Урысыем ичемпионат и Суперлигэ хэлэжьэрэ «АГУ-Адыифым» зичэзыу ешIэгъоу иIагъэр Мыекъуапэ щыкIуагъ.Звенигород икомандэу «Звездам» IукIагъ, хьакIэхэм ешIэгъур ахьыгъ. «АГУ— Адыиф» — «Звезда» — 28:43. Зэнэкъокъум иапэрэ едзыгъо изэфэхьысыжьхэмкIэ, я 7 — 12-рэ чIыпIэхэр къыдэзыхы­гъэхэм язэIукIэгъухэм мыр къа­дыхэ­лъытагъ. ЗэкIэмкIи Адыгеим илIы­кIохэм ешIэгъуитф яIагъ, ахэм ащыщэу щыр зэлъыпытэу къахьыгъ. Ау мы ешIэгъур пштэмэ, апэрэ такъикъхэм къащегъэжьагъэу «Звездам» хэтхэр ыпэкIэ илъыгъэх, текIоныгъэм яшъыпкъэу фэбэнагъэх. Ащ типшъашъэ­хэр фэхьазырыгъэхэп ыкIи афэу­кIочIыгъэп. ХьакIэхэм нахь къахэщыгъэр Станислава Герасимовар ары, ащ гъогогъу 12-рэ Iэгуаор къэлапчъэм дигъэфагъ. «АГУ-Адыифым» иешIакIохэм нахь къахэщы­гъэ Валентина Томилинам Iэ­гоуи 7 къэлапчъэм дидзагъ. Купэу «Б-м» хэт командэхэр зыдэщыт чIыпIэхэр ыкIи очко пчъагъэу ­рагъэкъугъэр: 1. «Динамо-Синара» — 30 2. «Звезда» — 27 3. «АГУ-Адыиф» — 14 4. «Ставрополье» — 12 5. «Луч» — 6 6. «Университет» — 3. ЯтIонэрэ едзыгъом къыдыхэлъытэгъэ ешIэгъуитIоу «АГУ— Адыифым» иIэщтхэр Звенигородрэ Ижевскэрэ ащыкIощтых. Гъэт­хапэм и 20-м Волгоград икомандэу «Динамо-Синара» зыфиIорэм Мыекъуапэ щыде­шIэщт.