэнэкъокъум хэлэ­жьагъэх. ЗэкIэмкIи нэбгырэ 70-рэ апэрэ уцугъом хэлэжьагъ, ащ пхырыкIыгъэхэр купитфэу гощыгъэхэу зэнэкъокъугъэх. Аужырэ едзыгъом «Тяжелый случай» ыкIи «Медицинские грибы» зыфиIорэ купитIур ­ихьагъ. — Мыщ фэдэ зэнэкъокъу апэ­рэу зэхэтэщэ, медицинэ сэ­нэхьат зэзыгъэгъотыхэрэм афы­тегъэпсыхьагъ. ШIокI имыIэу куп пэпчъ апшъэрэ еджапIэм истудент, гурыт сэнэхьат зэзыгъэгъотырэ ыкIи гурыт еджапIэм щеджэрэ кIэлэеджакIо хэдгъэ­хьагъ. Ащ ишIуагъэкIэ ныбжьыкIэхэр яшIэныгъэхэмкIэ зэдэгощагъэх, ясэнаущыгъэ къагъэлъэ­гъуагъ. ЫпэрапшIэу мы сэ­нэ­хьатыр къыхахынэу зэрэхъу­гъэр къызыщыраIотыкIыгъэ сочинение атхыгъ, медицинэм мэхьа­нэу ратырэр къыраIотыкIыгъ. Ащ нэмыкIэу упчIэ зэфэшъхьафхэм яджэуапхэр къаратыжьыгъэх. ЛIэшIэгъу пчъагъэкIэ узэкIэIэбэжьмэ щыIэгъэ шIэ­ныгъэлэжьхэм, медицинэм хэ­хъоныгъэ езыгъэшIыгъэхэм ясурэтхэр ядгъэлъэгъузэ ахэм ацIэхэр къашIагъэх ыкIи гъэхъа­гъэу яIэхэр къыраIотыкIыгъэх. Анахьэу ашIогъэшIэгъоныгъэр практическэ IофшIэнэу агъэцэкIагъэхэр ары, — еIо проф­ориентациемкIэ ыкIи апшъэ­рэ еджапIэм джыри чIэмыхьагъэхэр зыщагъэхьазырырэ Гупчэм ипащэу Олег Франко. Зышъхьэ уIагъэ тещагъэм апэрэ IэпыIэгъу зэребгъэкIын плъэкIыщтыр ныбжьыкIэхэм къа­гъэлъэгъуагъ, зэнэкъокъу­гъэх. Ащ нэмыкIэу фильмэ зэ­фэ­шъхьафхэм япычыгъохэм ме- ­дицинэм иIофышIэхэм хэу­къо­ныгъэу щашIыхэрэр къыхагъэщы­гъэх. Аужырэ зэнэкъо­къоу зы­пхырыкIыгъэхэм ащыщ зиIоф дэи къэхъугъэ цIыфым апэрэ Iэ­пыIэгъу рагъэкIыным епхы­гъэр. — Зэнэкъокъур гъэшIэгъонэу рекIокIыгъ, тиныбжьыкIэхэм шIэныгъэ дэгъухэр къагъэлъэгъуагъ, ахэр ыпэкIэ зэрэлъыкIотэщтхэм, гъэхъагъэхэр зэрашIыщтхэм сицыхьэ телъ, — къыIуагъ Адыгэ республикэ сымэджэщым имедсестрахэм яIофшIэн зэхэщэгъэнымкIэ врач шъхьаIэм игуадзэу, АР-м псауныгъэр къэухъумэгъэ­нымкIэ и Министерствэ иштат хэмытэу мы апшъэрэ еджапIэм щезыгъа­джэхэрэ Светлана Строкань. Мэрэтыкъо Бэллэ Мыекъопэ къэралыгъо технологическэ уни­верситетым и Медицинэ институт ия 2-рэ курс щеджэ. Зэнэ­къокъум шIогъэшIэгъонэу зэрэ­хэлажьэрэр къытиIуагъ. ИшIэныгъэхэм ахигъэхъонымкIэ мы Iофтхьабзэм ишIуагъэ къызэ­рэкIощтыр къыхигъэщыгъ. — Тхылъым уеджэрэм фэдэп, ащ фэдэ хъугъэ-шIагъэм узе­уа­лIэкIэ зызэрэбгъэпсыщтыр къэ­шIэгъуай. ПсауныгъэмкIэ зы такъикъыми мэхьанэшхо иI. ЦIы­фым апэрэ IэпыIэгъур псын­кIэу ебгъэкIын, илажьэр бгъэу­нэфын фае. Ар къызыщытыу­шыхьатырэ уцугъо пчъагъэмэ такъыпхырыкIыгъ, кIэу бэ зэ­хэтхыгъэр ыкIи тлъэгъугъэр, — еIо Бэллэ. Кобл Лаурэ, Нэхэе Аннэ, Али­на Прохоровар, Геворг Вар­данян ыкIи Бжьэнбэхъу Анже- лэ зыхэт купым анахь дэ­гъоу зыкъыгъэлъэгъуагъ ыкIи текIоныгъэр къыдихыгъ.