Джэджэ районым 2023-рэ илъэсым социальнэ ыкIи экономикэ хэхъоныгъэу ышIыгъэхэр щызэфахьысыжьыгъэх. АР-м и Къэралыгъо Совет — Хасэм и Тхьаматэу Владимир Нарожнэр зыхэлэжьэгъэ зэхэсыгъоу народнэ депу­татхэм я Совет щызэхащэгъагъэм район пащэр шIагъэу щыIэхэм, агъэнафэхэрэм къащытегущыIагъ, ащ ыпэкIэ Парламентым и тхьаматэ социальнэ псэуалъэхэр къыкIухьагъэх, районым щыпсэухэрэм заIуигъэкIагъ.Пстэуми апэ Владимир Нарожнэр поселкэу Гончаркэм дэт фельдшер-мамыку IэзапIэм щы­Iагъ. Лъэпкъ проектэу «Псауныгъ» зыфиIорэм къыдыхэлъытагъэу ар агъэцэкIэжьи къызэ­IуахыжьыгъакI. Джы лъэхъаным къыздихьыгъэ шэпхъэ пстэумэ адиштэу зэтегъэпсыхьагъэ хъугъэ, регистратури, кабинетхэри иIэх, ищыкIэгъэ псэуалъэхэр зэкIэ чIэтых. Поселкэм щы­псэурэ нэбгырэ минрэ ныкъорэ фэдизмэ ащ апэрэ медицинэ IэпыIэгъур щараты. Псэуалъэм игъэкIэжьын сомэ миллиони 3,5-рэ халъхьагъ. Владимир Нарожнэр псэупIэм дэсхэм гущыIэгъу афэхъугъ, яшIоигъоныгъэхэм акIэупчIагъ. ЦIыфэу щыпсэухэрэмкIи, Iоф щызышIэхэрэмкIи фельдшер-мамыку IэзапIэр зэрагъэкIэжьыгъэр хъугъэ-шIэгъэ инэу щыт, сыда пIомэ апэрэ медицинэ IэпыIэгъур анахьыбэу ящыкIагъэхэм ащыщ. Нэужым АР-м и Къэралыгъо Совет — Хасэм и Тхьаматэ сабыибэ зиIэ Кушнарев зэ­шъхьэгъусэхэу Максимрэ Натальерэ адэжь еблэгъагъ. Унэгъо ныбжьыкIэм къызэтехъухьагъэхэу сабыитф епIу. Анахьыжъэу Иван илъэси 6, Софие 4, ахэм ауж къикIырэ Александр илъэси 2 аныбжь, анахьыкIэхэу Мариерэ Варварэрэ мы мазэм илъэс хъущтых. Шъолъыр Парламентым ипащэ унагъом икъэбархэм акIэ­упчIагъ, зэшъхьэгъусэхэм шIу­лъэгъуныгъэм, шъхьэкIэфэны­гъэм, шэн-хабзэхэм осэ ин зэрафашIырэр зэрэнэрылъэ- гъум къыкIигъэтхъызэ, ащ пай «тхьашъуегъэпсэу» ариIуагъ. Депутатхэм унагъом — техникэ, зэтIозэ пшъэшъэжъые цIы­кIухэм апае пIэкIор, джэ­гуалъэхэр афащэфыгъэх, ахэр аратыжьыгъэх. Мы мэфэ дэдэм Владимир Нарожнэр хэушъхьафыкIыгъэ дзэ операцием хэлажьэзэ 2023-рэ илъэсым иIоныгъо мазэ фэхыгъэ Павел Кузуб иунагъо IукIагъ. Ащ щымыIэжьэу ЛIы­хъужъныгъэм иорден къыфагъэ­шъошагъ. Парламентым ипащэ уна­гъом щыкIагъэу иIэхэм, кIэлэцIыкIу­хэм гъэхъагъэу ашIыхэрэм акIэупчIагъ, депутатхэр сыди­гъокIи IэпыIэгъу зэрафэхъущтхэр къыхигъэщыгъ. ЛIыхъужъым ишъхьэгъу­сэу Светлана Кузуб сабыитIу епIу, кIэлэцIыкIу IыгъыпIэу «Сол­нышкэм» имузыкальнэ пащ. ИIофхэм агъэгумэкIхэу ыдэжь зэрэкIуагъэхэм, шIухьафтынэу афахьыгъэхэм апае «тхьашъуе­=гъэпсэу» къариIуагъ, ипшъашъэ игъэхъагъэхэр къафиIотагъэх. Викторие я 9-рэ классым ис, литературэр, биологиер шIу елъэгъух, инджылызыбзэр куоу зэрегъашIэ, еджапIэм щызэхащэрэ Iофтхьабзэхэм ахэлажьэ. Ишъаоу Александр джыри цIыкIу, илъэси 4 ныIэп ыныбжьыр. Шъолъыр Парламентым ипащэ бзылъфыгъэм фэтхьаусыхагъ, пытагъэрэ лIэблэнагъэрэ хэлъхэу исабыйхэр къызэриIэтыхэрэм осэшхо фишIыгъ. — Павел Кузуб Адыгеир зэ­рыгушхохэрэм ащыщ, ишIэжь дгъэлъэпIэнэу къылэжьыгъ. На­цизмэм пэшIуекIорэ заом ащ ыпсэ щигъэтIылъыгъ. ЛIыхъу­жъым ишIэжь гъэпытэгъэнымкIэ ищыкIагъэр зэкIэ тшIэщт, иунагъо IэпыIэгъунчъэу къэдгъэнэщтэп, — къыIуагъ ащ. Народнэ депутатхэм я Совет изэхэсыгъо нэужым щыIагъ. Пстэумэ апэу УФ-м и Президент къыгъэуцугъэ пшъэрылъэу хэу­шъхьафыкIыгъэ дзэ операцием хэлажьэхэрэмрэ ахэм яунагъо­хэмрэ IэпыIэгъу ятыгъэ­ным фэ­гъэхьыгъэр гъэцэкIагъэ зэрэхъугъэм район администрацием ипащэу Андрей Таранухиныр къытегущыIагъ, ащ ыуж социальнэ-экономикэ хэхъоныгъэхэм къащыуцугъ. Районым имэкъумэщ федэу къыхьырэм хэхъуагъ. Къэра­лыгъо IэпыIэгъур ары ащкIэ зишIуа­гъэ къакIорэр. Гъомылэп­хъэшIыным, къыдэгъэкIыжьыным заушъомбгъу. Лъэпкъ проектиплI муниципальнэ образованием щыпхыращы. 2024-рэ илъэсэу къихьагъэм ахэм анэмыкIэу джыри зы проект къыдыхэлъытэгъэ псэуалъэхэр ашIыщтых е агъэкIэжьыщтых. «Социальнэ догазификацием» фэгъэхьыгъэ программэу УФ-м и Президентэу Владимир Путиныр кIэщакIо зыфэхъугъэм ипхырыщыни районым ипащэ къытегущыIагъ. Ащ къызэрэдэлъытагъэм тетэу, фэгъэкIотэнхэр зиIэ хэушъхьафыкIыгъэ цIыф купхэм газым пае оборудование ащэфынэу зэтыгъо ахъщэ тынхэр афагъэкIуагъэх. ЗэкIэмкIи ащ сомэ миллиони 7-м ехъу пэIуагъэхьагъ. Владимир Нарожнэм АР-м и ЛIышъхьэу КъумпIыл Мурат ыцIэкIэ Iофтхьабзэм хэла­жьэхэрэм шIуфэс къарихыгъ. — Джэджэ районым хэхъоныгъэ ышIынымкIэ амалышIу­хэр IэкIэлъых, — къыIуагъ ащ. —Инвестициеу къыхалъхьэрэр на­хьыбэ шIыгъэным ылъэны­къокIэ IофшIэнхэр нахь гъэлъэ­шыгъэнхэ фае. Инвестор хъуным фытегъэпсыхьагъэхэм нахь чанэу Iоф адашъушIэмэ, чIыпIэ­хэр нахьыбэу апэжъу­гъохыхэмэ ишIуагъэ къэкIощт. Къэралыгъо IэпыIэгъу пстэур, анахьэу мэкъу-мэщым ылъэ­ныкъокIэ къатыхэрэр, жъугъэфедэнхэ фае. Парламентым икъэбархэмкIэ зыгъэхьазырыгъэр ХЪУТ Нэфсэт. Сурэтхэр: АР-м и Къэралыгъо Совет — Хасэр.