Теннис цIыкIумкIэ Къыблэ федеральнэ шъолъырым изэнэкъокъухэм ахэлэжьэщтхэр къэнэфагъэх. Адыгэ Республикэм ихэшыпыкIыгъэ командэ хэфагъэх зыныбжь илъэс 16-м шIомыкIыгъэ кIэлэ ыкIи пшъэшъэ анахь лъэшхэр. Мыхэм якъыхэхын фытегъэ­псыхьэгъэ турнир Мыекъуапэ испорт еджапIэу N 3-м щыкIуагъ. Мыекъуапэ, Кощхьэблэ, Тэхъутэмыкъое ыкIи Теуцожь районхэм яспортсмен 42-рэ зэнэкъокъугъэх. КIалэхэм нахь къэхэщыгъэх къуа­джэу Нэшъукъуае щыщэу ЕхъулIэ Нарт, республикэм икъэлэ шъхьа­Iэ щыпсэухэрэ Артем Вариводинымрэ Александр Самсоновымрэ, поселкэу Яблоновскэм илIыкIохэу Матвей Куимовымрэ Максим Серафимовичрэ. Къуаджэу Нэ­шъу­­къуае къэзыгъэлъэгъогъэ пшъашъэхэу Блэгъожъ Динарэ, Чэтэо Аринэ ыкIи Блэгъожъ Данэ апэрэ чIыпIищыр къыдахыгъ. Я 4-рэ ыкIи 5-рэ чIыпIэхэр афагъэ­шъошагъэх Кощхьаблэ испорт­сменкэхэу Гъыдзэ Самирэрэ Апыщ Данэрэ. Къыблэ федеральнэ шъолъырым ипервенствэ гъэтхапэм и 7-м щегъэжьагъэу и 10-м нэс къалэу Лабинскэ щыкIощт.