Тэхъутэмыкъое районым ит поселкэу Инэм икIэлэцIыкIу IыгъыпIэу N 4-м ­кIэлэпIоу щылэжьэрэ Хьа­хъурэтэ Зуриет иIоф­шIа­кIэ ны-тыхэм агу ри­хьызэ, ясабыйхэр ащ те­фэнхэм кIэлъэIурэр ма­кIэп.

Ар зытехъухьэрэр лъэпкъ зэфэшъхьафмэ къахэкIыгъэ сабыйхэм адыгэ шэн-хабзэхэри, нэмыкI лъэпкъмэ яхэбзэшIухэри зэраригъэшIэщтым зэрэпылъыр ары. КъыткIэхъухьэрэ лIэужхэм я Хэгъэгу шIу алъэгъоу, Iэдэбхэу, гъэсагъэхэу хъунхэм яублапIэр унагъомрэ кIэлэцIыкIу IыгъыпIэм­рэ. Ар къыгурыIозэ, Зуриет иIоф­шIэн ны-тыхэр къыхегъэлажьэх. 2024-рэ илъэсыр УФ-м и Президентэу Владимир Путиным уна­гъом и Илъэсэу зэригъэнэфагъэр къыдилъыти, ащ фэгъэхьыгъэ Iофтхьабзэхэр ригъэкIокIынхэу Зуриет рихъухьагъэх. Ахэм ащыщхэри зэхищэгъахэх. ГущыIэм пае, тиадыгэ тхакIохэу сабыймэ афэтхагъэхэм кIэлэцIыкIухэр нэIуасэ зы­щафишIыгъэ Iофтхьабзэр бэмышIэу ригъэкIокIыгъ. МэщбэшIэ Исхьакъ, Къуекъо Налбый, Цуекъо Джэхьфар, нэмыкIхэм атхыгъэ усэ цIыкIухэм ежьыри сабыйхэри къя­джагъэх. Темэу усэмэ къащаIэ­тырэмэ афэгъэхьыгъэ сурэтхэр кIэлэцIыкIухэм къаригъэшIыгъэх, зэригъэнэкъокъугъэх. А Iофтхьабзэм ны-тыхэр къыригъэблэгъа­гъэх. — Хэтрэ цIыфи зыщыщ лъэпкъым рэгушхо, ащ идахэ зэриIощтым пылъ, — къеIуатэ Хьахъу­рэтэ Зуриет, — джащ фэд уна­гъори, непэрэ лъэхъаным зетхьэрэ культурэри, тизэхэшIыкI зыгъэбаирэри ащ къыщежьэ. Тэ типшъэ­рылъыр а IофыгъошIур лъыдгъэ­кIотэныр ыкIи хэдгъэхъоныр ары. Лъэпкъ зэфэшъхьафыбэмэ къа­хэкIыгъэ кIэлэцIыкIухэу сыздэла­жьэхэрэм шэн дахэхэр ахэлъхьэгъэнхэмкIэ сиIэпыIэгъухэр унагъо­хэр ары. Игъо шъыпкъэу сэлъытэ Урысыем и Президент мыгъэ унагъом и Илъэсэу зэригъэнэфагъэр. Зуриет пшысэхэр, адыгэ Iор­Iуатэхэр, гущыIэжъхэр къызфигъэфедэхэзэ шэн дахэхэр кIэлэцIыкIухэм зэрахилъхьащтхэм ыуж ит. БэмышIэу джэгукIэ шапхъэм илъ Iофтхьабзэу «Хырыхыхьхэр» зыфиIорэр зэхищагъ. А уахътэм кIэлэцIыкIу IыгъыпIэр гушIогъо-щхы макъэм зэлъиштагъ, гъэсэныгъэ-­пIуныгъэр апшъэу зэрэщытыр къэ­зыушыхьатырэ Iофым шIыкIэ шIагъоу кIэлэпIум къыфиугупшысыгъэм сабыйхэри ны-тыхэри ыгъэрэзагъэх.