Къэралыгъом иухъума­кIохэм ягъэхьазырын ­Iофыгъо шъхьаIэхэм ащыщ. Зыныбжь икъугъэхэу дзэм къулыкъу щызыхьынэу кIохэрэм непэ ащ еплъыкIэу фыряIэр нахь гъэлъэшыгъэу зыщызэхашIыкIырэ лъэ­хъан. Джащ фэд непэ зигугъу къэсшIыщт кIалэр.Цуужъ Тахьсин 2020-рэ илъэ­сым Щынджые гурыт еджапIэр къыухыгъ. Урысые къэралыгъо университетым иколледж чIахьи 2023-рэ илъэсым ар къыухыгъ. Ащ ыуж юрист сэнэхьат зэригъэгъотымэ шIоигъоу апшъэрэ еджапIэм чIэхьажьыгъ. «Дзэм къулыкъу щихьынэу повесткэр къызыфакIом, ар лъа­ригъэгъэкIотэнэу ышъхьэ къихьа­гъэп. Ащ зэрэкIощтымкIэ еджэнджэшыгъэп», — хигъэунэфы­кIыгъ Тахьсин янэу Фатимэ. КIалэм академическэ зыгъэ­псэфыгъо уахътэ къаIихи дзэм кIуагъэ. «Урысые Федерацием ­илъэпкъ гвардие идзэхэм ягупчэ зэпхыныгъ» зыфиIорэ федеральнэ къэралыгъо учреждением къулы­къур щехьы.

«Мыгъэ шэкIогъум къулыкъур къыухынэу щыт, — къыпедзэ­жьы Цуужъ Фатимэ. — Шъэо­жъые на­хьыкIэми ащ щысэ трехы. Имран я 8-рэ классым ис нахь мышIэми, уахътэр къызысыкIэ, ышнахьыжъ фэдэу дзэм къулыкъу щихьынэу фай».

Тахьсин янэ телефонкIэ къы­дэгущыIэ зыхъукIэ ыгу къыдищаеу къыреIо: «Силэгъумэ са­хэтэу къулыкъу сэхьы. ИщыкIагъэ хъумэ тикъэралыгъо къэтыухъумэным тыфэхьазырын фае. Ар мэхьанэшхо зиIэ Iофыгъоу зэрэщытыр къыдгурэIо, тикомандирхэми къытфаIуатэ. Мамыр щыIакIэр ухъумэгъэныр пшъэ­рылъ шъхьаI ыкIи ащ фэгъэ­загъэхэм яIофшIэн осэшхо фэп­шIын фае».

КIалэхэм ятэу Цуужъ Айдэмыр Краснодар дэт дзэ летнэ-­техническэ училищэу А. Се­ро­вым ыцIэ зыхьырэр къыухыгъ. ТыгъэкъокIыпIэ Чыжьэм илъэситIурэ исэнэхьаткIэ къулыкъу щихьыгъ, Къыблэ институтыр 2005-рэ илъэсым къыухыжьыгъ.

Нымрэ тымрэ къо нахьыжъым дзэм къулыкъу зэрэщихьырэм щэгушIукIых, рэгушхох. Ежь кIа­лэм къулыкъур зиухыкIэ ап­шъэрэ гъэсэныгъэ зэригъэ­гъо­ты­нышъ, полицием хэхьанэу фай. А гу­хэлъыр ицIыкIугъом щегъэ­жьа­гъэу Тахьсин зыдиIыгъ. ИшIои­гъоныгъэ къыдэхъунэу етэIуалIэ. Тэу Замир.