Адыгеим ис къэзэкъ ныбжьыкIэхэм я Союз игъэIорышIапIэ хэтхэу Александр Даниловым, Екатерина ыкIи Кон­стантин Загорулькэхэм хэушъхьафыкIыгъэ дзэ операциер зыщыкIорэ шъолъырхэм — Херсон­рэ Запорожьемрэ шIу-шIэ IэпыIэгъу тонни 2 фэдиз анагъэсыгъ.

Ахэр къэзыугъоигъэхэр къэзэкъ ныбжьыкIэхэр, Адыгэ Республикэм и Мыекъопэ ыкIи и Красногвардейскэ районхэм, къалэу Мыекъуапэ ащы­псэухэрэр, купэу «Z0V сила в ПРАВДЕ!», «Сбор нашим.Майкоп» зыфиIо­хэрэм ахэтхэр ары. А шIушIэ IэпыIэгъум хэлъыгъэх дзэкIолIхэм яунагъохэм къагъэхьазырыгъэхэр, гъомылэпхъэ зэфэшъхьафхэр, шъоур, Iэзэгъу уцхэр, псэолъапхъэхэр, нэIэплъэкIхэр, газ баллонхэр, пхъэшъхьэ-­мышъхьэхэр ыкIи нэмыкIыбэ. Краснодар краим и Мостовской район щыщ Рябушенкэхэм яунагъо игукъэкIыкIэ ыкIи купэу «Сбор нашим.Майкоп» зыфиIорэм хэтхэр къадеIэхэзэ уIагъэхэр е стыгъэхэр нахь псынкIэу кIы­жьынхэм пае шэфым хэшIыкIыгъэ щыфэнхэр зэрылъ банкэ 250-рэ агъэ­хьазырыгъ ыкIи IэпыIэ­гъоу анагъэсын фаем хагъэ­хъуагъ. Мыщ дэжьым къэ­Iогъэн фае цIыфыбэ ащкIэ къызэрадеIагъэр. Волонтерхэр, предпринимательхэр IэпыIэгъу къафэхъугъэх ыкIи а Iофыр псын­кIэу зэшIохыгъэ хъугъэ. Адыгеим икъэзэкъ ныбжьыкIэхэм я Союз анахь чанэу хэлажьэхэрэм яшIуа­гъэ къагъэкIуагъ шIухьафтынхэр гъэхьазырыгъэнхэмкIэ ыкIи ахэр машинэм илъхьэгъэнхэмкIэ. А пстэуми анэмыкIэу къалэу Мыекъуапэ щыщ бзылъфыгъэхэм, кIэлэ­еджа­кIохэм Хэгъэгум иухъумакIо и Мафэ фэшI гуфэбэныгъэ зыхэлъ ­письмэхэр тидзэкIолIхэм афатхыгъэх. Гъогум къин шIукIае ща­лъэгъугъ, сыда пIомэ постым благъэкIыгъэхэпти, губгъохэмкIэ ежьхэр зэ­рэамалэу гъогур пхыратхъущтыгъ. Арэу щыт нахь мышIэми, Запорожскэ хэ­кум ишъофхэм ошIэ-дэмышIэу къэзэкъхэр ащы­IукIагъэх къалэу Мые­къуапэ икIыгъэ тидзэкIолI­хэм. Ахэм гъогу тэрэзыр къарагъэлъэгъугъ. ШIушIэ IэпыIэгъум хэлажьэхэрэм ягуапэу кIэлэцIыкIухэм къатхыгъэхэр, шIухьафтын зэфэшъхьафхэр ыкIи Те­кIоныгъэм и Быракъ тырашIыкIыгъэр ахэм аIэкIагъэхьагъэх. ШIушIэ IэпыIэгъум изы Iахьышхо я 227-рэ мые­къопэ дзэ артбригадэм IэкIагъэхьагъ, Херсон лъэ­ныкъом къулыкъур ахэм щахьы. Блокпостхэм аIутхэми шIухьафтынхэр ыкIи IэшIу-IушIухэр афагощыщтыгъэх. Джащ фэдэу блокпостхэм ащыщ горэм щаIукIагъэх Пшызэ къэзэкъыдзэм хэтхэм. Екатеринодарскэ отделым иатаман пэщэныгъэ адызэрихьэзэ ахэм ядзэ пшъэ­рылъ агъэцакIэ. Аужыпкъэу шIушIэ IэпыIэгъур зынагъэсыгъэр тидзэкIолIхэу уIагъэ хъугъэхэм къызщяIэзэхэрэ сымэджэщыр ары. А сы­мэджэщым чIэлъхэм апае пхъэшъхьэ-мышъхьэу бэ къащэфыгъагъэр, джащ фэдэу нэIэплъэкIхэр, салфеткэхэр аратыгъэх. Пшъыгъэхэми, япшъэ­рылъ зэрагъэцэкIагъэм гушхоныгъэ къахилъхьа­гъэу къагъэзэжьыгъ Александр Даниловым, Ека­терина ыкIи Константин Загорулькэхэм. Ахэм километрэ 1800-рэ фэдиз хъурэ гъогушхо зэпачыгъ. ТиухъумакIохэу зышъхьамысыжьхэу тихэгъэгу ифедэ къэзыухъумэхэрэм афэгумэкIырэ пстэуми инэу тызэрафэразэр къэтэIо! Сурэтхэр: Е. Загорулькэр.