Республикэ кIэлэцIыкIу тхылъеджапIэр зыщыIэр илъэс 87-рэ хъугъэшъ, ащ фэдизым лIэужыкIэм тхылъыр шIу егъэлъэгъугъэныр ыкIи идунэееплъыкIэ псыхьэгъэныр пшъэрылъ шъхьаIэу зыфегъэуцужьы, мафэ къэс яIофшIэн шIуагъэ къытэу зэрэзэхащэщтым отдел пэпчъ иIахь хелъхьэ. Тхылъым фэщагъэу ыкIи мэхьанэ фишIэу кIэлэеджакIохэр пIугъэнхэр тхылъеджапIэм дэгъоу зэшIуехы. Мы илъэс зэкIэлъыкIохэм тхылъеджапIэр Iофтхьэбзэ инэу «Символы России» ыкIи «Читай Фест» зыфиIохэу Урысые къэралыгъо кIэлэцIыкIу тхылъеджапIэр кIэщакIо зыфэхъугъэхэр пхырыщыгъэнхэм дэлажьэ. АдыгеимкIэ муниципальнэ тхылъ­еджапIэхэм кIэлэцIыкIухэм апае творческэ зэнэкъокъоу «Герои родной земли» («ЧIыгу гупсэм илIыхъужъхэр») ыIоу зэхащагъ. Ащ еджакIохэр ушэтын-лъыхъон-къэгъотын Iофышхом фегъасэх, япсэупIэ чIыпIэ нахь дэгъоу ашIэ мэхъу, тарихъым зыфагъэнэIуасэ. Мы зэнэкъокъум ишIуагъэкIэ еджакIохэм якъуаджэкIэ, якъалэкIэ шIушIагъэ зиIэ цIыфхэр къыхагъэщых. ТхылъеджапIэм иIоф­шIэнкIэ анахь мэхьанэ зиIэхэм ащыщ унэгъо кIоцIым тхылъым щеджэнхэр.

КIэлэцIыкIу тхылъеджапIэм Iофтхьабзэу «Дарите книги с любовью» зыфиIорэр, тхылъыр шIухьафтынэу тыгъэным и Дунэе мафэ фэгъэхьыгъэу, бэмышIэу щыкIуагъ. Ащ мурадэу иIэр Адыгэ рес­публикэ еджэпIэ-интернатэу сэкъатныгъэ зиIэ кIэлэцIыкIухэр зыщеджэхэрэм итхылъ фонд хэгъэхъогъэныр ыкIи гъэ­кIэжьыгъэныр ары. Республикэ кIэлэцIыкIу тхылъеджапIэм Хэгъэгум иухъумакIо и Мафэ къыкIэлъы­кIоу бзылъфыгъэхэм я Дунэе мафэ, адыгабзэм ыкIи тхыбзэм я Мафэ хагъэ­унэфыкIыщт, проектэу «Сыбзэ — сидунай» къыдыхэлъытэгъэ IофшIэнхэр ыкIи ахэмкIэ кIэух зэфэхьысыжьхэр ащ щыкIощтых. Щэч хэлъэп Адыгэ респуб­ликэ кIэлэцIыкIу тхылъеджапIэм цIыфыкIэм ипIун иIахь гъэнэфагъэ зэрэхилъхьэрэм. Сурэтхэр: кIэлэцIыкIу тхылъеджапIэр.