ШахматхэмкIэ зэнэкъокъухэр республикэ шахмат клубым щыкIуагъэх. 2013-рэ илъэсым къэхъугъэ кIэлэеджакIохэм ыкIи ахэм анахьыкIэхэм заушэтыгъ, зэкIэми ухьазы­рыны­гъэ дэгъу къагъэлъэгъуагъ. Турнирым кIэлэ 27-рэ хэлэ­жьагъ. Илъэсибгъу зыныбжь Ро­ман Киракосян зэкIэми анахь лъэшыгъ, ащ текIоныгъэр къыдихыгъ. Мыекъопэ гимназиеу N 22-м чIэс кIэлэеджакIом оч­коуи 7 ригъэкъугъ. ХагъэунэфыкIырэ чIыпIэхэр къыдахыгъэх Краснодар краим щыщ Егор Шевченкэмрэ къутырэу Гавердовскэм щыпсэурэ Денис Зверьковымрэ. Ахэм очко пчъагъэу рагъэкъугъэр зэфэдиз, ау ежьхэм язэIукIэгъу Егор текIоныгъэр къыщыдихыгъ, ащ къы­хэкIыкIэ ар ятIонэрэ хъугъэ. Пшъашъэхэм ешIэгъуихэу яIэм ыуж зэфэхьысыжьхэр зашIым нэбгыритIумэ очко 5,5-рэ зырыз рагъэкъугъ. ТекIоныгъэр къыдэзыхыгъэр гъэунэфыгъэным фэшI партие тедзэ (армагеддон) зэхащагъ. Ащ апэрэ чIыпIэр къыщыдихыгъ Василиса Назаровам, хагъэ­унэфыкIырэ чIыпIэхэр къафагъэшъошагъэх Арина Жуковамрэ Пхэнэе Данэрэ.