Урысые Федерацием и Президент ихэдзынхэм сэкъат­ныгъэ зиIэхэр ахэлэжьэнхэр къин къафэмыхъуным пэ­шIорыгъэшъэу зыфагъэхьазыры. Ахэм яшIоигъоныгъэхэр къыдалъытэхэзэ хэдзынхэр зыщыкIощтхэ чIыпIэ­хэр агъэхьазырых, яфитыныгъэхэр къаухъумэх. АР-м хэдзынхэмкIэ и Гупчэ комиссие илIыкIохэр сэкъатныгъэ зиIэхэм яобщественнэ организациехэм ахэтхэм гущыIэгъу афэхъугъэх, УФ-м и Президент ихэдзынхэм афэгъэхьыгъэ игъэкIотыгъэ къэбархэр къафаIотагъэх. ЗэрагъэунэфыгъэмкIэ, сэкъатныгъэ зиIэ хэдзэкIо мин 30-м ехъу республи­кэм щэпсэу. Ахэр хэдзынхэм ахэлэжьэнхэм пае Iофтхьэбзэ зэфэшъхьаф­хэр афызэхащэх. Ахэм ащыщ гъэтхапэм и 15-м къыщегъэжьагъэу и 17-м нэс кIощт «Социальное такси» зыфиIорэр. УФ-м и Президент ихэдзынхэр чIыпIэ 268-мэ ащыкIощтых, ахэм ащыщэу тIур хэушъхьафыкIыгъэу сэкъатныгъэ зиIэхэм, анахьэу зынэ къыщыкIагъэхэм, апае агъэпсыщтых. Ащ нэмыкIэу хэу­шъхьафыкIыгъэу хэдзыпIэ чIыпIитIу, участкэ пэпчъ зымылъэгъухэрэм апае инэу тхыгъэ тхьапэхэр агъэхьазырыщтых. КIэухым республикэм апэрэу щызэхащэгъэ проектэу «ИнформУИК» зыфиIорэм фэгъэхьыгъэу къэзэрэугъоигъэхэм къафаIотагъ. Мэзаем и 17-м къыщегъэжьагъэу гъэтхапэм и 7-м нэс ар кIощт. Ащ къыдыхэлъытагъэу хэдзын комиссием хэтхэм унагъохэр къа­кIухьэх. ДЕЛЭКЪО Анет.