Псауныгъэм икъэухъумэн, гъэсэныгъэм, культурэм ылъэ­ныкъо, спортым яхэхъоныгъэ Адыгеим мэхьанэшхо щы­ратызэ къалэм щыIакIэу дэлъым фэдэ чылагъохэми ащы­IэкIэхьаным щыпылъых.

[caption id="attachment_146606" align="aligncenter" width="800"] Алексей Гусев[/caption]

Мы зэпстэуми Адыгеим и ЛIышъхьэу КъумпIыл Мурат ежь ышъхьэкIэ ынаIэ атет. ГущыIэм пае, Шэуджэн районым кIэлэцIыкIу IыгъыпIитIу шъхьадж чIыпIи 120-мэ ателъытагъэу икIыгъэ илъэсым яшIын къыщаухыгъ. БэмышIэу ахэм япчъэхэр къызэIуахыгъэх. Пщычэу ияплIэнэрэ кIэлэцIыкIу IыгъыпIэу «Дэхэбыныр» унэжъэу зычIэтыгъэм къы­чIащыжьи, кIэм къащэ­жьыгъ. КIэлэцIыкIу IыгъыпIакIэу «Звездочкэм» псэупIэу Заревэм Iоф ще­шIэ. Ащ тапэкIэ IыгъыпIэ иIэгъахэп. Джыри зы чIыпIи 120-мэ ателъытагъэу анахь цIыкIу дэдэхэри щаIыгъынхэу лъэпкъ проектэу «Демографием» къыдыхэлъытагъэу псэу­пIэу Тихоновым щашIы, ащи кIэлэцIыкIу IыгъыпIэ джынэс дэтыгъэп. «Мыщ фэдэу кIэлэцIыкIу IыгъыпIэхэр жъугъэу Шэуджэн районым ща­шIыхэу джыри къыхэкIыгъэп, ар зишIуагъэр федеральнэ программэхэмрэ лъэпкъ проектхэмрэ тазэ­рэхэлажьэрэр ары», — къыщыхигъэщыгъ игущыIэ Адыгеим и ЛIы­шъхьэ. Социальнэ инфраструктурэм изэтегъэпсыхьанкIэ джыри зы лъэ­бэкъу Шэуджэн районым зэрэщашIыгъэр КъумпIыл Мурат къыхигъэщыгъ — зы илъэскIэ мы районым ипсэупIищмэ куль­турнэ-­зыгъэпсэфын фэIо-фа­шIэхэр зыщызэшIуахы­шъущт чIыпIэхэр яIэ хъугъэ. Хьатыгъужъыкъуае куль­турэм иунэу чIыпIэ 210-мэ ателъытагъэр ща­шIыгъ ыкIи Къэбэхьаблэ дэтыр щагъэцэкIэжьыгъ. Джащ фэдэу 2023-рэ илъэ­сым къутырэу Чернышовым дэсхэм ЛIышъхьэм изэдэгущыIэгъу занкIэ зыкъызщыфагъазэ нэуж мылъку тедзэ къагъоти, культурэм иунэ щагъэцэ­кIэжьыгъ. «Федеральнэ гупчэм иIэпыIэгъу ыкIи къэра­лыгъом и Президентэу Владимир Путиным къырихьыжьэгъэ Iофхэр зэрэпхырытщыхэрэм яшIуа­гъэкIэ аужырэ илъэсхэм Адыгеим культурэм иунэу итхэр жъугъэу лъэхъаным диштэу зэтедгъэпсы­хьа­жьыгъэх. Мэхьэнэ ин иI мы Iоф­шIэным шIуагъэ къызэ­ритырэм ыкIи цIыфхэм къызэрашъхьапэрэм — ныбжь зэфэшъхьафхэм анэсыгъэхэр культурэм иунэхэм зэрапхых, район ыкIи республикэ мэхьанэ зиIэ Iофтхьабзэхэр ащызэхащэх», — къыкIигъэт­хъыгъ КъумпIыл Мурат.